Sentyabrın 30-u günorta saatlarında Ermənistan silahlı qüvvələrinin Basarkeçər rayonunun Zərkənd yaşayış məntəqəsi istiqamətindəki mövqeyindən Azərbaycan Ordusunun Kəlbəcər rayonunun Aşağı Ayrım yaşayış məntəqəsi istiqamətində yerləşən mövqeyinə snayper silahından atəş açılıb. Bu barədə Azərbaycan Müdafiə Nazirliyindən məlumat verilib.
Atəş nəticəsində hərbi qulluqçumuz Vüsal Xeybalı oğlu Orucov şəhid olub. Bölmələrimiz tərəfindən cavab tədbirləri görülüb.
Qarabağda mərkəzi hakimiyyətin bərpa edilməsi fonunda Ermənistanın snayper atəşi ilə əsgərimizi şəhid etməsi İrəvanın sərhəd gərginliyinə start verə biləcəyinin anonsu hesab edilə bilər. Ermənistan Rusiyadan uzaqlaşmaq, ölkənin təhlükəsizliyində digər qüvvələrin, xüsusilə Qərb ölkələrinin iştirakçılıq payını artırmaq xəttini tutub, hətta KTMT-dən çıxmaq məsələsini yenidən aktuallaşdıra bilər və bütün bu proses sərhəd gərginliyindən keçir. Paşinyan hakimiyyətinin sərhəddə mümkün eskalasiyada çoxtərəfli marağı nədən ibarət ola bilər?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Ermənistan heç zaman müstəqil dövlət olmayıb: “Onlar ya Rusiyadan, ya Fransadan, ya da diasporadan asılı olub. Ona görə də, ona xaricdən hansı komandanı versələr, onu icra edəcək. Ermənistan hakimiyyəti qərbyönümlüdür və 2020 - ci ilin noyabr sazişindən sonra gözlənilirdi ki, sülh sazişi imzalanacaq. Həm Avropanın, həm Amerikanın, həm Rusiyanın apardığı danışıqları hər dəfə müxtəlif təxribatlarla pozurdu. Təxribartlar iki ərazidə də həyata keçirilirdi. Həm Azərbaycan ərazisində, rus sülhməramlılarının müvəqqəti yerləşdiyi ərazidə separatçılar tərəfindən danışıqlara mane olurdu, həm də Ermənistanla Azərbaycanın sərhədində atəşkəs pozulurdu. Separatçılarla məsələ birdəfəlik həll olundu. Azərbaycan ərazisinin bütövlüyünü və süverenliyini bərpa edib. Bu istiqamətdə xeyli işlər görülüb. Qısa müddətdə dırnaqarası rejimin özünü buraxması, ardınca terrorçuların həbs olunması, Qarabağda yaşamaq istəməyənlərin köçüb getməsi, Azərbaycanın dövlət qurumlarının Xankəndidə fəaliyyətə başlaması, bunlar hamısı böyük işlərdi və onu deməyə əsas verir ki, proses həddindən artıq sürətli gedir. Yaxın zamanlarda bu, bütünlükdə tamamlanacaq. Ermənistanla şərti sərhədə gəldikdə isə, Ermənistan əgər sülh müqaviləsi imzalayıb atəşkəsə tam əməl etməyəcəksə, Türkiyə Suriya ərazisində təhlükəsizlik zonası yaratdığı kimi, Azərbaycan da Qazaxdan Naxçıvana kimi bufer zona yaratmaq məcburiyyətində qalacaq. Bunun alternativ yolu yoxdur. Ermənistan bilməlidir ki, Rusiyaya, İrana, Amerikaya, Fransaya arxayın olub başladığı 35 ildən artıq olan prosesin heç bir nəticəsi olmadı. Əksinə, böyük zərbələr aldı. İndi də bu ağılla, bu məntiqlə getsələr daha böyük zərbələr alacaqlar və Azərbaycan ərazisində qurduqları dövlətin mövcudluğuna son qoyulacaq. Bəllidir ki, bu dövlətin ancaq atributları var. Ermənistan heç vaxt dövlət olmayıb, heç bir müstəqil siyasət aparmayıb. Ona görə də, Azərbaycan dövləti bu məsələ ilə bağlı konkret ölçülər götürəcək. Bu sonsuza qədər belə davam edə bilməz”.
Məhəmmədəli QƏRİBLİ
