Ermənistanda ictimai-siyasi vəziyyət gərgin olaraq qalmaqda davam edir. Müxaliflərin başladıqları aksiyalar davam edir. Ermənistan paytaxtında fəallar küçələri bağlayır, İrəvanın Respublika meydanında mitinqlər davam edir.
Müxalifətin yaratdığı Milli Hərəkatın Koordinasiyası üzrə Milli Komitənin nümayəndələri və onların tərəfdarları sentyabrın 26-da İrəvanda itaətsizlik aksiyalarına başlayıblar. Aksiya iştirakçıları Koryun küçəsini, Abovyan küçəsi ilə kəsişməni, həmçinin sirk binasının yaxınlığındakı kəsişməni bağlayıblar. Vazgen Sarkisyan küçəsi və Gülbenkyan və Komitas küçələrinin kəsişməsi də bağlanıb. Bundan sonra polis onlara qarşı sərt addımlar atıb, ərazidə nəqliyyatın hərəkəti bərpa olunub. Amma müxalifət müxtəlif ünvanlarda itaətsizlik aksiyalarının davam edəcəyini bəyan edir. Xatırladaq ki, sentyabrın 19-dan İrəvanda Qarabağ hadisələri fonunda Ermənistanın baş naziri Nikol Paşinyanın istefası tələbi ilə etiraz aksiyaları keçirilir. Ermənistanın müxalifət liderləri oktyabrın 5-ni Nikol Paşinyanın istefaya göndərilməli olduğu gün kimi elan ediblər. Etiraz hərəkatının liderlərindən Andranik Tevanyanın sözlərinə görə, bütün qüvvələr birləşməlidir ki, oktyabrın 5-də Nikol Paşinyan istefaya göndərilsin: “Heç kim bilmir ki, o, Ermənistan üçün ölümcül olan hansı sənədləri yenidən imzalamağa hazırdır. Biz buna imkan verməməliyik”. Bundan başqa, Ermənistanda parlament müxalifəti respublika hökumətinin hakimiyyətdən uzaqlaşdırılması proseduruna başlamaq niyyətindədir. Müxalifətçi deputat İşxan Saqatelyan bu xüsusda bildirib: “Demək olar ki, bütün müxalifət partiyaları Ermənistandakı vəziyyətlə bağlı iclas keçirib. Biz iki məsələdə qərara gəldik. İlk öncə, əsas məqsədi bu hökuməti hakimiyyətdən uzaqlaşdırmaq olan Milli Komitənin fəaliyyətidir. Artıq yol xəritəsi hazırlanıb. Bu, Paşinyanın istefasına gətirib çıxarmalıdır. Bu xəritə çərçivəsində parlamentdə müxalifət impiçment prosedurunu təşviq etməyə başlayacaq”. Bu arada yayılan fikirlərə görə, müxaliflərə Rusiya tərəfindən dəstək verilir. ABŞ başda olmaqla, Qərb dünyası isə Paşinyanı dəstəkləyir.
Belə vəziyyətdə Rusiyanın İrəvandakı səfiri Anatoli Antonov ABŞ administrasiyası rəsmilərinin Kremlin Ermənistan üçün etibarsız təhlükəsizlik tərəfdaşı olması ilə bağlı bəyanatlar səsləndirməsi fonunda bildirib: “Biz Vaşinqtonu Ermənistanda anti-Rusiya ovqatının süni şəkildə artmasına səbəb olan son dərəcə təhlükəli söz və hərəkətlərdən çəkinməyə çağırırıq”. O, Vaşinqtonu Ermənistanda anti-Rusiya ovqatının süni şəkildə artmasına səbəb olan eyhamlardan çəkinməyə çağırıb: “ABŞ rəsmilərinin bu kimi şərhləri üzücüdür. Əslində, amerikalılar daxili və xarici siyasətdə öz uğursuzluqlarına görə məsuliyyətdən yayınmağa çalışan bəzi erməni siyasətçilərinin qeyri-konstruktiv ictimai bəyanatlarını təkrarlayırlar”. Səfir qeyd edib ki, Rusiya Ermənistanın etibarlı müttəfiqi olub və belə də qalır: “Biz bu qardaş xalqa hər zaman lazımi köməklik göstərmişik, o cümlədən Qarabağa sülhməramlılarımızı göndərmişik. Rusiya əsgərlərinin öz mövqelərində həlak olması faktı yalnız Rusiyanın Azərbaycan və Ermənistan xalqları arasında sülhə nail olmaq üçün çətin qərarlar qəbul etməyə hazır olduğunu göstərir. Bu hadisələr bir daha sübut edir ki, ABŞ və müttəfiqlərinin məqsədi vəziyyətin normallaşması və Cənubi Qafqazın sülh yolu ilə inkişafı deyil, regiondan çıxarmaq üçün Rusiyaya strateji ziyan vurmaq, Avrasiyada qəsdən sabitliyi pozmaqdır”. Ermənistanın müxalifətə yaxın “Qraparak” nəşri isə yazır ki, Rusiya Azərbaycanın da yardımı ilə Paşinyanın mövqelərini laxlatmağa çalışır: “Rusiya Azərbaycanı təkcə siyasi və təhlükəsizlik məsələlərində deyil, həm də informasiya məsələlərində dəstəkləyir. İrəvanda, Respublika meydanında keçirilən dinc aksiyalar Azərbaycan telekanalları ilə də canlı yayımlanıb, bu da Azərbaycanın aksiya yerində jurnalist komandasının olması deməkdir. Bunu ilk görən “Yerkir Media”nın direktoru Baqrat Yesayan dərhal Respublika meydanına çıxaraq, Azərbaycan üçün kimin canlı yayım apardığını öyrənib. Məlum olub ki, Azərbaycanla sinxron iş aparan operatorlar Rusiyanın “Rutply” telekanalının əməkdaşları olan ruslardır. Yesayanla söhbətdə onlar Azərbaycanın onların canlı yayımlarından necə istifadə etməsindən xəbərsiz olduqlarını bəhanə ediblər. Aksiya iştirakçıları, həmçinin, Azərbaycan kanallarının canlı yayımının kəsilib-kəsilməyəcəyini görmək üçün Rusiya operatorlarını canlı yayımı söndürməyə məcbur ediblər. Rusiya operatorlarının canlı yayımları kəsilən kimi Azərbaycanın da canlı yayımları kəsilib. Bunu görən rus operatorlar ərazini tərk edərək gözdən itiblər”. Erməni politoloq Lilit Dallakyan isə qeyd edir ki, Ermənistan artıq geosiyasi çəkişmə mərkəzinə çevrilib. Dallakyanın sözlərinə görə, müttəfiq Rusiya Federasiyasıdırsa, o zaman hesab etmək lazımdır ki, Ermənistanın müttəfiqi yoxdur: “Ermənistan çətin geosiyasi vəziyyətə düşüb, beynəlxalq arenada təkdir. Ermənistan təkcə xarici vektorunu dəyişməməli, həm də aydın xarici siyasət aparmalıdır”. Erməni politoloq müxalifətin nümayişlərinə toxunaraq bildirib: “Müxalifət hakimiyyət uğrunda mübarizə aparır, onların baxışı yoxdur. Onların heç bir baxışı yoxdur, namizədləri yoxdur. Müxalifət uğur qazana bilməyəcək. Xalq çıxış yolu görmür. Üçüncü yeni qüvvənin formalaşmasına ehtiyac var. Bu gün ölkəmizdə bir nəfər hakimiyyətdədir, mən onu qınamıram. Komanda yoxdur”.
Samirə SƏFƏROVA
