Antiterror tədbirlərindən sonra Qarabağdan ermənilərin Ermənistana köçü başlayıb. Məlum olduğu kimi, ermənilər könüllü şəkildə kütləvi olaraq bizim ərazilərimizi tərk edirlər. Ermənitan hökuməti də bəyan edir ki, onları qarşılamaq üçün şərait yaradılır.
Bəzi məlumatlara görə, Qarabağdan gedən erməniləri məqsədli şəkildə azərbaycanlıların 1988-ci ilə, yəni zorla qovulana, deportasiya edilənə qədər yaşadığı ərazilərə, mahallara, rayonlara yerləşdirirlər.
Bakı Dövlət Universitetinin Erməni Araşdırmaları və Təlim Mərkəzinin direktoru, ermənişünas İsmayıl Tanrıverdi sosial şəbəkə hesabında qeyd edib ki, Ermənistana Qarabağdan gedən ermənilərin 5000 nəfərinin Şirak vilayətinə (Ağbaba-Şörəyel) yerləşdirilməsi nəzərdə tutulub. Məlumdur ki, Ağbaba-Şörəyel mahalları azərbaycanlıların tarixi vətənidir və 1988-ci ilə qədər orada azərbaycanlılar yaşayıb.
Bəzi məlumatlara görə, Qarabağdan gedən ermənilərin Ermənistan hökuməti tərəfindən 1988-1989-cu illərə qədər Azərbaycan türklərinin yaşadığı və zorla qovulduqları bölgələrdə yerləşdirilməsi planı mövcuddur. Yəni onları orada azərbaycanlılara məxsus boş evlərdə yerləşdirirlər. Bununla da Ermənistan dövləti Qərbi azərbaycanlıların qayıdışı prosesinin qarşısını almaq istəyir və buna görə əlavə problem yaradır. Məlum olur ki, onların Qarabağdan erməniləri çəkib aparmasının iki məqsədi var. Birincisi, dünyada hay-küy salmaq ki, bizə qarşı “qətliam edirlər” və sair. İkincisi də Qərbi azərbaycanlıların tarixi evlərində yerləşdirməklə Qərbi azərbaycanlıların qayıtmasının qarşsını almaq üçün onlardan istifadə edirlər. Onların məqsədi odur ki, Qərbi azərbaycanlılar öz yurdlarına qayıtmasınlar.
Aydın Quliyev: “Qarabağdan köçürülmüş erməniləri 88-89-da qovulmuş Qərbi azərbaycanlıların evlərində yerləşdirməklə Qərbi azərbaycanlıların öz ata-baba ocaqlarına qayıtmalarını əngəlləmək istəyirlər”
Qarabağdan ermənilərin Qərbi Azərbaycan mahallarına, kəndlərinə köçürülməsinin səbəblərinə “Bakı-Xəbər” media qrupunun rəhbəri Aydın Quliyev çox maraqlı şərh verib. Rəsmi Feysbuk hesabında “Erməniləri Qarabağdan Yerevana kütləvi daşıyanların 2 məkrli hədəfi - onları qovulmuş azərbaycanlıların evlərində yerləşdirirlər...” sərlöhvəli statusla çıxış edən Aydın Quliyev qeyd edib: “Xankəndi və onun ətrafındakı xunta yuvası dağıdılandan sonra yerində qalan sadə ermənilərin Azərbaycandan köçüb getmələri üçün biz tərəfdən heç bir təzyiq göstərilmədiyi halda, Ermənistan hakimiyyətinin və bəzi başqa qüvvələrin təşkilatçılığı ilə ermənilərin Yerevana kütləvi daşınıb aparıldığı barədə məlumatlar var. Ermənilərin öz mediasında bugünədək 28 minə yaxın adamın Yerevana köçürüldüyü barədə məlumat verilib. Ermənilər özləri Azərbaycandan gedirlər və Paşinyan hakimiyyəti onlar üçün Azərbaycanda birbaşa təhlükənin olmadığı barədə danışmaqla bərabər, çox qəribə məntiqlə onu da deyir ki, azı 40 min ermənini lazım gələcəyi halda Ermənistana təxliyə etmək planlarımız var. Beləliklə, bir tərəfdən təhlükə olmadığını deyirlər, o biri tərəfdən isə özləri erməniləri köçürdüb apararaq " etnik təmizləmə " şivəni qoparırlar...
Bunlar məsələnin yalnız görünən tərəfləridir. Mahiyyətdə isə daha dəhşətli mətləblər var. İndi Azərbaycanda hər kəs bu maraqlı sual üzərində düşünür ki, erməniləri ölkəmizdən qovan olmadığı halda, həyatlarına prezident səviyyəsində təminat verildiyi halda, onlar niyə belə apar-topar daşınıb gedirlər?! Biz onları qovmuruq, təbii ki, əl-ayaqlarına düşüb "qalın" deyə iltimas etmək fikrimiz də yoxdur Lakin bütün ağıllı adamların versiyasına görə, ortada yeni bir məkrli erməni planının elementləri var...
Saysız mənbələri araşdırmağım nəticəsində belə bir məlumata çatmışam ki, Ermənistan hakimiyyəti Qarabağ iqtisadi zonasından daşıyıb apardığı erməniləri 1988- 89- cu illərdə Qərbi Ermənistandan qovulmuş soydaşlarımızın kəndlərində, qəsəbələrində, evlərində yerləşdirir, bunu məqsədyönlü şəkildə təşkil edirlər, hətta Qarabağın erməni sakinlərini bəzən maraqlandırırlar da... Ermənistan hakimiyyətinin bu məkrli əməliyyatının arxasında 2 əsas hədəfin olduğuna əminəm.
1 .Bütün istiqamətlərdə və mövqelərdə total məğlub olmuş "Ermənistançı qüvvələr" (dövlət, diaspor, lobbi və müttəfiq ölkələr) müəyyən müddətdən sonra Azərbaycanı Qarabağda tam etnik təmizləmədə ittiham etmək üçün baza hazırlayırlar .
2.Qarabağdan köçürülmüş erməniləri 88- 89- da qovulmuş Qərbi azərbaycanlıların evlərində yerləşdirməklə Qərbi azərbaycanlıların öz ata-baba ocaqlarına qayıtmalarını əngəlləmək istəyirlər.
Yəqin ki, az sonra Ermənistanın ruporları bağıracaqlar ki, əgər Qarabağda erməni qalmadısa, Ermənistanda niyə azərbaycanlılar olsun?!...”
İsmayıl Tanrıverdi: “Məqsədləri odur ki, Qərbi azərbaycanlıların qanuni haqları olan geri qayıdışlarının qarşısını alsınlar”
Bakı Dövlət Universitetinin Erməni Araşdırmaları və Təlim Mərkəzinin direktoru, ermənişünas İsmayıl Tanrıverdi “Bakı-Xəbər”ə şərhində qeyd etdi ki, Ermənistan hökumətinin məqsədi aydındır, onlar Qərbi azərbaycanlılarının qayıdışına mane olmaz üçün bunu edirlər. “Qərbi Azərbaycan İcması Qərbi azərbaycanlıların öz tarixi torpaqlarına qayıtmasının təmin edilməsi üçün Ermənistana və dünya birliyinə müraciət edib. İcmanın qayıdışla bağlı qərarı da var. Təbii ki, bunun qarşısını almaq üçün Ermənistan müxtəlif vasitələrə əl atır. “Məqsədləri odur ki, Qərbi azərbaycanlıların qanuni haqları olan geri qayıdışlarının qarsını alsınlar. Qarabağdan gedən ermənilərin 1988—ci ilə qədər Qərbi azərbaycanlıların yaşadığı kəndlərdə, mahallarda yerləşdirmək barədə Paşinyan qərar qəbul edib. Təsəvvür edin ki, 3 minə yaxın erməninin Qafan, Zəngəzur bölgəsində yerləşdirilməsi nəzərdə tutulub. Hazılrda Gorusda erməniləri gözləyirlər bölgü aparsınlar ki, hansı bölgədə nə qədər əhali yerlışdirəcəklər. Qarabağdan gedən ermənilərin 10 min nəfərini azərbaycanlıların tarixən yaşadığı Amasya rayonu ərazində yerləşdirəcəklərini qeyd edirlər. Çünki köçürülən ermənilərin əksəriyyəti orada maldarlıqla məşğul olacaq. Ora dağlıq bölgə olduğu üçün Qarabağda maldarlıqla, heyvandarlıqla məşğul olmaq istəyənlərin hamısını ora göndərmək istəyirlər. Azərbaycanlıların geri qayıdışına maneə törətmək üçün Paşinyan hər cür varianta əl atır”-deyə qeyd edən İ.Tanrıverdi bildirdi ki, vaxtilə Qarabağa köçürdükləri erməniləri indi də şirnikləndirib Qərbi Azərbaycana köçürürlər.
İradə SARIYEVA
