Sentyabrın 25-də Ermənistan parlament sədri Alen Simonyan Avropa İttifaqının Ermənistandakı nümayəndə heyətinin rəhbəri Vasilis Maraqosu qəbul edib.
İclasda Azərbaycanın Dağlıq Qarabağa “təcavüzü” və onun törətdiyi “kütləvi cinayətlər” pislənib.
“Bu, region üçün çox çətin vəziyyətdir, lakin Ermənistan və erməni xalqı üçün son dərəcə çətindir”, - Aİ-nin Ermənistankı nümayəndə heyətinin rəhbəri vurğulayıb. A.Simonyan regionda sabitlik və təhlükəsizliyin bərqərar olunmasında Avropa İttifaqının əsas rolunu nəzərə alaraq, Azərbaycanın yeni “təcavüzü” ilə bağlı Aİ rəhbərliyinin məqsədyönlü qiymətləndirmələrini və müraciətlərini yüksək qiymətləndirib. Görüşdə Azərbaycana qarşı beynəlxalq sanksiyaların tətbiqinin zəruriliyi vurğulanıb.
Simonyanın deməyindən belə çıxır ki, Avropa İttifaqının ofis rəhbəri Azərbaycanı təcavüz etməkdə, Qarabağ ermənilərinə böhran yaratmaqda birbaşa ittiham edir. Həmçinin, Simonyan ona belə sərt mövqe sərgilədiyinə görə təşəkkür edib. Aİ-nin Ermənistan ofisi Azərbaycana qarşı düşmənçilik sifarişini birbaşa Brüsseldən aldığı üçün belə davranır.
“Bütün bunlar, əlbəttə ki, Avroittifaqa olan ümidləri sarsıdır”
Məsələ ilə bağlı “Bakı-Xəbər”ə açıqlama verən AMİP funksioneri Əli Orucov bunu istisna etmədi: “Əvvəla, son günlər bəzi Avropa qurumlarının Azərbaycana münasibətdə qərəzli, ədalətsiz mövqedən çıxış etməsi ortadadır. Məsələn, Aİ-nin Xarici İşlər və Təhlükəsizlik Siyasəti üzrə Ali Nümayəndəsi Cozep Borrel son vaxtlar Azərbaycana qarşı ən əsalətsiz mövqedən çıxış edən siyasilərdən biridir. O bəyan edib ki, Qarabağda mülki əhalinin hərbi və ya digər üsullarla məcburi köçkün vəziyyətinə düşməsi halında Avropa İttifaqı sərt cavab verəcək. Həmçinin Borrel BMT-dəki müzakirələrdə Azərbaycana qarşı qərəzli mövqe sərgilədi. Aİ-nin 27 dövləti adından Azərbaycana qarşı bəyanat qəbul etməyə cəhd etdi. Düzdür, bəyanat Macarıstanın veto qoyması səbəbindən qəbul olunmadı, amma Borrelin adından yayıldı. Heç şübhəsiz, bütün bunlar Brüsselin mövqeyinə öz təsirini göstərir. Bu baxımdan Aİ-nin Ermənistandakı nümayəndə heyəti rəhbərinin sərgilədiyi mövqe Brüsseldən gələn təlimata əsaslanır. Mərkəzdən təlimat olmasaydı, Vasilis Maraqos başından böyük qələt etməzdi. Məgər Avroittifaq bilmir ki, Azərbaycan Qarabağda bir günlük hərbi əməliyyatlar yox, lokal xarakterli antiterror tədbirləri həyata keçirib? Avropa təsisatları bir dəfə soruşmurlar ki, Qarabağ separatçılarında bir belə hərbi texnika, ağır silah növləri haradandır? Ümumiyyətlə, Aİ-nin sözügedən məsələdə sərgilədiyi qeyri-obyektivlik heyrət doğurur. Halbuki, Aİ-nin Azərbaycanla Ermənistan arasında münasibətlərin tənzimlənməsi ilə bağlı apardığı vasitəçilik missiyasına böyük inam var idi. Şarl Mişelin vasitəçiliyi ilə aparılan danışıqlarda xeyli məsafə qət edilmişdi. İndi isə Aİ-nin qurumları sanki Fransanın yolu ilə gedirlər. Bütün bunlar, əlbəttə ki, Avroittifaqa olan ümidləri sarsıdır”.
Vidadi ORDAHALLI
