Son 30-35 ildə özünü Ermənistandan artıq erməni müdafiəçisi kimi göstərən, ermənipərəst bir dövlət kimi tanınan Fransa Qarabağdan köçüb gedən ermənilərə sığınacaq verməkdən, onları qəbul etməkdən imtina edib. Ölkəmizi könüllü şəkildə tərk edən ermənilərin görünür müəyyən bir hissəsi Fransaya, ermənilərin sıx yaşadığı Marsel şəhərinə köçüb getmək istəyirmiş, amma Fransa dövləti buna razılıq verməyib.
Yəni belə bir iddia yayılmışdı və Fransanın Ermənistandakı səfiri Olivier Decottignies Fransanın Qarabağ ermənilərini qəbul etməyə və onlara sığınacaq verməyə hazır olduğuna dair iddiaları rədd edib. O bu barədə öz “X” səhifəsində yazıb .
Onun bu paylaşımı sosial media platformalarında Fransanın Qarabağ ermənilərini qəbul etməyə hazır olduğu və qəbul edəcəyi xəbərindən sonra yayılıb.
Fransa Qarabağdan köçən ermənilərə sığınacaq verməkdən niyə imtina edib?
“…Fransa erməniçiliyi əslində bölgədə qarşıdurmaların davam etməsi istəyinə bağlıdır”
"Türk Dünyası İnfo" İctimai Birliyinin sədri Dəyanət Osmanlı "Bakı-Xəbər"ə şərhində “Fransa 44 günlük Qarabağ müharibəsində və sonrakı müddətdə ermənipərəst mövqeyini ortaya qoyub. İndi də Ermənistanı silahlandırmaqla məşğuldur. Bununla bölgədə gərginliyi saxlamaq, sülh prosesinə mane olmaq niyyətini briruzə verir. Fransa Azərbaycan və Ermənistan liderlərinin Avropa İttifaqının vasitəçiliyi ilə gedən sülh danışıqlarını pozmaq yönündə fəaliyyətindən də qalmır. Fransa Qarabağda erməni separaçılarına dəstək verməklə, Ermənistanı silahlandırmaqla beynəlxalq hüququn norma və prinsiplərini kobud şəkildə pozur. Emmanuel Makron hökumətinin bölgədə sülh və sabitliyə qarşı açıq fəaliyyəti Cənubi Qafqazda nüfuz əldə etməyə hesablanıb”-deyə bildirdi.
D.Osmanlının sözlərinə görə, Fransa ATƏT-in Minsk qrupunun həmsədri olarkən də həmişə münaqişəyə ikili standartla yanaşıb. O xatırlatdı ki, Fransa dünyada daha çox qətliamlar törədən, istismarçı dövlət kimi tanınır və heç zaman ədalət tərəfdarı olmayıb. “Ona görə də Makronun Azərbaycan-Ermənistan məsələsində nümayiş etdirdiyi mövqe təbii ki, birmənalı şəkildə antitürk və ermənipərəst olmalı idi. Prezident İlham Əliyev dəfələrlə Makronun antiazərbaycan mövqeyini, qərəzli bəyanatlarını haqlı olaraq sərt şəkildə tənqid edib. Tamamilə doğru fikir söyləyib ki, Fransa erməniləri belə çox sevirsə, öz daxilində muxtariyyət versin.
Azərbaycanın Qarabağda apardığı uğurlu lokal antiterror əməliyyatları və erməni separatistlərinin təslim olması, ölkəmizin suverenliyini tam bərpa etməsi Fransanı çox narahat etdiyi üçün qarayaxmalara start verib. Sözdə erməni sevgisi sərgiləsə də, Ermənistandakı səfirinin dili ilə bəyan edir ki, Qarabağdan köç edən erməniləri qəbul etməyə hazırlaşmır. Deməli, Fransa erməniçiliyi əslində bölgədə qarşıdurmaların davam etməsi istəyinə bağlıdır. Makron Fransadakı erməni diasporunun, erməni icmasının təsiri altındadır, yəqin ki, onların maliyyəsindən də faydalanır. Hazırda Fransa ictimai-siyasi, milli böhran içindədir, talanlar törədilir, idarəçilik zəifləyib. Belə bir şəraitdə və özü də istismarçı dövlət ola-ola sülhyaratma, demokratiya anlayışı heç cür Fransanın adına şamil oluna bilməz.
Artıq Fransa da, onun prezidenti də beynəlxalq təşkilatlarda demokratik, sülhpərəst imicini itirib. BMT Təhlükəsizlik Şurasının digər üzvləri Fransanı beynəlxalq hüquq normalarına riayət etməyə çağırmalıdır”-deyə D.Osmanlı qeyd etdi.
İradə SARIYEVA
