Ermənilər Paşinyanın Əliyevlə saziş imzalamağa hazır olduğunu bəyan etdilər…
“İrəvan Bakı ilə sülh müqaviləsi imzalamağa hazırdır”. Bu barədə Ermənistan parlamentinin spikeri Alen Simonyan jurnalistlərin suallarını cavablandırarkən bildirib.
O qeyd edib ki, Azərbaycan Prezidenti İlham Əliyevlə Ermənistan baş naziri Nikol Paşinyan arasında keçiriləcək görüşdə sülh sazişinin imzalanması mümkündür.
Spikerin sözlərinə görə, rəsmi İrəvan çox istəyir ki, bu məsələdə irəliyə doğru addım atılsın:
“Biz bu tarixi şansdan istifadə etmək istəyirik. Əbədi müharibə heç kimə lazım deyil. Biz buna hazırıq”.
Sülh sazişinə mane olan amillərdən ən başlıcası Ermənistanın Qarabağ ermənilərinin təhlükəsizliyi ilə bağlı məqamı sazişə salmaq istəməsi idi. Artıq bu məsələ həllini tapıb. Qalmaq istəyənlər qalacaq, getmək istəyənlər isə gedəcək. Bu baxımdan, sülh sazişinin imzalanması tam real görünürmü?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, baş verən son proseslər, Ermənistanın tutduğu mövqe, Ermənistan hökümət nümayəndələrinin, Paşinyan hakimiyyətinin, eyni zamanda erməni parlament spikerinin səsləndirdiyi bəyanatlar bu ilin sonuna kimi Azərbaycanla Ermənistan arasında sülh müqaviləsinin imzalanmasının mümkün göründüyünü söyləməyə əsas verir: “Azərbaycanın öz ərazilərində keçirdiyi lokal antiterror əməliyyatları zamanı da Nikol Paşinyan müəyyən qədər loyal münasibət göstərdi və o, Ermənistanla Azərbaycan arasında deyil, antiterror tədbirlərinin Azərbaycanın öz ərazisində keçirildiyini bildirdi: “Məlumdur ki, əvvəllər Ermənistan Qarabağ separatçılarını dəstəkləyirdi, onları guya hüquqlarını müdafiə etməyə çağırırdı. Bu məsələ də antiterror tədbirləri zamanı yoluna qoyuldu. Qarabağda olan separatçılar, qanunsuz erməni silahlı birləşmələri artıq ləğv olunmaq istiqamətindədir. Ağ bayraq qaldırdılar, silahları yerə qoyub təslim oldular. Müəyyən separatçılar ərazini tərk etməyə çalışırlar. Qarabağ və ətraf ərazilərdə sülhün və təhlükəsizliyin təmin olunması istiqamətində Azərbaycan dövləti çox böyük addımlar atır. Belə olduğu halda biz həm Ermənistan baş nazirinin, həm də Ermənistan parlametinin spikerinin, digər müəyyən loyal siyasi dairələrin açıqlamalarını nəzərə alaraq bildirə bilərik ki, sülh müqaviləsinin imzalanması üçün heç bir maneə yoxdur. Çünki Azərbaycan dəfələrlə bəyan edib ki, biz bölgədə sülh istəyirik. Azərbaycan dövləti qarşısına qoyduğu bu hədəfə də nail olacaq. Ermənistanla Azərbaycan arasında sülh müqaviləsinin imzalanması üçün çox böyük tarixi şans yaranıb. Biz inanmaq istərdik ki, Ermənistan o şansı qaçırmayacaq, Azərbaycanla sülh müqaviləsi imzalayacaq, Azərbaycanın ərazi bütövlüyünü rəsmi olaraq tanıyacaq, sərhədlərimizin delimitasiya və demarkasiya prosesi keçiriləcək. Sonda biz mehriban qonşuluq prinsipini həyata keçirəcəyik. Bu isə Qafqazda üçtərəfli platformanın da yaranmasına, yaxşı mənada bu istiqamətdə böyük nəticələrin əldə olunmasına gətirib çıxaracaq”.
Məhəmmədəli QƏRİBLİ
