Ermənistan parlamentinin spikeri Alen Simonyan jurnalistlərin suallarını cavablandırarkən bildirib ki, İrəvan tarixi şansdan istifadə edib sülh bağlamağa hazırdır.
O qeyd edib ki, Azərbaycan Prezidenti İlham Əliyevlə Ermənistan baş naziri Nikol Paşinyan arasında keçiriləcək görüşdə sülh sazişinin imzalanması mümkündür: “İrəvan Bakı ilə sülh müqaviləsi imzalamağa hazırdır. İrəvan bu məsələdə irəliyə doğru addım atılmasını çox istərdi. Biz bu tarixi şansdan istifadə etmək istəyirik. Sülh sazişini imzalamağa çox yaxınıq və buna tarixi fürsətimiz var. Əbədi müharibə heç kimə lazım deyil. Biz buna hazırıq”.
Sülh sazişinin imzalanmasının tezləşdirilməsi ilə bağlı son vaxtlar erməni rəsmilərində bir tələskənlik müşahidə olunur. Ümumən, antiterror tədbirlərindən sonra yaranan yeni reallıqlar fonunda sülh sazişinin imzalanması perspektivlərini ekspertlər necə dəyərləndirir? Ermənistan tərəfi bundan sonra konstruktiv mövqe tutacaqmı?
“Biz bölgəyə sülhün gəlməsi üçün bütün addımları atacağıq, səyləri davam etdirəcəyik”
Sözügedən məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov hesab edir ki, hazırkı Ermənistan hakimiyyətinin siyasəti formal xarakterli olduğu üçün onu əvvəlcədən proqnozlaşdırmaq çox çətindir: “Əslində 2020-ci ildə Vətən müharibəsində qələbədən sonra biz düşünürdük ki, proseslər sülhə doğru gedəcək. Ancaq Ermənistan sülhü yox, müharibəni seçdi. Onlar 44 günlük müharibədən yetərincə nəticə çıxarmadılar. Belə olan halda 2022-ci ilin avqust-sentyabr aylarında Azərbaycan Ordusu düşmənə lokal zərbələr endirdi. 2023-cü ilin 23 aprelində Laçın yolunun başlanğıcında sərhəd nəzarət-buraxılış məntəqəsi quruldu. Əfsuslar olsun ki, bundan da nəticə çıxarmadılar. Belə olan halda ordumuz lokal xarakterli antiterror tədbirləri keçirməyə məcbur oldu. Bütün bunları təhlil edəndə məlum olur ki, Ermənistanın başqa seçimi yoxdur. Erməni rəsmiləri anlayırlar ki, Azərbaycan prosesin sonuna kimi gedəcək. Biz bölgəyə sülhün gəlməsi üçün bütün addımları atacağıq, səyləri davam etdirəcəyik. Ona görə də Ermənistan buna doğru addımlamalıdır və yaranan şəraiti düzgün dəyərləndirməlidir. Onlar bunu dəyərləndirməsələr, yenə də itirən tərəf olacaqlar. Ermənistanın indiyə qədər bunu etməməsinin obyektiv səbəbləri var. Obyektiv səbəbi odur ki, Ermənistan müstəqil dövlət deyil. İrəvanın müstəqil siyasət yeritməməsi, bir sıra hallarda bəzi Qərb dövlətlərinin alətinə çevrilməsi və onların maraqlarını həyata keçirməyə çalışması belə vəziyyətin yaranmasına səbəb olub. Bütün bunlar Ermənistanı müstəqil siyasət yeritməyə qoymur. Ona görə də Ermənistanın sülh sazişi məsələsində nə dərəcədə qərarlı olacağını demək çətindir. Problem ondadır ki, Ermənistan indi də Fransanın, bəzi hallarda da ABŞ-ın sifarişlərini yerinə yetirir. Ona uyğun addımlar atır və belə olan halda da regionda vəziyyət gərginləşir. Ümid edək ki, Ermənistan bu dəfə cığallıq etməyəcək, real addımlar atacaq. Hazırkı mərhələdə bütün məsuliyyət Ermənistanın üzərindədir”.
Vidadi ORDAHALLI
