“Ankara bölgədə sülhün bərqərar olması üçün İrəvanın səmimi addımlarını gözləyir”. Bunu Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevlə keçirilən mətbuata bəyanatında bildirib.
O qeyd edib ki, regiondakı vəziyyətin hərtərəfli tənzimlənməsi üçün yeni imkanlar açılıb: “Ermənistanın ona uzadılan “sülh əlini” sıxmasını və səmimi addımlar atmasını gözləyirik. Həmişə vurğuladığım kimi, “sülh prosesində” uduzan yoxdur”.
“Ərdoğan təklif edir ki, Ermənistan “Böyük Ermənistan” xülyasından, işğalçılıq, revanşizm düşüncəsindən əl çəksin”
Türkiyə Prezidentinin Naxçıvandan Ermənistana çağırışı ilə bağlı fikir bildirən millət vəkili Aydın Mirzəzadə “Bakı-Xəbər”ə açıqlamasında qeyd etdi ki, Türkiyə Prezidenti Rəcəb Tayyib Ərdoğanın Azərbaycana səfəri dünyada böyük marağa səbəb oldu: “Bu gün dünya siyasətində Türkiyənin böyük nüfuzu var, bu ölkənin atdığı addımlar gözlənilən olub. Qardaş ölkə hər zaman beynəlxalq birlikdə sülhün bərqarar olması, stabilliyin yaranmasının tərəfdarı olub. Həmçinin, Türkiyə dövlətlər arasında qonşuluq münasibətinin normal olmasını istəyir və buna da töhfələr verir. Türkiyənin Azərbaycanla dostluğu isə ali məqsədlər uğrunda mübarizəni daha da gücləndirir. Rəcəb Tayyub Ərdoğanın Naxçıvana səfəri onun bu bölgəyə verdiyi diqqətdir. Məlumdur ki, Naxçıvan Azərbaycanın əsas hissəsindən kənarda qalmışdı. Naxçıvanın bugünkü inkişafı həm bölgə, həm də Türkiyə üçün əhəmiyyətlidir”.
Millət vəkilinin sözlərinə görə, Türkiyə liderinin bəyanatları çox ciddidir və eyni zamanda, beynəlxalq hüquqa əsaslanır: “Türkiyə və Azərbaycan birlikdə regiona sülh, gələcək üçün birgə fəaliyyət proqramı təklif edir. Ermənistan Azərbaycanla müharibədə uduzsa da, hələ də reallığı qiymətləndirmək, qəbullanmaq istəmir. Hələ də hansısa möcüzənin baş verəcəyini gözləyir. Belə siyasət ilk növbədə Ermənistana ağır zərbələr vurur. Çünki bu ölkəyə investisiyalar yatırılmır. Ermənistan regional layihələrdən kənarda qalıb. Bu ölkə normal siyasi davranış sərgiləsəydi, Azərbaycan və Türkiyənin birgə həyata keçirdiyi siyasətdə öz yerini tuta bilərdi. Bütün bunların olmaması region üçün müəyyən çətinliklər yaradır. Düzdür, Türkiyə və Azərbaycan Ermənistansızda region üçün layihələrini həyata keçirir. Hər iki ölkənin gücü, gördüyü işlər dünyaya bəllidir”.
A.Mirzəzadə onu da əlavə etdi ki, Ərdoğan təklif edir ki, Ermənistan “Böyük Ermənistan” xülyasından çəkilsin. O, işğalçılıq, revanşizmdən əl çəkməyi tövsiyə edir: “Azərbaycanın 24 saatlıq antiterror əməliyyatı bir daha göstərdi ki, bu ölkənin apardığı siyasət iflas olmaq üzrədir. Bu baxımdan Ermənistana yeni düşüncə, yeni yanaşma gəlməlidir. Bu yanaşma regiona sülh, əminamanlıq gətirəcək. Türkiyə və Azərbaycanın təklifləri gündəmdədir. Ermənistanın həmin təklifləri dəyərləndirmək üçün şansı var”.
Millət vəkili son olaraq onu da qeyd etdi ki, Türkiyə liderinin Azərbaycana növbəti səfəri hər iki ölkə arasındakı dostluğun əbədi olduğunu bir daha göstərdi.
Günel CƏLİLOVA
