Belə fikirlər səslənir ki, Rusiya ermənilərin Qarabağdakı uğursuzluğundan istifadə edərək Paşinyanı devirmək istəyir. Rusiyanın doğrudan da belə planı varmı? Vardırsa, indiki şəraitdə buna nail ola bilərmi? Nail olsa, bunun Azərbaycana hansı ziyanları ola bilər?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Rusiyanın Paşinyanı devirmək planı artıq heç kimdə şübhə doğurmur: “Əvvəlcə Putinin, sonra Lavrovun, xarici işlər nazirinin sözcüsünün Paşinyan əleyhinə verdikləri bəyanatların kökündə məhz bu məqsəd dayanırdı. Bütün günahları Paşinyanın üzərinə atmaq, onun Praqa bəyanatını imzalamasından sonra vəziyyətin bu yerə gəlib çıxmasını sübut etməyə çalışmaq, son nəticədə devrilməsinə nail ola bilmək. Məntiqsiz iddialar irəli sürərək, dövlət rəhbərləri özlərini niyə bu qədər nüfuzdan salırlar? Praqada Paşinyan Azərbaycanın ərazi bütövlüyünü və süverenliyini qəbul etdiyini deməklə Rusiya sülhməramlılarının kənara çəkilməsinimi istədi? Onun bununla heç bir əlaqəsi yoxdu. Hətta Praqada 1991 - ci ilin dekabrında imzalanmış Almatı Bəyannaməsinə istinad var. Yəni artıq 91 - ci ildə bu məsələlər baş verib. Sadəcə bir daha təsdiq olundu. Bunu Pitin də, Lavrov da bilir, Zaxarova da bilməlidir. Əgər Rusiya Paşinyanı devirə bilsə, təbii ki, Azərbaycan üçün ciddi problemlər yarana bilər. Bu, danışıqlar prosesinin də xeyli geriyə atılmasına da səbəb ola bilər. Yaxşı xatırlayırıq ki, Paşinyan özü hakimiyyətə gəldikdən sonra bütün razılaşmalardan imtina etdi və hər şey sıfırdan başladı. Eyni hadisə baş versə, təbii ki, danışıqlar prosesində ləngimə baş verə bilər. Ancaq Rusiyanın Paşinyanı devirmək şansı yoxdur. Çünki məlum oldu ki, onun Paşinyanın yerinə hazırladığı namizəd Ruben Vardanyan erməni cəmiyyətində tam nüfuzsuz bir adamdır. Bundan əvvəlki namizədləri də, Sarkisyan və Köçəryan da eyni duruma düşdülər. Onlar parlament seçkilərində məğlub oldular, Ruben Vardanyan da bələdiyyə seçkilərini daha böyük fərqlə uduzdu. Köçəryan və Sarkisyanın partiyaları parlamentə düşə bildilər, ancaq Vardanyanın dəstəklədiyi “Yaşamaq üçün ölkə “ partiyası bariyeli keçib, İrəvan bələdiyyəsinə düşə də bilmədi. Bu səbəbdən Paşinyanı devirmək qeyri - mümkündür. Digər tərəfdən. Qərb Paşinyanı kifayət qədər ciddi müdafiə edir. Yaxşı bilirik ki, ABŞ səfirliyində olan təqribən 2500 işçinin 1000 nəfərə yaxını hərbiçilərdir. Ancaq onların bu işə müdaxilə etməsinə də ehtiyac yoxdur. Ermənistan polisi və xüsusi təyinatlılar azsaylı etirazçıların qarşısını almaqda çətinlik çəkmirlər. Artıq hamı dərk edir ki, Paşinyanı yıxmaq, onu hakimiyyətdən uzaqlaşdırmaq mümkün olmayacaq və bu nəticə Azərbaycanın da maraqlarına xidmət edir. Biz Paşinyanın hakimiyyətdə qalmasında maraqlıyıq, çox ciddi ümidlər yaranıb ki, oktyabr ayının 5 - də İspaniyada keçiriləcək Avropa siyasi birliyinin növbəti sammitində sülh sazişini imzalamaq mümkün ola bilər. Bu gün də Ermənistan Təhlükəsizlik Şurasının katibinin İspaniyaya yola düşməsi, orda Fransa prezidenti ilə, Almaniya kansleri ilə, Azərbaycan Prezidentinin köməkçisi Hikmət Haciyevlə planlaşdırılan görüşləri sülh sazişi layihəsini hazırlamaq məqsədi daşıyır və Ermənistan parlamentinin sədri də bu sənədin imzalamağın real olduğunu bəyan edib. Mən düşünürəm ki, bu hadisə baş verəcək və İspaniyada sülh sazişi imzalanacaq. Bu da Rusiyanın Cənubi Qafqazda olan imkanlarını xeyli məhdudlaşdıracaq”.
Məhəmmədəli QƏRİBLİ
