Kocaeli Milli Kuruluşlar Birliyi başkanı Yücel Alpay Demir və Araştırmacı yazar, Selçuklu Düşüncə Klubunun başkanı Dr. Süleyman Pekin 27 sentyabr Anım Günündə iştirak etmək üçün Bakıda olarkən bir sıra görüşlər keçirib, şəhid ailələri ilə görüşüb, Azərbaycanın Zəfər sədalı günlərini xalqımızla birgə yaşayıblar.
Müasir İnkişaf Birliyinin sədri Mübariz Göyüşlünün təşəbbüsü ilə Yücel Alpay Demir və Dr. Süleyman Pekindən qəzetimiz üçün müsahibə götürdük və onların səfər təəssüratlarını sizinlə bölüşmək istədik.
Yücel Alpay Demir: “Bakıya gəldikdən sonra əvvəlcə şəhid ailələrini ziyarət etdik, onlara türk millətinin səmimiyyətini, duasını çatdırdıq, şəhidlərimizin məzarlarını ziyarət etdik, onların ruhuna fatihə oxuduq”
Söhbətə Yücel Alpay Demirlə körpü saldıq. “Azərbaycan bizim ikinci vətənimizdir. Biz bu proqramı fevral ayına planlaşdırmışdıq. Qarabağ zəfərinin növbəti ildönümünü qardaşlarımızla birgə qeyd etmək üçün xüsusi olaraq gəldik. 27 sentyabr Anım Gününü Bakıda keçirmək üçün ailələrimizlə birgə gəldik. Bizim Türkiyədə iki günümüz varsa onun biri Türkiyə, o biri isə Azərbaycan üçündür. Mən Kocelidə yaşayıram, Milli Kuruluşlar Birliyi başkanıyam, birliyimizin içində 40 toplum quruluşu var. Fikir klubları var, ora əsasən Turançılığı, Atatürkü, Ənvər Paşanı, Nuru Paşanı, Azərbaycanı önəmsəyən insanlar toplanıb. Onlar arasında yazarlar, elm adamları, sivil toplum başkanları var. Onlar da Azərbaycan və Türkiyəni bir ananın iki oğlu kimi, bir bədənin iki qolu olaraq görürlər. Bizim evimizdə də, iş yerlərimiz də Azərbaycan və Türkiyə bayraqları qoşadır”-deyə bildirən Yücel Alpay Demir bəydən soruşduq ki, Azərbaycanın öz ərazi bütövlüyünü təmin etməsi faktına necə yanaşır. Müsahibimiz bildirdi ki, o bu xəbəri eşidəndən özünü xoşbəxt hiss edir. Yücel Alper Demir bəy bildirdi ki, o torpaqlar işğal altında olduğu dövrlərdə hər yerdə o torpqların Azərbaycana aid olduğunu deyib. Azərbaycana çox haqsızlıq olduğunu deyən həmsöhbətimiz “Xocalıda qardaşlarımız soyqırıma məruz qalanda, hər canımız şəhid olanda ağrısını Türkiyədə yaşayan insanlarıq. Biz uşaqlarımıza Mübariz İbrahimovun qəhrəmanlığını anladaraq onların da qəhrəman olması üçün o ruhu yaşadan adamlarıq. Allah bizim liderlərmizdən - Əliyev və Ərdoğandan razı olsun. Liderlərimiz dünyaya meydan oxudular və dünya da Qarabağın, Şuşanın Azərbaycan-türk torpağı olduğunu qəbul etmək zorunda qaldı. Biz bunu uzun illər bütün dünyaya çatdırdıq, xaricdə toplantılara qatıldıq, çıxış etdik, bütün sosial şəbəkələrdə qeyd etdik ki, o torpaqlar Azərbaycan torpaqlarıdır. Dedik ki, bizi dinləyin, dinləməsəniz bunu ordumuz yumruqla anladacaq. Ən son Azərbaycan ordusu dəmir yumruğunu vurdu və bütün dünya duydu. O torpaqlar üçün can-qan vermişik. Nə bu gün, nə də sabah - qiyamətə qədər heç kimsə Qarabağı işğal edə bilməz. Azərbaycan böyük, qədim, köklü və güclü bir dövlətdir. Yanında da Türkiyə dövləti və milləti vardır. Türkiydə analar övladlarına vətəni svməyi öyrədərkən vətənin bir parçası kimi Azərbaycanı da öyrədir. Mən bütöv Azərbaycan tərəfdarıyam, Təbriz də Azərbaycandır”-deyə qeyd edən müsahibimiz bildirdi ki, bu gün Azərbaycan dövləti separatçıların başını əzib və onları zərərsizləşdirib, sadə ermənilər üçün reinteqrasiya proqramı hazırlayıb. “Erməni məkrli toplumdur. Çünki biz erməniləri təkcə Azərbaycanda tanımadıq, Osmanlı imperatorluğunda ermənilər uzun illər yaşadılar. Bu toplumun ideoloqları kompleksli, yarımçıq insanlardır. Onlar türk millətinin güclü olduğunu bilirlər. Biz onlara keçmişdə Azərbaycan torpaqlarında yaşamaq fürsəti verdik, amma rahat durmadılar, çünki zatları, mayaları pozuqdur. Bizim canımızı çox yaxdılar. 30 il bundan əvvəl üzücü bir şəkildə Qarabağdan ayrılan anaların oğulları vətən torpaqlarını geri aldılar, işğaldan azad etdi. Liderimiz İlham Əliyevin müsahibələrini köksümüz qabara-qabara izləyirik...Ermənilər özləri Qarabağdan könüllü gediblər, onlara qarşı heç bir xoşagəlməz hal baş verməyib, burdan normal şəkildə çıxıb gediblər. Bundan sonra onların nə deməsi, hansı yalanı uydurması bizim üşün maraqlı deyil. Əgər kimdəsə suç aramaq istəyirlərsə, onu öz ideoloqlarında, onları bu vəziyyətə salanlarda arasınlar, onlar qarışdırdılar ortalığı, onlar rahat durmadılar. Yoxsa bu dünya hamımıza yetər...
Bakıya gəldikdən sonra əvvəlcə şəhid ailələrini ziyarət etdik, onlara türk millətinin səmimiyyətini, duasını çatdırdıq, şəhidlərimizin məzarlarını ziyarət etdik, onların ruhuna fatihə oxuduq. Biz Türkiyədən analarımızın dualarını əmanət alıb gəldik. Sonra müxtəlif təşkilatlarda görüşlər keçirdik, millət vəkilləri ilə görüşdük. Biz duyğuları danışmaqla mükəlləfik. Adam sevildiyini bilir, amma duymaq istər. Məktəbləri ziyarət etdik, şagirdlərimizin sorduqları sorulara cavab verdik, Azərbaycan eşqini dilə gətirdik, Türkiyənin onların da vətəni olduğunu dedik. Varlığımız türk varlığına ərmağandır. Nə mutlu türkəm deyənə”-deyə bildirən Y.A.Demir vurğuladı ki, qarşımızdakı yüz il türk əsiri olacaq və türk xalqı dünyada daha da böyük şöhrət qazanacaq.
Süleyman Pekin: “...27 sentyabr həm də Qarabağ zəfərinə aparan gündür”
Söhbətimizi araşdırmacı yazar, Selçuklu Düşüncə Klubunun başkanı Dr. Süleyman Pekinlə davam etdiririk. Fikrinə Yavuz Bülənd Bakilərin “Azərbaycan ürəyimdə bir şah damardır” misraları ilə başlayan S.Pekin “Bakı-Xəbər”ə “bunun yanında Qarabağ uzun illər içimizdə qanayan bir yara idi. Biz doxsanıncı illərdə dövlət məktəblərində müəllimlik edərkən əlimizdən bir şey gəlmədi, təkcə ürəymiz yandı. Amma gec də olsa bu yaranın qapanmasına şahid olduq. Biz bura zəfər qutlamasına gəlmişik. 44 günlük Vətən müharibəsinin başlandığı 27 sentyabr həm də Qarabağ zəfərinə aparan gündür. Zəfər gününün başlanğıcıdır. Biz bu tədbirlərdə iştirak etdik. Ürəyimiz sevindi. Azərbaycan və Türkliyə liderləri ilə yanaşı xalqımız da bir-birini çox dərindən anlayır. 24 saatlıq lokal antiterror tədbirləri də bu zəfərin nöqtəsi oldu. Biz uğrunda çoxlu şəhidlər verdiyimiz Qarabağın azadlığını hər zaman arzu edirdik. Allah şəhidlərimizə rəhmət eləsin, qazilərimizə güc–qüvvət versin”-deyə bildirən S.Pekin qeyd etdi ki, Azərbaycanla bağlı daha çox elmi əsərlərdə, tarixi araşdırmalarda Azərbaycandan da bəhs edib, həm Güney, həm də Quzey Azərbaycanda da yazıb, şeirlərindən Azərbaycan, Qarabağ mövzusu keçib. Ortaq türk dili məsələsində də aktiv olacağımızı deyən S.Pekin qeyd etdi ki, artıq ortaq türk tarixi dərsliyi meydana çıxıb və tədris olunur. “Biz yeri gəldikcə ortaq ruhumuzu, ortaq qəlbimizi yazı ilə, şeirlə duyurmağa çalışırıq. Ortaq türk tarixinin öyrədilməsi çox önəmli bir məsələdir. Türk Dövlətləri Təşkilatının dəstəyilə 2022-ci ilində həm Azərbaycan, həm Qazaxıstanla birlikdə ortaq türk tarixi kitabı yazıldı. Ortaq türk tarixsi dərsi tədris edilir. Yalnız Türkiyə tarixi nöqtəsindən tarixə baxmamaq lazımdır, həm Qafqaz türklərinin, həm də Türküstan türklərinin nəzəri ilə baxmaq lazımdır ki, ortaqlıq hissi daha da genişlənsin. Ortaq türk tarixi kitabının çıxması çox sevindirici oldu. 2023-cü il tədris ilində liseylərdə seçmə dərs kimi tədris olunur”-deyə qeyd edən S.Pekin bildirdi ki, bu kitabda Türkiyənin də, Azərbaycanın da tarixi var.
Qəlbi Azərbaycan sevgisi ilə döyünən iki türkiyəli aydının düşünələri bizim üçün də çox maraqlı oldu. Söhbətimiz zamanı bir millət iki dövlət anlayışının nə qədər etibarlı və əbədi olduğunu bir daha anladıq. Doğrudan da sevincimizi də, kədərimizi də qoşa yaşayırıq.
İradə SARIYEVA
