Fransanın Ermənistana hərbi dəstək məsələsində yalnız indiki yox, əvvəlki prezident Fransua Olland da aktivləşib. Ollandın son açıqlamasında bununla bağlı avantürist fikirlər yer alıb: “Ermənistandan imtina Fransa üçün böyük biabırçılıq olardı. Artıq Ermənistan sərhədlərinin bizim üçün müqəddəs olduğunu bəyan etməyin vaxtı çatıb”.
Görünən odur ki, indiki prezident Emmanuel Makrondan başqa keçmiş prezidentlər də bu prosesə qoşulub. Bu, Fransanın Ermənistanın müdafiəsini beynəlxalq miqyasda ümumxristian həmrəyliyi müstəvisinə keçirmək cəhdindən xəbər verirmi? Ermənistan sərhədlərinin müqəddəs elan olunması deyilməklə artıq dini amil qabağa keçir. Bu o deməkdir ki, artıq xristian həmrəyliyi çərçivəsində biz Ermənistanı kollektiv şəkildə müdafiə etməliyik. Bu, artıq Ermənistanın müdafiəsi naminə Azərbaycana qarşı xristian həmrəyliyi çağrışıdı.
“Hansı din amilindən söhbət gedə bilər ki, müsəlman İran hər zaman erməni tərəfini müdafiə edir?”
Məsələ ilə bağlı “Bakı-Xəbər”ə açıqlama verən AVCİYA-nın vitse-prezidenti, professor Məhərrəm Zülfüqarlı hesab edir ki, Fransa bununla dini müstəvidə konflikt yaratmaq istəyir: “Fransanın canfəşanlığı fonunda tarixi araşdırsaq görərik ki, hazırkı siyasət əvvəlki dövrlərdə yeridilən siyasətə söykənir. Yüz il əvvəl Osmanlı İmperiyasına yönəlik fitnə-fəsadın başında Fransa dayanırdı. O vaxt indiki Türkiyəni işğal edən və öz aralarında bölən 4 dövlətdən biri Fransa idi. O zaman da Fransa din amilindən istifadə edərək Türkiyə hesabına süni Ermənistan yaratmaq istəyirdi. Fransızlar daim ermənilərdən alət kimi istifadə etməkdən bəhrələniblər. O zaman Mustafa Kamal Atatürkün rəhbərliyi ilə başlayan azadlıq mübarizəsi Fransanın planlarını pozdu. Fransanın ermənilərlə bağlı indiki siyasəti əvvəlkinin davamıdır. Yəni dəyişən bir şey yoxdur. Fransa Azərbaycanın Qarabağa tam nəzarət etməsinə mane ola bilmədi. Baxmayaraq ki, rəsmi Paris bir neçə dəfə BMT müstəvisində buna cəhd etdi. Fransa, ümumiyyətlə türk dünyasına düşmən münasibət sərgiləyir. Azərbaycanın indiki dövrdə uğur əldə etməsi, ərazi bütövlüyünü tam bərpa etməsi Fransanı narahat edir. Qafqazda dayanıqlı sülh Fransanın maraqlarına uyğun deyil. Fransa Ermənistan məsələsində ona görə aktivdir ki, fransızlarda etnik millətçilik digər Avropa xalqlarına nisbətən çox güclüdür. Çünki tarixən etnik millətçiliyin beşiyi məhz Fransa olub. Fransanın hazırkı siyasətinin kökündə məhz bu amil dayanır. Qafqazda erməni təəssübkeşliyi bundan irəli gəlir. Fransa Avropada elə bir saxta rəy yaratmağa çalışır ki, guya xristian Ermənistan sıxışdırılır. Guya baş verənlərin arxasında din amili dayanır. Hansı din amilindən söhbət gedə bilər ki, müsəlman İran hər zaman erməni tərəfini müdafiə edir? Fransa indi də din bayrağı altında Qərbi Türkiyə və Azərbaycana qarşı körükləmək istəyir. Hazırkı müasir dövrdə separatizmə dəstək verməklə nəyəsə nail olmaq mümkün deyil. Orta əsrlər deyil ki, din adı altında Fransa öz müstəmləkəçilik siyasətini davam etdirsin?! Ona görə də sabiq Fransa prezidenti F.Ollandın çağırışı uğursuzluğa məhkumdur. Azərbaycan əleyhinə düşmənçilik, Ermənistana din adı ilə qahmar çıxmaq onlara zərər verəcək. Çünki bu kampaniyanın heç bir əsası yoxdu”.
Vidadi ORDAHALLI
