Xankəndidə separatçı-terrorçu dəstənin sabiq “təhlükəsizlik şurası katibi”, mülki azərbaycanlıların qatili Vitali Balasanyanın Azərbaycan xüsusi xidmət orqanları tərəfindən saxlanıldığı deyilir. Bu barədə “Telegram” kanalları məlumat yayıb.
Balasanyan həbs olunmalıdırmı və o hansı cinayətləri törədib bizə qarşı?
"Balasanyan dinc əhaliyə qarşı soyqırım siyasəti həyata keçirib, bu səbəbdən də hər hansı bir üçüncü ölkədə mühakimə oluna bilməz“
Tarixçi alim, dosent Zaur Əliyev “Bakı-Xəbər”ə açıqlamasında qeyd etdi ki, Xocalıda insanlığa sığmayan vəhşətlər törədiblər. Körpə qızların və qadınların qızıl əşyalarını Serj, kişilərin qızıl əşya və dişlərini isə Vitali toplayıb: “Balasanyan “Daşnaksütyun” partiyasının üzvüdür. Həm qondarma “artsax rejimi”nin, həm də Ermənistanın “xaç qəhrəmanı”dır. 1992-ci ilin əvvəlindən başlayaraq Azərbaycana qarşı döyüşüb. Xocalı camaatını qırıb, hətta şəhid komandirlərimiz Şirin Mirzəyevin və Allahverdi Bağırovun xidməti maşınlarının keçdiyi yollara mina da yerləşdirə bilib və onların öldürülməsinə nail olub. Onu da deyim ki, 1988-ci il 20 fevralda Xankəndi Mərkəzi Xəstəxanasında təcrübə keçən iki azərbaycanlı tələbə qız ermənilər tərəfindən zorlandı. Bundan cəmi iki gün sonra azərbaycanlılar və ermənilər arasında birbaşa qarşıdurma atışmaya çevrildi. Nəticədə iki azərbaycanlı gənc həyatını itirdi. Məhz bu zorlamanın və iki azərbaycanlının qətl edilməsinin başında da bu Vitali dururdu. Bunu özü "News.am” saytına müsahibəsində də etiraf edib. 366 saylı rus motoatıcı alayının köməkliyi ilə dinc insanlara qarşı törədilən vəhşilikdə “əfsanəvi general” ünvanı qazanan Vitali Balasanyan bəşəriyyətin rast gəlmədiyi yırtıcıdır”.
Z.Əliyev bildirdi ki, dünya dövlətləri hər zaman ədalətdən danışır: “İkinci Dünya müharibəsindən sonra yəhudilərə qarşı soyqırım törətmiş insanların hər biri beynəlxalq məhkəmə qarşısında cavab verdi. Sual olunur ki, Azərbaycanın bir bölgəsində dünya dövlətləri, parlamentləri, xarici siyasətçilər tərəfindən tanınmış Xocalı soyqırımı var. Bu beynəlxalq soyqırım anlayışına daxil olacaq bir hadisədir. Xocalı soyqırımının törədilməsində iştirak edən, özü də dəfələrlə müsahibələrində etiraf edib ki, onun bu hadisədə rolu olub. Şahidlərin ifadələri təsdiq edir ki, Serj Sarkisyanla birlikdə Vitali Balasanyan dinc əhaliyə qarşı amansız siyasət yeridib. Balasanyan mediaya açıqlamasında qeyd edib ki, bir qrup Xocalı sakini haqqında məlumat əldə olunmasın deyə onları uçurumun kənarından dağın dibinə tullayıb. Bu cinayətlər konkret olaraq öz dilindən etiraf olunub”.
Z.Əliyev hesab edir ki, Balasanyanda Azərbaycanda mühakimə olunmalıdır. Çünki Azərbaycan Respublikasının vətəndaşıdır. Əsgəran rayonunda anadan olub, ordada qeydiyyatdadır: “BMT və dünya tərəfindən qəbul olunmuş qətnaməyə əsasən Azərbaycanın Respublikasının müstəqilliyinə daxil olan Əsgəran rayonu ölkəmizə aiddir. Vitali Balasanyan hərbi cinayətkardır. Bu şəxs Azərbaycanın və beynəlxalq hüquq normalarını tam şəkildə pozub. Balasanyan dinc əhaliyə qarşı soyqırım siyasəti həyata keçirilib. Bu səbəbdən də hər hansı bir üçüncü ölkədə mühakimə oluna bilməz. Sözügedən şəxs cinayətkardır. Bir və bir çox insanın ölümünə səbəb olmağa, eyni zamanda, konstitusion hüquqları pozduğuna görə sərt şəkildə cəzalandırılmalıdır. Onun cəzası Azərbaycan qanunları çərçivəsində baş verməlidir. Balasanyan Azərbaycan Respublikasının Əsgəran rayonunda anadan olubsa, Azərbaycan vətəndaşı kimi qeydiyyatdadırsa cəzası da bizim hüquq-mühafizə orqanları tərəfindən verilməlidir. Balasanyan yerli qanunlarla cinayətə cəlb olunmalıdır. Onun üçüncü, neytral bir dövlətə verilməsi yolverilməzdir".
Günel CƏLİLOVA
