Belə görünür ki, artıq Ermənistan Kollektiv Təhlükəsizlik Müqaviləsi Təşkilatından çıxmağı qətiləşdirir. Ermənistan parlamentinin üzvü, hakim “Vətəndaş sazişi” partiyasının deputatı Sərkis Xandanyan bəyan edib ki, Ermənistan Respublikasının iştirak etdiyi mexanizmlər işləmir. Bu baxımdan Ermənistan öz təhlükəsizlik mexanizmlərini necə gücləndirəcəyini düşünməlidir.
Xandanyan KTMT-dən çıxmaq iddialarını inkar etməyib. Onun fikrincə, Ermənistan öz təhlükəsizlik mexanizmlərinin qurulması üzərində düşünür. Bununla bağlı bəzi ölkələrlə danışıqlar aparılır və həmçinin orduda islahatlar aparılır. Lakin Xandanyan Ermənistan üçün KTMT-yə alternativ sayıla biləcək yeni təhlükəsizlik sistemləri barədə açıq danışmaqdan imtina edib. Erməni deputat sadəcə rəsmi İrəvanın Fransa və Hindistan kimi ölkələrlə əməkdaşlığı gücləndirdiyini deməklə kifayətlənib.
“Nikol hakimiyyətini qoruya bilsə və Ukrayna müharibəsi uzansa Ermənistanın KTMT-ni tərk etməsi real görünür”
Sözügedən məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli proseslərin inkişaf istiqamətindən asılı olaraq bunu istisna etmədi: “Nikol Paşinyan hakimiyyətini qoruya bilsə, Ukrayna müharibəsi uzansa Ermənistanın KTMT-ni tərk etməsi real görünür. Biz nəzərə almalıyıq ki, Paşinyanın hakimiyyətə gətirilməsi Rusiyanın Ermənistandan çıxarılmasının başlıca tərkib hissəsidir. Yəni onu ona görə hakimiyyətə gətiriblər ki, Rusiyanı ordan uzaqlaşdırsın. Ötən 5 il ərzində Ermənistanda bir sıra ciddi hadisələr və sarsıntılar baş verib. Başlıca hadisə Azərbaycanın 44 günlük Vətən müharibəsində qalib gəlməsinə baxmayaraq, Paşinyanın hakimiyyətini qoruyub saxlaya bilməsidir. Ondan sonra isə Paşinyan bir sıra məsələləri bəhanə edərək KTMT-ni sabotaj edir. KTMT təlimlərinə nümayişkəranə şəkildə qoşulmur, yekun sazişi imzalamaqdan imtina edir. Digər tərəfdən, erməni rəsmiləri müharibədən sonra açıq dedilər ki, Rusiya silahları keyfiyyət baxımından tələblərə cavab vermir. Son dövrlər Ermənistanla Rusiya arasında siyasi gərginlik xeyli artıb. Paşinyandan tutmuş ən yüksək erməni rəsmiləri bəyan edirlər ki, Rusiya ilə birgə təhlükəsizlik mexanizmi Ermənistanın maraqlarına cavab vermir. Bu nə deməkdir? Bu o deməkdir ki, Ermənistan KTMT-yə güvənmir və ölkənin gələcəyini bu təşkilatda görmür. Artıq rəsmi səviyyədə də etiraf edirlər ki, Hindistandan silah alınır. Ermənistan Rusiyanın orbitindən çıxarsa, Fransanın bu ölkənin silahlanmasında iştirak edəcəyi qaçılmazdır. Çünki rəsmi Paris Ermənistanda Rusiyanı əvəzləmək üçün bütün vasitələrdən istifadə etməyə çalışır. Avropa İttifaqının monitorinq missiyasının Ermənistana göndərilməsi və digər məsələlər Fransanın strategiyasına əsasən həyata keçirilir”.
Vidado ORDAHALLI
