Fransanın xarici işlər naziri Ketrin Kolonna oktyabrın 3-də Ermənistana səfər edəcək. Fransanın xarici işlər naziri bu həftə Parisin Ermənistanın Sünik bölgəsində Fransa konsulluğunu açmaq, həmçinin İrəvanla müdafiə sektorunda əməkdaşlığı gücləndirmək planlarını açıqlayıb:
“Bu, Fransanın Ermənistanı dəstəklədiyinin əyani sübutudur. Hərbi attaşe Fransanın İrəvandakı səfirliyinə təyin olunacaq".
Nazir təkid edir ki, Avropa İttifaqı Fransadan nümunə götürərək Ermənistanla münasibətlərini gücləndirməlidir.
“Le Figaro” qəzeti yazır ki, Azərbaycan hakimiyyətinin Azərbaycanın qərb rayonları ilə onun eksklavı - Naxçıvan Muxtar Respublikası arasında nəqliyyat əlaqələrini təmin etmək üçün “Zəngəzur dəhlizi” tikmək istədiyi Sünik bölgəsinə, Ermənistanın cənubuna hərbi müdaxilə planları hazırladığına dair şübhələr artıb.
Fransada bu yalanlar hansı məqsədlə uydurulur?
Politoloq Turab Rzayev “Bakı -Xəbər”ə açıqlamasında bildirdi ki, bu, Fransanın bizə yönəlik növbəti təxribatıdır: “Ola bilər ki, planlarında Azərbaycanı hansısa hərbi əməliyyatlara təhrik etmə var. Biz bu cür provokasiyaları həm də İran tərəfdən görürük. Belə rəy yaradırlar ki, sanki Azərbaycan Ermənistan ərazisinə hücum etmək istəyir. Bütün bunlar reallıqdan uzaq fikirlərdi. Sadəcə, çalışırlar Azərbaycanı dünyada işğalçı, aqressor ölkə kimi tanıtsınlar. Düşünürəm ki, bundan sonra da İran və Fransadan yenə də bənzər addımları görəcəyik. Azərbaycan Zəngəzur dəhlizinin açılması ilə bağlı heç bir halda hərbi həll nəzərdə tutmur. Türkiyə prezidentinin dı çıxışı oldu ki, Ermənistan öz ərazisindən dəhlizin keçməsinə razı olmasa, o zaman bu layihə İran üzərindən reallaşa bilər. Azərbaycan Zəngəzur dəhlizinin hərbi əməliyyatlar hesabına açılacağı ilə bağlı heç bir fikir işlətməyib. Fransa faktları təhrif edir ki, öz mövcudluğunu sübut eləsin. Sanki belə rəy yaradırlar ki, güya Azərbaycan dünyanın sərhədlərini yenidən dəyişmək istəyir. İran buna hətta “qırmızı xətti” də deyir”.
Azərbaycan öz ərazisində antiterror tədbiri keçirməklə erməni quldurlarına dərsini verdi. Bu bizə dost olan dövlətləri sevindirdiyi kimi, bizi özlərindən bilməyən, hər zaman məkrli siyasət yürüdən dövlətləri də qıcıqlandırdı. Onlardan biri də Fransadır. Antiterror tədbirləri nəticəsində Azərbaycanın öz suverenliyini bütün ərazilərdə bərpa etməsindən sonra regionda 30 ildən çox davam edən münaqişənin bitməsi Fransanı möhkəm qıcıqlandırıb. 44 günlük Vətən müharibəsi nəticəsində Ermənistanın işğalı altında olan Azərbaycan ərazilərinin azad olunmasından sonra Fransanın regionda birmənalı ermənipərəst siyasət yürütməsi kimsəyə sirr deyil. Heç fransızlar da bunu gizlətmirlər. Azərbaycan, Ermənistandan fərqli olaraq, hansısa dövlətin ərazisinə göz dikməyib. Biz öz ərazimizdə beynəlxalq hüququn normalarına uyğun formada addımlar atır, terrorçuları vətənimizdən təmizləyirik. Bu addımı istənilən hüquqi dövlət atardı ki, biz də atmışıq. Fransa isə, təəssüf ki, sülhdən yana bir çox təşkilata üzv olsa da, heç zaman əməllərində sülhün dəstəkçisi kimi görünməyib.
Məhəmmədəli QƏRİBLİ
