Ermənistanın forpost olduğu rəsmi bəyan olundu - "ya müstəqillik, ya da qorxaq quberniya"...
Ermənistanın baş naziri Nikol Paşinyan bu günlərdə videomüraciətində bəyan edib ki, ya müstəqil ölkə, ya da kiminsə itaətkar və qorxaq quberniyası olmaq arasında seçim qarşısındadırlar:
"Son illər baş verənlərin dərin mənası bundan ibarətdir: Ermənistan azad, suveren, demokratik ölkə, yoxsa qorxaq quberniya olacaq".
Paşinyanın sözlərinə görə, Ermənistan dinc, inkişaf etmiş, azad və demokratik ölkə olmalıdır:
"Lakin bu yolda biz azad və suveren dövlətə malik olmaq iradəmizi sübut etməliyik və bu yolla gedərək öz həmkarlarımıza hörmətlə yanaşırıq, lakin xalqımız, dövlətimiz, suverenliyimiz və azadlığımıza da eyni hörməti gözləyirik".
Nikol Paşinyan Ermənistanın cəlb olunduğu xarici təhlükəsizlik sistemini təndiq edib və bəyan edib ki, onlar ölkəsinin təhlükəsizliyinin və dövlət maraqlarının qorunmasında effektli deyil.
Paşinyan bununla nə demək istəyir?
Təhlükəsizlik məsələləri üzrə ekspert, müstəqil siyasətçi Elşən Həsənov “Bakı-Xəbər”ə bildirdi ki, əslində Paşinyanın sözlərində həqiqət var:
“Onun hakimiyyətə gəlişinin əsas qayəsi bəlkə də Ermənistanı istər forpost, istərsə də vassal adlandırdığımız dövlət səviyyəsindən beynəlxalq subyektə çevirmək olub.
İqtisadiyyatının 80 faizi Rusiya mülkiyyətində olan, sərhədləri Rusiya qoşunları tərəfindən qorunan, ərazisində Rusiya hərbi bazası olan, dəmiryolu tamamilə Rusiya idarə və mülkiyyətində olan, demək olar ki, Rusiyanın və xaricdə yaşayan erməni diasporasının maliyyələşdirməsi hesabına mövcud olan dövlətdə hansı müstəqillikdən danışmaq olar?
Sadəcə olaraq Paşinyana ağır miras qalmışdı – müharibə mirası. O ya Azərbaycanla davam edən müharibəni bitirməli, ya da real vəziyyətdən çıxış edərək Azərbaycana maksimum təzyiq hesabına da olsa, işğal edilmiş torpaqların əldə saxlanılması şərti ilə “sülh” sənədini imzalamağa vadar etməli idi. Yəni hər hansı bir halda, müharibəni bitirmək lazım idi.
Paşinyanın Şuşaya səfəri zamanı dediyi – Qarabağ, Ermənistandır. Nöqtə! – kimi şüarına Azərbaycan Prezidenti İlham Əliyevin verdiyi – Qarabağ, Azərbaycandır. Nida! – kimi cavab özünü çox gözlətmədi və nəticəsi də artıq bəllidir.
Faktiki olaraq Azərbaycanla keçmişdən miras qalan məsələni danışıqlar yolu ilə həll etməli olan Paşinyan öz siyasi karyerasının bəlkə də ən böyük səhvini etdi. Məsələnin Türkiyə və Azərbaycanla danışıqlar, sərhədlərin açılması, iqtisadi – ticari əlaqələrin genişləndirilməsi hesabına çözülməsi əvəzinə o, yanlış addım atdı. Axı Ermənistanın Rusiya asılığından qurtulmasının əsas yolu ilk növbədə qonşu dövlətlərlə münasibətdən keçirdi. O dövlətlərlə ki, onun iqtisadi – ticari potensialının artmasına səbəb olacaq, bununla da asılılıq dərəcəsini tədricən azaldacaq, cəmiyyətə qurub – yaratmağa stimul verəcəkdi.
İndiki halda adam, demək olar ki, başını itirib və ölkə daxilində ictimai təzyiq altındadır. Amma düşünmürəm ki, bu onun hakimiyyətdən gedişinə səbəb olacaq.
İş ki qaldı Ermənistanda Rusiyanın təsir gücünün azaldılması və qonşu dövlətlərlə sülh şəraitində yaşam tərzinin anladılması məsələsinə, biz artıq bu yolda Ermənistana göstərdiyimiz Dəmir Yumruqla öz töhfəmizi vermişik.
O, indi daha ağıllı tərpənərək olanlardan nəticə çıxarmağa məhkumdur. Öz ölkəsini müstəqil, azad, inkişaf etmiş ölkə olaraq görmək istəyən lider bunu daha səmərəli surətdə həyata keçirmək zorundadır. Əks təqdirdə…”
Məhəmmədəli QƏRİBLİ
