ABŞ-ın Beynəlxalq İnkişaf Agentliyinin (USAID) rəhbəri Samanta Pauer Azərbaycanın Qarabağ ermənilərinə qarşı hərəkətlərini etnik təmizləmə adlandırmaqdan imtina edib.
Belə ki, USAID rəhbəri Pauer Azərbaycanı “atəşkəsə riayət etməyə və Dağlıq Qarabağda yerli sakinlərin hüquqlarını qorumaq üçün konkret addımlar atmağa” səsləyib. Daha sonra bunları deyib: “Biz Ermənistana köçmüş insanlarla danışırıq, kimin qayıtmaq və ya qohumlarının məzarını ziyarət etmək istədiyini öyrənirik. Hərəkət azadlığı tamamilə vacibdir”.
Erməni jurnalistin Qarabağda baş verənləri “etnik təmizləmə” saymaq olarmı sualına cavab verməkdən imtina edən, hazırda Ermənistanda olan Pauerin Birləşmiş Ştatların tibbi və digər fövqəladə ehtiyacları ödəmək üçün yeni humanitar yardımını elan etdiyi qeyd edilir.
“Hansı etnik təmizləmədən söhbət gedə bilər ki, Azərbaycan müxtəlif istiqamətlər üzrə ora yardım edir?!”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəylinin fikrincə, ermənilər çalışır ki, ABŞ rəsmiləri də onların yalanlarına ortaq olsunlar: “Əvvəla, Qarabağda baş verən hadisələr Azərbaycanın suverenliyinə, daxili işinə aid olan bir məsələdir. Burada hansısa etnik təmizləmədən söhbət belə gedə bilməz. Söhbət yalnız Qarabağda qanunsuz silahlı birləşmələrin ləğvindən gedir ki, Azərbaycan Ordusu da bunu 24 saata yaxın lokal antiterror tədbirləri nəticəsində həyata keçirib. Onlar da ağ bayraq qaldırıb və mərhələli şəkildə bu proses gedir. Hansı etnik təmizləmədən söhbət gedə bilər ki, Azərbaycan müxtəlif istiqamətlər üzrə ora yardım edir?! Müxtəlif ərzaq məhsulları, yanacaq göndərilir. Xankəndi şəhəri Azərbaycanın elektrik şəbəkəsinə qoşulub. Ona görə də erməni tərəfinin etnik təmizləmə ilə bağlı ortaya atdığı uydurmaların heç bir əsası yoxdur. Birləşmiş Ştatlar rəsmiləri də bunun fərqindədilər. Hesab edirəm ki, bu səbəbdən Samanta Pauer erməni yalanlarına ortaq olmaq istəməyib. Çünki Azərbaycan etnik erməniləri məhv etmək siyasəti həyata keçirmir. Tam əksinə, onlara Qarabağda yaşamaq təklif olunur. Kimin belə bir istəyi varsa, Azərbaycan qanunlarına uyğun burada yaşaya bilər. Ancaq Ermənistan və onn havadarları hər vasitə ilə çalışırlar ki, bu və ya digər formada Azərbaycanın beynəlxalq imicinə xələl gətirsinlər. Ona görə də erməni jurnalistlər Ermənistana səfər edən xarici ölkə rəsmilərinə belə təhrikedici suallar verirlər. ABŞ rəsmiləri və digər xarici ölkə təmsilçiləri etnik təmizləmənin nə olduğunu çox gözəl bilirlər. Onu da gözəl bilirlər ki, Qarabağ erməniləri hansısa etnik təmizləməyə məruz qalmırlar. Bunu bütün dünya görür. Ermənilər isə, hər zaman olduğu kimi, bir sıra məsələləri şişirdib konteksdən çıxarmağa və bundan öz çirkin məqsədləri üçün istifadə etməyə çalışır. Ancaq onların bu cəhdləri bir nəticə verməyəcək”.
Vidadi ORDAHALLI
