“Amnesty İnternational” gedən erməniləri qaytarmağa çalışır...
Azərbaycan ərazilərindən gedən ermənilərin “hüquqlarının müdafiəsi” məsələsi də Amnesty Internationalın “əsas vəzifəsinə” çevrilib.
Azərbaycandilli erməni saytlarından birinin yaydığı məlumata görə, Amnesty International X səhifəsində (keçmiş Twitter) “Azərbaycan Qarabağdan qaçan və Ermənistanda təhlükəsizlik axtaranların təhlükəsiz keçidini təmin etməli, eyni zamanda etnik ermənilərin öz evlərinə qayıtmaq hüququnu təmin etməlidir”-deyə yazıb və bununla da ermənilərin geri qayıtmasına çalışdığını ortaya qoyub.
- “Ermənilərə müraciətlərdə dəfələrlə, təkrar-təkrar deyilir ki, sizin bütün hüquqlarınız təmin ediləcək, gəlin, Azərbaycan dövlətinin, Azərbaycan cəmiyyətinin bir parçası olaraq yaşayın”
Amnesty Internationalın bəyanatına münasibət bildirən siyasi şərhçi Azər Həsrət “Bakı-Xəbər”ə şərhində “Amnesty International təşkilatı Azərbaycana münasibətdə həmişə öz qərəzi, qeyri-obyektiv mövqeyi ilə seçilib. Azərbaycan bir milyona yaxın qaçqını, köçkünü ilə bağlı susqunluğa üstünlük verir. Onun qarşılığında isə tək bir erməniyə nəsə olanda heç dəxli olmadan bəyanatlarla çıxış edir. İndi ermənilərin Ermənistana köçü ilə bağlı narahatlıq ifadə etməsi, bəyanat verməsi də o qəbildəndir. Baxın, adamlar nə deyir? Deyirlər ki, Azərbaycan ermənilərin hüquqlarını təmin etməlidir. Məgər Azərbaycan dövləti ermənilərin hüquqlarını təmin etməkdən imtina edir ki? Yaxud Azərbaycan dövləti hardasa bəyan edib ki, biz ermənilərin hüquqlarını qorumayacağıq, onlara qarşı qanunsuzluq edəcəyik? Elə şey olmayıb axı. Necə olur ki, Amnesty International təşkilatı bizdən bunu tələb edir?”-deyə bildirdi.
A.Həsrətin sözlərinə görə, ondan başqa bir sıra beynəlxalq təşkilatlar və xarici dövlətlər də Azərbaycandan ermənilərin hüquqlarını təmin etməyi tələb edir: “Bu absurd bir şeydir. Hüquqların təmin edilməsini o halda tələb etmək olar ki, həmin hüquqlar pozulmuş olsun. Azərbaycan dövləti isə heç bir hüquq pozulmasına yol vermir. Üstəlik də, ermənilərə müraciətlərdə dəfələrlə, təkrar-təkrar deyilir ki, sizin bütün hüquqlarınız təmin ediləcək, gəlin, Azərbaycan dövlətinin, Azərbaycan cəmiyyətinin bir parçası olaraq yaşayın. Azərbaycanın bu təkliflərini Amnesty International və başqa təşkilatlar “görmür”, görmək istəmir. Bir xalq deyimimizdə olduğu kimi, dəyirman öz işindədir, çax-çax baş ağrıdır. Bunların əməlləri həmin o “çax-çaxın əməlləridir”. Biz isə Azərbaycan dövləti olaraq öz işimizdəyik və heç kəs də Azərbaycanı hüquq, qanun, özəlliklə də beynəlxalq hüquq çərçivəsində atdığı addımlardan çəkindirə bilməyəcək”.
İradə SARIYEVA
