Rusiya Xarici İşlər Nazirliyi bəyan edib ki, Ermənistan Respublikasının baş naziri Paşinyanın 24 sentyabr müstəqillik mesajı Rusiyaya qarşı qəbuledilməz hücumları ehtiva edir və rəddən başqa heç nəyə səbəb ola bilməz:
“Paşinyanın son addımları bizim əvvəlki qənaətlərimizi təsdiqləyir ki, Qərbdən ilhamlanan və rəsmi İrəvanın təkan verdiyi, ölkəmiz və müttəfiq münasibətlərimiz üçün dağıdıcı proseslər epizodik deyil, sistem xarakterlidir. Ermənistanın inkişafı üçün yeni Qərb vektorunu təyin etmək istəkləri Rusiya Federasiyası və KTMT tərəfindən ciddi izlənilir. Rusiya həmişə müttəfiqlik öhdəliklərinə sadiq qalıb, erməni dövlətçiliyinə hörmətlə yanaşıb və respublikanı heç vaxt seçim qarşısında qoymayıb: bizimlə və ya bizə qarşı. Əminik ki, İrəvan rəhbərliyi qəsdən Ermənistanla Rusiya arasında çoxşaxəli və çoxəsrlik əlaqələri məhv etməyə və ölkəni Qərbin geosiyasi oyunlarının girovuna çevirməyə cəhd edərək çox böyük səhvə yol verir. Əminik ki, Ermənistan əhalisinin böyük əksəriyyəti bundan xəbərdardır”.
Rusiyanın bu rəsmi bəyanatını Ermənistana ünvanlanan sərt ultimatum kimi qəbul etmək olarmı?
Müstəqil siyasətçi Bədrəddin Quliyev “Bakı-Xəbər”ə açıqlamasında bildirdi ki,
Ermənistanın Rusiyanı Cənubi Qafqazdan sıxışdırmaq üçün Qərbin silahına çevrildiyini Moskva açıq bəyan edir: “Bu səbəbdən də Nikol Paşinyanın bu ərəfədə Rusiya ilə belə davranışını strateji səhv kimi qiymətləndirir.
Bununla həm də Moskvanın regionu tərk etmək niyyətində olmadığı bildirilir.
Bir müddət əvvəl Paşinyan Rusiyanın Dağlıq Qarabağdakı sülhməramlı kontingentini də tənqid edərək deyib ki, o, regionu Ermənistanla birləşdirən yeganə yol olan Laçın dəhlizinə nəzarət etmir, baxmayaraq ki, bu, 2020-ci ildə hərbi əməliyyatların sonunda Moskva, İrəvan və Bakı arasında imzalanmış sazişlərdə göstərilib. Rusiya və ona aid nə varsa Ermənistandan sıxışdırıb çıxarmağı qarşısına məqsəd qoyan baş nazir Nikol Paşinyan hədəfinə doğru irəliləməkdədir. Kollektiv Təhlükəsizlik Müqaviləsi Təşkilatının təlimlərindən imtina edib ABŞ-la birgə təlimlər keçirilməsi, Avropa İttifaqı müşahidə missiyasına üstünlük verilməsi də bu istiqamətdə atılan növbəti addım kimi nəzərdən keçirilir. İrəvan Azərbaycanla sərhəddə gərginlik iddiasını ortaya ataraq hər vəchlə Aİ missiyasının Ermənistanda genişlənməsinə çalışır. Bəs görəsən, Ermənistan Rusiyaya qarşı cəbhə açmaqla nəyəsə nail ola biləcəkmi? Bu o qədər də inandırıcı görünmür. Sadəcə, asılılığın miqyası buna imkan verməz. Məsələ ondadır ki, bu cəbhədə Nikol Paşinyan təkdir, ona sadəcə azsaylı Soros komandası dəstək verir. Ölkədə isə Rusiya təsiri altında olan qüvvələr kifayət qədərdir. Məsələn, götürək elə “Vaqner” xüsusi hərbi təşkilatının üzvlərinin Ermənistanda olması barədə xəbərləri. Yayılan məlumatlarda bildirilib ki, hərbi təşkilatın Ermənistanda 3 minə yaxın üzvü fəaliyyət göstərir. Rusiya XİN-in rəsmisi Mariya Zaxarova tərəfindən bu xəbər təkzib edilsə də, onun yayılması təsadüfi sayıla bilməz. Artıq İrəvan hakimiyyət orqanları həmin xəbəri ilk olaraq dövriyyəyə buraxanı həbs edib. Ermənistan öz tarixinin gərgin günlərini yaşayır. Müstəqilliyindən bəri ilk dəfədir ki, ağasına və mövcudluğuna görə minnətdar olmalı olduğu ölkəyə qarşı açıq və ən yüksək formada soyuq müharibə elan edib. Bundan qalib çıxacaq, yaxud növbəti illərdə də Kremlin forpostluğunda qalacaq, bunu zaman göstərəcək”.
Məhəmmədəli QƏRİBLİ
