Ermənistanın baş naziri Nikol Paşinyan bəyan edib ki, qondarma “Artsax” sakinlərinin təhlükəsiz yaşaması üçün beynəlxalq mexanizmlər tapılmasa, Ermənistan Respublikası onları ölkədə qəbul etməyə hazırdır: “Bir daha təkrar edirəm ki, "Dağlıq Qarabağ"da aparılan danışıqlar nəticə verməsə, o zaman Ermənistan Respublikası erməni qardaş və bacılarımızı böyük qayğı ilə qarşılayacaq.
Əgər Dağlıq Qarabağ erməniləri üçün real həyat şəraiti və səmərəli müdafiə mexanizmləri yaradılmasa, onlar “öz vətənlərini” tərk etməyə məcbur olacaqlar. Hadisələrin bu cür inkişafına görə məsuliyyət tamamilə etnik təmizləmə siyasəti aparan Azərbaycanın və Dağlıq Qarabağda Rusiya sülhməramlı qüvvələrinin üzərinə düşəcək”.
Azərbaycan rəsmi səviyyədə dönə-dönə bəyan edir ki, ermənilər Qarabağda yaşaya bilər və onların təhlükəsizliyi təmin olunacaq. Paşinyan isə deyir ki, erməni sakinlərin təhlükəsiz yaşaması üçün beynəlxalq mexanizmlər tapılmasa, Ermənistana köçürüləcəklər. Paşinyan Qarabağı Azərbaycanın tərkib hissəsi kimi tanıdığı halda, hansı hüquqa əsasən “beynəlxalq mexanizm”dən danışır?
“Hesab edirəm ki, bu, Paşinyanın uydurduğu və inandığı yalandır”
Məsələ ilə bağlı “Bakı-Xəbər”ə açıqlama verən siyasi ekspert Elşad Həsənovun fikrincə, Paşinyanın bu mövqedən çıxış etməsinin əsası yoxdur: “Paşinyan bir sıra hallarda nə dediyini bilmir. Bundan əvvəl bəyan edib ki, 40 min erməni ailəsini qəbul etməyə hazırdır. İndi də bir sıra məsələləri manipulyasiya edərək, buna “beynəlxalq mexanizm” donu geyindirməyə çalışır. Hesab edirəm ki, bu onun uydurduğu və inandığı yalandır. Çünki Azərbaycan heç bir “beynəlxalq mexanizmə” razı olmayacaq. Ona görə ki, bu bizim daxili işimizdir. Üstəlik, beynəlxalq hüquq da buna icazə vermir. O mənada ki, hər hansı bir ölkə milli azlıqlarla bağlı işi bu formada həll etməyə borclu deyil. Ona görə də Paşinyan söz oyununu oynayır və bu işdə, necə deyərlər, ustadır. O yaxşı bilir ki, Qarabağ erməniləri könüllü şəkildə oranı tərk edir. Azərbaycan üstün tərəf olduğu üçün heç vaxt maraqlı olmaz ki, mülki ermənilər erməni revanşizminin əlində alət olsunlar. Ermənistandan, Qarabağdan azərbaycanlılar zor gücü ilə çıxarıldılar. Onlara belə bir şans tanınmadı. Yaxşı olardı ki, Paşinyan bu barədə bir müqayisə aparsın. Ermənistanda azərbaycanlıları diri-diri dəmir çəlləklərə salıb öldürdülər. Bütün bunlar bizim gözümüzün qarşısında baş verib. Bir nəfər azərbaycanlı öz dədə-baba yurdunda qalmadı. Bu gün Azərbaycan zor gücü ilə Qarabağ ermənilərini deportasiya etmir. Onlar könüllü şəkildə oranı tərk edirlər. Bunun da məsuliyyəti bizim üzərimizdə deyil. Bunun məsuliyyəti 1988-ci ildə Qarabağda separatizmi alovlandıranların və sonra da ərazilərimizi işğal edən Ermənistan hakimiyyətinin böynundadır. Söhbət Levon Ter-Petrosyan, Robert Köçəryan, Serj Sarkisyan və digərlərindən gedir. Ona görə də hansı erməni bizim qanunlarla yaşamaq istəmirsə, çıxıb gedə bilər. Qalanlar isə Azərbaycanın digər vətəndaşları ilə eyni hüquqlara malik olacaq. Artıq bunu beynəlxalq siyasi politoloqlar da bildirirlər ki, Azərbaycanda həyat şəraiti Ermənistandan qat-qat yüksəkdir. Hamıya yaxşı məlumdur ki, Qarabağdakı ermənilər uzun illər idi xuntanın girovuna çevrilmişdilər. İndi məlum olur ki, Araik Arutunyanın həm Ermənistanda, həm də xaricdə otelləri, mülkləri var. Bir sözlə, onlar Qarabağ ermənilərini çapıb talayıblar. Ona görə də Qarabağ erməniləri seçim etməlidilər”.
Vidadi ORDAHALLI
