Baş nazir Nikol Paşinyanı oktyabrın 5-də istefaya göndərmək niyyətində olan Ermənistan müxaliqfəti yenə fiasko ilə üzləşib. Cəmiyyətdə istədiyi dəstəyi ala bilməyən müxaliflərin öz aralarında da fikir ayrılğı dərinləşir.
Baş verənlər barədə “Qraparak” qəzeti də yazır ki, son günlər Ermənistanın müxalifət düşərgəsində ciddi fikir ayrılıqları yaranıb və müxalifətçilər bir-birini ittiham etməyə başlayıblar: “Müxalifətin yaratdığı Milli Komitədə ciddi fikir ayrılıqları yaranıb, onlar bir-birini ittiham edir, ritorikalarını bəyənmirlər. Vazgen Manukyan bitib-tükənməyən yürüşlərlə müxalifətin fəaliyyətini dəyərdən salmaqdansa, konkret addımlar atmağı təklif edib. Amma digərləri məsuliyyəti öz üzərinə götürməkdən qorxaraq qeyd ediblər ki, Paşinyan kürsü uğrunda qan tökməyə hazırdır, lakin bu qan onların üzərində qalacaq. Milli Komitə Avetik Çalabyandan da Paşinyanı tənqid etmədiyinə görə narazıdır və Tevanyanın çıxışında qüsurlar aşkarlayıb”.
Qeyd olunur ki, komitə yaradılsa da, müxalifət bəyanatlarda belə razılaşa bilmir və bu, hakimiyyətin əleyhdarlarının mitinqlərinin təxirə salınmasına səbəb olur: “Milli Komitənin son mitinqin təxirə salınması ilə bağlı qərarı həm müxalifət dairələrində, həm də mübarizə aparan insanlarda böyük narazılıq dalğası yaradıb. İrəvanda, Respublika meydanında keçirilməsi nəzərdə tutulan mitinqə iki-üç saat qalmış komitə mitinqin təxirə salındığını açıqlayıb, açıqlamada niyə təxirə saldıqları ilə bağlı çox zəif arqumentlər təqdim olunub. İnsanlar giley-güzar edirdilər ki, mitinqin ləğv edilməsinin səbəbləri əsassızdır. Belə bir fikir olub ki, belə də olmalı idi, çünki komitənin deməyə sözü yoxdur, çıxışlar, hərəkətlər dejavü yaradır. Son günlər Milli Komitədə ciddi fikir ayrılıqları yaranıb, bir-birini günahlandırıblar”. Erməni ekspert Nazaret Berberyan isə iddia edib ki, baş verən son hadisələr Rusiyanın ssenarisinin iflasa uğradığını göstərir: “Rusiyadan hər şey gözlənilirdi, amma adının baş verən son hadisələrlə əlaqələndirilməsi gözlənilmirdi. İndi rusların böyük dövlət düşüncəsinin sonunu görəcəyik. Rusiyanı hər tərəfdən udacaqlar”. Müxalifətin keçirdiyi mitinqlərə toxunan Berberyan mitinq günlərinin çoxdan keçdiyini deyib: “Bu mitinqlər Robert Köçəryanın son gülləsidir. Küçəni nə qədər pulla saxlaya bilərsən?”. Ermənistanın “Joğovurd” nəşri isə yazır ki, baş verənlər Paşinyan iqtidarının əlini gücləndirir: “Son günlərdə Ermənistanın hakim “Vətəndaş Müqaviləsi” Partiyasının üzvləri ölkədəki vəziyyət, müxalifətin təşkil etdiyi mitinqlər və küçələrin bağlanması ilə bağlı daxili müzakirələr aparıblar. Hüquq-mühafizə orqanlarının hesabatları əsasında vəziyyəti qiymətləndirən partiya üzvləri sakitləşiblər və panika arxada qalıb. Ermənistan polisindən partiyaya məlumat verilib ki, hərəkat sönür. Güc strukturlarının təqdim etdiyi statistik rəqəmlərə görə, hərəkat liderlərin açıq-aşkar addım atmaması səbəbindən “ölür” və bu da xalqın narazılığına səbəb olur. Bu səbəbdəndir ki, son günlər bir neçə günlük sükutdan sonra bəzi hakim partiya üzvləri “Facebook” statusları və bəyanatları səviyyəsində görünməyə başlayıblar”.
Mövcud vəziyyətdə Nikol Paşinyan ona qarşı olan təzyiqləri azaltmaq üçün addımlar atır. Paşinyan, həmçinin, ona qarşı sui-qəsdin hazırlandığı, digər tərəfdən hərbi çevriliş təşkil edildiyinə dair iddialara görə üzərinə təzyiqləri azaltmaq üçün sıx səylər göstərir. O, baş verənlərə görə Rusiyanı ittiham edən bəyanatlar verir. Bu halda Qarabağdan gələn ermənilərlə Ermənistan sakinləri arasında artan qalmaqal da hakimiyyətin lehinə işləyir. Məsələ ilə bağlı “armenianreport” portalında şərhçi Tevos Arşakyan yazır: “Qarabağdan qayıdan ermənilər Ermənistan sakinlərini xəyanətdə ittiham edir, küçənin ortasında onları təhqir edir, eləcə də qarşılıqlı təhqirlər irəli sürülür. Bu günlərdə mən öz gözlərimlə şahid oldum. Ağdərədən gəlmiş bir qadın İrəvanda qulaqcıqla mahnı dinləyən gənc qızı aqressiv şəkildə söydü, bildirdi ki, “sən burda kef edirsən, biz isə əziyyət çəkirik”. Qız isə ona cavab olaraq orta barmağını göstərdi. Qarabağdan gələn bəzi kişilər isə özlərini daha həyasız aparır, onlar Paşinyan və Ermənistan ordusu haqqında təhqirlər səsləndirir, bəziləri açıq-aşkar söyüş söyür. Artıq yemək, ev davaları başlayıb, bildirirlər ki, “Ermənistan onları tək qoyduğu üçün gəliblər və onları yedizdirməyə, evlə təmin etməyə borcluyuq”. “Qarabağ erməniləri” ilə Ermənistan erməniləri arasında parçalanma, qarşıdurma açıq-aşkar hiss olunur”. Sərhçi Qarabağdan Ermənistana qayıdan ermənilərə “bir az yavaşlayın” deyə müraciət edib: “Nə mənim, nə də Ermənistanın digər vətəndaşlarının sizə heç bir borcu yoxdur. Döyüşə, işləyə bilən minlərlə kişi qaçıb Ermənistana gəldi. Qorxaq kimi qaçdılar. Bizi nədə ittiham edirsiniz? Sizin üçün döyüşdük və öldük. Yerablura (müharibədə məhv edilən erməni hərbçilərin basdırıldığı yer-red.) gedin və öz gözlərinizlə görün. Bizim Ermənistanı itirməyə haqqımız yoxdur, biz öz suverenliyimizi Qarabağa görə itirə bilmərik”. Arşakyan qarşıdurmanın sosial şəbəkələrdə daha kəskin xarakter aldığını vurğulayıb. Bütün bunlar fonunda müxalifət, əsasən də “Qarabağ klanı” erməni cəmiyyəti tərəfindən daha çox rədd edilir. Belə vəziyyətdə Paşinyan kürsüsünü daha da möhkəmləndirə bilir.
Nahid SALAYEV
