Bircə nəfər erməni tapmırlar ki... Ədalət tərəzisi hələ düzəlməyib... - Aydın QULİYEV yazır...
Ermənidən rus da əl çəkdi, bu toplumun yersiz şivənindən bezdi, gördü ki, bu millətə bir az artıq görüm- baxım eliyəndə idarəolunmaz dərəcədə iştahlanırlar. Ancaq bəzi Qərb qüvvələri hələ də ermənidən üzülmür, onun əsil sifətini görsə də qucağından yerə qoymaq istəmir.
Vətən müharibəsinin bitdiyi ilk aylarda Avropa Birliyi Ermənistana bir neçə milyard dollar yardım ayırmaq qərarı verdi, Azərbaycana isə cəmi bir neçə milyon dollar... Məntiqlə baxanda, 30 illik ağır işğal rejimindən qurtulmuş ölkə olaraq əsas yardımın Azərbaycana göstərilməsi daha doğru olardı... Ancaq Avropanın tərəzisi İrəvana tərəf boylandı...
Postmüharibə dövrünün bu parlaq ədalətsizliyinə biz azərbaycanlılar təəccüblənmədik, çünki görə-görə gəlmişdik. 30 il 1 milyon qaçqın və köçkün saxlayan ölkəyə nə verdilər ki?! İşğalçı ilə bizi bir tutdular, "silaha yaxın getməyin" deyib qollarımızı bağlamağa çalışdılar, altdan-altdan da beynimizə yeritməyə çalışdılar ki, məğlub və zəif olduğunuz üçün ermənilərə güzəşt edin və sair... Bu "parlayan ədalətin" simptomlarını səxavətlə bizim başımıza, milyonlarla dolları isə bizdən qopmaq istəyən ermənilərin başına tökdülər. Ermənilər üçün 2-ci dövləti düzəltmək siyasətinin altında Azərbaycan dövlətini zəif və qorxaq günə salmaq üçün əllərindən gələni etdilər.
Azərbaycanın neftinin, qazının istisində qızınanda da vicdanları oyanmadı. Bir yandan neft-qazımızı, o biri yandan haqqımızı yeməyə başladılar.
Bu illər ərzində Azərbaycan həm onlarla imzaladığı razılaşmalara əməl etdi, həm "bir qarnı ac, bir qarnı tox" vəziyyətdə milyonluq qaçqın-köçkün ordusunu ayaqda saxladı, həm də dünyanın mütləq əksər yerlərində ayaqlar altına atılmış multikultural dəyərlərin möhkəmləndirilməsinə də resurslar sərf etdi. Gözümüzün qabağında monoetnik eksklüziv cəmiyyət quran erməni liderlərinin boğazına korluq verməmək üçün hər şey etdilər.
Bir milyon qaçqın və köçkünlərimizə son 25 ildə 10 milyarddan çox vəsait xərclədik, hansının ki 8-9 milyarddan çoxu Azərbaycanın öz dövlət vəsaitləri idi. Bəzi beynəlxalq maliyyə qurumları isə cüzi kredit yardımları etdilər...
Beləcə, Vətən müharibəsinin və Antiterrorun sonuna gəlib çatdıq.
Dünyanın əyilmiş ədalət tərəzisi yenə düzəlmədi ..Sanki Ədalət ilahəsinin tərəzisini simvol kimi dünyaya bəxş edənlər bunlar deyilmişlər...
Azərbaycanın içində separatizmə son qoyulandan sonra guya "etnik təmizləmə hədəfinə çevrilmiş ermənilərə" humanitar yardım şouları başladı.
Bir milyon azərbaycanlının lüt-üryan, döyə-döyə Ermənistandan qovulmasına susan qərblilər bu gün Qarabağda 40-80 min arasında dəqiq sayları bilinməyən erməni üçün özlərindən gedirlər. Bircə nəfər erməni tapılmır ki, Azərbaycanın onları zorla çıxardığını desin və sübut etsin... Hətta ən çığırğan və yalançılar kimi tanınmış ermənilər də bu anlarda qərblilərdən nisbətən dürüst olmağı bacarırlar. Qərbin siyasi və hüquq müdafiə mərkəzləri "Azərbaycan etnik təmizləmə aparır" deyəcək qədər vicdansız davrandıqları halda köç edən ermənilər reallığı danacaq qədər nadürüstlük göstərmirlər. Sadəcə belə deyirlər: "Bizə deyirlər çıxın, biz də çıxırıq"... Kim deyir sualına isə çarəsiz-çarəsiz çiyinlərini çəkirlər. Çünki dünyanın ədalətsizliyini bəzən heç onlar da anlaya bilmir...
Qarabağdan zorla qovulduğu iddia edilən ermənilərin ətrafında hay-küy dünyanı bürüyüb. Bir vaxtlar təcavüzkarı dəstəkləyən xristian təəssübkeşliyinin, geosiyasi maraqların bu gün daha əcaib yeni təzahürlərini görürük...
Çünki Qərbin ədalət tərəzisi çoxdan əyilib və hələ düzəlməyib...
Çünki bu tərəzini 2500 il əvvəlki dövrün ədalət simvolu kimi dünyaya sırıyan ölkənin özü irticaçı Ermənistanın açıq müttəfiqlərindən birinə çevrilib...
Aydın QULİYEV
