Ermənilərin özlərini Qarabağ torpağının "yerli sakinləri" kimi "sübut etmək" üçün 1967-ci ildə Azərbaycan SSR-in pulu hesabına qoyduqları və "Biz və bizim dağlar" adı verdikləri "Tatik və Papik" "abidəsini sonra separatçılar artıq tarixin zibilliyinə atılan "Arsax"ın "simvolu" kimi təqdim etməyə başladılar. Hətta bu, separatçıların "gerbində" də əks olunurdu. Onların xüsusi siyasi məqsədlər üçün qoyduqları bu "abidə" separatizmin simvolu kimi diqqəti cəlb edir.
Hazırda onun taleyi ciddi şəkildə müzakirə olunur. Ermənilərin "Arsax"ın simvolu deyə ayırdıqları bu "nənə-baba", yəni "Tatik və Papik" "abidə"si götürülməlidirmi?
Azərbaycanda ictimaiyyətin müzakirə etdiyi bu məsələyə mövqelər birmənalıdır. Bildirilir ki, o "abidə" də separatçıların özü kimi bu torpaqdan sökülüb atılmalıdır.
"Bu saxta "abidə" götürülməlidir"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli "Bakı-Xəbər"ə şərhində bildirdi ki, "Tatik və Papik" sökülməlidir. "Bu "abidə" erməni saxtakarlığının və separatizminin nümunələrindən biridir. O, 1967-ci ildə necə oldu ki, meydana çıxdı? Şübhəsiz bu, ermənilərin gələcəyə hesablanmış bir addımı idi. Onlar bu "abidə"ni qoymaqla bu torpaqda guya " yerli", "qədim xalq" olduqlarını "sübut etmək" istəyiblər. 1967-ci ildə Azərbaycan SSR-in pulu hesabına belə bir "simvol abidə"ni qoymaqda əsas məqsəd Qarabağı erməniləşdirmək idi. Bilirik ki, o dönəmdə Azərbaycan, xüsusən də Azərbaycanın Qarabağ bölgəsi uzunömürlülərin yaşadığı bölgələrdən sayılırdı. Uzunömürlülər arasında azərbaycanlılar çoxluq təşkil edirdi. Ermənilər bu məsələdən də yararlanmağa çalışdılar. Beləliklə də, "Tatik və Papik" "abidə"sini qoymaqla, guya uzunömürlüləri ifadə edirdilər, əslində isə "Baba və nənə" adlandırdıqları "Tatik və Papik"in məhz buranın "qədim sakinləri" olmasını əsaslandırmağa çalışırdılar"-deyə F. Ələkbərli vurğuladı.
F.Ələkbərlinin sözlərinə görə, " Biz və bizim dağlar" anlayışı da ordan irəli gəlir ki, guya ermənilər "qədim sakinlər"dir, Qarabağ dağları da ermənilərin "dağlarıdır". "Şübhəsiz ki, bu, erməni ideoloqları tərəfindən düşünülmüşdü. Bu "abidə"yə müəlliflik edən də Xocavənddən olan Sarkis Bağdasaryan idi. Bu düşünülmüş şəkildə edilirdi. Məqsəd də Sovet hökumətinin onlara yumşaq münasibətindən istifadə edərək o "abidə"ni qoyub, öz aləmlərində sübut etmək idi ki, bu torpaqlar guya erməni torpaqlarıdır. Əlbəttə," Biz və bizim dağlar" anlayışının Azərbaycan torpağı Qarabağa, türk dünyasına qətiyyən aidiyyəti yoxdur. Yəni erməni düşüncəsini, separatizmi ifadə edən "Tatik və Papik"in bu torpaqda qalması yolverilməzdir. Ermənilərin siyasi və məkrli məqsədlərini ifadə edən "Tatik və Papik" qaldırılmalıdır. Bu saxta "abidə" götürülməlidir. Biz saxta abidələrlə davam edə bilmərik. O artıq ləğv olunmuş, tarixin zibilliyinə atılmış "Arsax"ın "simvolu" sayılırdı və separatçılıq ruhunu ehtiva edir. Bu baxımdan onun qalması uyğun deyil. Qarabağda separatizmin bütün simvolları kimi, "Tatik və Papik" də silinməlidir. Ora türkçülüyün simvolu olan abidələr qoyulmalıdır. Tatiklər, Papiklər bu torpağa 1828-ci ildən sonra gəliblər"-deyə F. Ələkbərli qeyd etdi.
İradə SARIYEVA
