Sentyabrın 26-da ABŞ dövlət katibi Entoni Blinken Azərbaycan Prezidenti İlham Əliyevə zəng edib. Telefon söhbəti zamanı, erməni silahlı qüvvələrinə qarşı antiterror tədbirlərindən sonra Azərbaycanın Qarabağ bölgəsində hazırkı vəziyyət ətrafında fikir mübadiləsi aparılıb.
İlham Əliyev 24 saatdan az müddətdə yekunlaşan antiterror tədbirləri zamanı yalnız hərbi obyektlərin hədəf alındığını, mülki əhaliyə zərər verilmədiyini diqqətə çatdırıb. Hazırda qanunsuz erməni silahlı qüvvələrinin tərksilah prosesinin həyata keçirildiyini və onların Azərbaycan ərazisindən çıxarılması işinin həyata keçirildiyini ABŞ tərəfinə bildirib. Son beş gün ərzində yüzlərlə hərbi texnika, silah-sursat və hərbi təchizat mallarının müsadirə edildiyi vurğulanıb. Azərbaycanda akkreditə olunmuş xarici ölkələrin hərbi nümayəndələrinin və BMT-nin Rezident Əlaqələndirici Ofisinin nümayəndəsinin toplanmış silah və hərbi texnikaya baxış keçirdiyi qeyd olunub. Prezident İlham Əliyev Azərbaycanda yaşayan digər etnik azlıqlar kimi Qarabağ bölgəsində yaşayan erməni sakinlərin də hüquqlarının ölkə qanunvericiliyi və beynəlxalq öhdəliklər çərçivəsində təmin edilməsi məqsədilə hazırda müvafiq iş aparıldığını vurğulayıb. Azərbaycan nümayəndələri ilə erməni sakinlərin nümayəndələri arasında reinteqrasiya istiqamətində dialoq aparıldığı, erməni sakinlərə Azərbaycan tərəfindən humanitar yardımlar göndərildiyi, ərazidə infrastrukturun bərpa edildiyi dövlət başçısı tərəfindən qeyd olunub.
Erməni sakinlərə yardımların göstərilməsi istiqamətində Beynəlxalq Qırmızı Xaç Komitəsi (BQXK) ilə əməkdaşlığın həyata keçirildiyi, ölkəmizdə akkreditə olunmuş BMT-nin Rezident Əlaqələndirici Ofisinin yaxın zamanda Azərbaycanın Qarabağ bölgəsinə səfərinin təşkilinə Azərbaycan tərəfinin hazır olduğu diqqətə çatdırılıb.
ABŞ dövlət katibi Entoni Blinken yaranmış vəziyyətlə bağlı narahatlığını ifadə edib, bölgədə sabitliyin təmin edilməsinin, yerli ermənilərlə dialoqun vacib olduğunu bildirib.
Söhbətin məğzindən görünür ki, artıq ABŞ da baş verən prosesi Azərbaycanın daxili işi kimi qəbul edir və Azərbaycan Prezidenti ilə yalnız antiterror tədbirlərinin nəticələri barədə söhbət aparılıb.
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycan 2020-ci ildən sonra sülh üçün saysız-hesabsız addımlar atdı: “Amma Ermənistan adekvat cavab vermədi. Bir deyim var, sözdən başa düşməyəndə güc işə düşür. Bunu da Azərbaycan etdi. Sözdən başa düşməyən Ermənistana gücünü göstərdi. Başa saldı ki, ərazi bütövlüyü necə bərpa olunur. Bu, həm də bütün dünyaya çox gözəl misal oldu. Bu, əslində, Ermənistan üçün əla bir şansdır. Onlar artıq müstəqil qərar verməlidirlər. Artıq onlar özlərinə müstəqil bir dövlət qurmalıdırlar. Kimlərinsə marağına xidmət etməməlidirlər. Bununla regionda daha mehriban bir dövlət ola bilər. Ermənilər qonşuluq əlaqələrini və beynəlxalq əlaqələrini artıq düzgün qurmağı öyrənməlidirlər. ABŞ rəhbərliyi aydın şəkildə görür ki, sovet ittifaqı dağılandan sora Azərbaycan ərazi bütövlüyünü bərpa edən ilk dövlətlərdən oldu. Burada tək hərbi yox, eləcə də diplomatik əlaqələr böyük rol oynayır. Azərbaycan isə bu əlaqələri mükəmməl qurub. İndi ona görə də hər kəs Azərbaycanı ərazi bütövlüyünə qovuşduğu üçün təbrik edir. Azərbaycan bu addımı ilə həm də regional təhlükəsizliyə ciddi önəm verir və onu təmin edir. Bölgənin təhlükəsizliyi bütün dünya üçün vacib əhəmiyyətə malikdir. Bu baxımdan da, ABŞ-ın bu addımlara etitaz etməməsi təbiidir. Regionda yaranmış yeni geopolitik vəziyyət Azərbaycanın mövqelərini tam gücləndirməklə yanaşı, bölgədə sülhün və inkişafın da təminatçısının Azərbaycanın yürütdüyü mükəmməl siyasi kurs olduğunu təsdiqlədi. Bugünkü qüdrətli Azərbaycan öz ərazi bütövlüyünü təmin etməklə yanaşı, bütün Qafqazda sabitliyin qarantı rolunda çıxış edir. Azərbaycan dünya siyasi düzənində bu qarantın ən etibarlı qoruyucusudur. ABŞ da bundan yalnız məmnun qala bilər”.
Məhəmmədəli QƏRİBLİ
