Azərbaycanın ötən həftə Qarabağ üzərində nəzarətini bərpa etməsinin ardınca Birləşmiş Ştatların Cənubi Qafqaz regionundakı humanitar fəaliyyətinin koordinasiyası üçün Fəlakətə Çevik Reaksiya komandası yaratdığını elan edəcəyi gözlənilir.
Reuters agentliyi yazır ki, bu komanda situasiyanı yerində qiymətləndirəcək, lazımi humanitar yardımın miqyasını müəyyənləşdirəcək və təcili dəstəyin verilməsi üçün partnyorlarla birgə işləyəcək.
Bu barədə bəyanatı ABŞ Beynəlxalq İnkişaf Agentliyi – USAID-in rəhbəri Samanta Pauerin verəcəyi deyilir.
Pauerin bəyanatında deyilir:
"Birləşmiş Ştatlar Dağlıq Qarabağdakı əhalinin və Ermənistana qaçmış 50 mindən çox insanın kövrək vəziyyətindən dərin narahatlıq keçirir”.
Pauer Azərbaycanın Qarabağda keçirdiyi əməliyyatdan dərhal sonra Azərbaycana və Ermənistana səfər etmişdi.
Rusiya mediası yazır ki, ABŞ bu bəhanə ilə Cənubi Qafqazdakı hərbi mövcudluğunu təmin etməyə çalışır. Ukrayna müharibəsindən sonra ABŞ Rusiya ilə yaxın olan bəzi ərazilərdə qaynar nöqtələr yaratmaqda maraqlıdır.
Bu baş verə bilərmi?
Hərbi-siyasi ekspert, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, ABŞ, NATO və Rusiyanın dünyanın yeni düzəni uğrunda müharibəsi gedir: “Həmçinin Ukraynadakı informasiya cəbhəsində də yeni ərazilər uğrunda mübarizələrin aparıldığının şahidi oluruq. Ermənistan hazırda ABŞ - ın və Avropa İttifaqının istədiyi yöndədir. Çünki Ermənistan həm Rusiyanın təsiri altından çıxmaq istədiyinə dair mesajlar verir, həm də Cənubi Qafqazda öz çətirlərinə ala biləcəkləri ən uyğun ölkə hesab edilir. Onların hesabları ondan ibarətdir ki, əgər Ermənistan hökuməti bu qərarında qətidirsə, Ukrayna müharibəsi fonunda Rusiya zəif hala gəlib bölgədən çəkilmək məcburiyyətində qalarsa, avtomatik bu boşluğu ABŞ dolduracaq. Uzun illər Əfqanıstanda da bu mübarizə gedirdi, biri çəkilirdi, biri gəlirdi. Eynisini Cənubi Qafqazda, Ermənistan əraziləri üzərində etməyə çalışırlar. Bunu da qüvvələri yavaş - yavaş bölgəyə yerləşdirməklə etmək istəyirlər. İlk öncə Avropa İttifaqının 200 nəfərini gətirdilər. Sonra Ermənistanda ABŞ və Fransa konsulluqları açıldı. İndi də təlim adı altında ABŞ - ın əməliyyat reaksiya qrupları Ermənistana gəlmək istəyir. Niyyətləri budur ki, Ermənistanı gücləndirib Rusiyaya, Türkiyəyə qarşı istifadə etsinlər. Prosesin nə ilə nəticələnəcıyini biz Rusiyanın yanaşmasında görəcəyik. Rusiya bunu Ermənistana elə-belə güzəştə getməz. Ermənistanı Cənubi Qafqazda dövlət kimi yaradan məhz Rusiya olub. Ən azı 100 ildir ki, onu himayə edir. Rusiya iqtisadi cəhətdən də Ermənistana ciddi dəstək verir. Həmin ölkənin qaz, elektrik təminatı da Rusiyadan asılıdır. ABŞ-ın bu addımı regionda yeni gərginliyin yaranmasına səbəb olacaq”.
Məhəmmədəli QƏRİBLİ
