Uzun illər separatçılara xidmət edən erməni polislər lokal antiterror tədbirlərindən sonra yollarını dəyişmək yolunu tutublar. Məlumatlara görə, artıq separatçıların polisləri Azərbaycan polisinin tərkibində xidmət göstərmək istəyirlər.
“Mənim şərəfim var” parlament fraksiyasının katibi Tiqran Abramyan öz Facebook səhifəsində yazıb ki, əgər bəzi polislər rəhbərləri ilə birlikdə Azərbaycan polisi sıralarında xidmət etmək qərarına gəliblərsə, bu onların seçimidir, artıq təəccüblənməyə əsas yoxdur. “Biz bunu etiraf edib irəli getməliyik”-deyə o vurğulayıb.
O deyib ki, eyni şey müstəntiqlərə, prokurorlara, Milli Təhlükəsizlik Xidmətinə və artıq özü üçün qərar vermiş hər kəsə aiddir...
Abramyan açıq etiraf edib ki, polislər arasında Azərbaycan qanunlarına tabe olub Azərbaycan polisinin sıralarında xidmət etmək barədə qərar qəbul edən şəxslər var.
“O polislərin belə bir qərara gəlməsi erməni əsilli Azərbaycan vətəndaşlarının reinteqrasiya məsələsinin reallaşmasının təzahürüdür”
“Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə bildirdi ki, keçmişdə separatçılara xidmət edən polislər arasında belə qərar qəbul edənlərin olması gözlənilməz deyildi. Uzun illər xunta rejiminin boyundurğu altında qalmağa məhkum olan bu şəxslərin bu addımı onların özlərinin xilası anlamına gəlir. “Əslində bilirsiz bu nədən qaynaqlanır? Prezident İlham Əliyevin zamanında söylədiyi və artıq beyinlərə həkk olunan bir kəlamı var: “Nəyi necə, nə vaxt etmək lazımdır, bunu mən bilirəm”. Bəzən bizim bəzi siyasi şərhçilərimiz deyirlər ki, 23 saat 58 dəqiqəlik lokal antiterror tədbirləri 44 günlük müharibənin davamı idi. Əsla yox. Belə yanaşmaq olmaz. Qeyd olunduğu kimi, bu lokal antiterror tədbirləridir. Separatizm transmilli mütəşəkkil cinayətkarlığın xüsusilə təhlükəli növlərindən biridir. Bütün dünyada transmilli mütəşəkkil cinayətkarlıq, onun ağır növləri separatçılıq, insan alveri, narkotik vasitələrin qanunsuz dövriyyəsi ilə bağlı mübarizə tədbirləri yekdilliklə tanınan beynəlxalq normalar çərçivəsində həyata keçirilir. Bunlar bu sahədə olan mövcud konvensiyaları qəbul edib, artıq radfikasiya ediblər. Əslində keçmiş separatçıların polislərinin Azərbaycan polisinin sıralarında xidmət etmək istəyi də Azərbaycan dövlətinin məntiqli xarici siyasətinin davamıdır. Ataların çox müdrik bir kəlamı var: “Görünən kəndə bələdçi lazım deyil”. Görünür, ermənilərin də sırasında sağlam düşünənlər. Azərbaycanın öz suveren ərazində qanunlarını bərqərar etməsini, dövlətin öz missiyasını yerinə yetirməsini, bu vacib işin həyata keçirilməsinin zəruriliyini dərk edib qəbullananlar var. O polislər artıq reallığı dərk edirlər və separatçılarla yanaşı dayanmaq istəmirlər.
Təbii ki, separatçıların özbaşnalığı uzun illər davam edə bilməzdi.
Azərbaycan polisi artıq bu ilin sonuna qədər bir sıra yerlərdə öz yurisdiksiyasını bərpa edəcək, dövlətin cinayətkarlıqla mübarizə siyasətinin formalaşdırmasını Qarabağda tam olaraq həyata keçirəcək. Həmin polislər də o siyasətin formalaşdırılmasında iştirak edəcəklər, onun icrasını təmin edəcəklər”.
Ş.Əliyev qeyd etdi ki, Azərbaycan polisinin cinayətkarlıqla mübarizə sahəsində əldə etdiyi uğurları hamı görür və qiymətləndirir. Bizim ölkədə müxtəlif azsaylı xalqların yaşadığını deyən Ş.Əliyev bildirdi ki, onların heç birinin hüququ zərrə qədər tapdanmır, onlara dövlət dəstək verir. “Dəfələrlə bəyan ediliyi kimi, ermənilər də konstitusion hüquq və azadlıqlardan, konstitusion vəzifələrdən faydalanacaqlar, Azərbaycan vətəndaşları kimi bizimlə yanaşı yaşayacaqlar, heç kəs onların hüquqlarını tapdalamayacaq. Erməni polislərin belə qərar qəbul etməsi tamamilə reallığa söykənir və bunun üçün kifayət qədər əsas olduğunu görürlər. Düşünürəm ki, yanılmırlar. Azərbaycan dövləti onların arzularının gerçəkləşdirilməsi ilə bağlı lazımı addımı ata bilər. Ölkə Prezidentinin Qarabağın erməni əhalisi ilə bağlı beynəlxalq tribunalarda da səsləndirdiyi fikirlərə inamla yanaşırlar, etibarları var. Yanılmırlar. Həm də ölkə başçısının Ali Baş Komandan kimi qarşısına qoyduğu məqsədin canlı təcahürünü dərk edirlər. Bu da vəziyyəti tənzimləyən yaşıl yanan bir fənərdir. Düşünürəm ki, sağlam düşüncəli insanlar üçün düşünməyə əsas var. O polislərin belə bir qərara gəlməsi erməni əsilli Azərbaycan vətəndaşlarının reinteqrasiya məsələsinin reallaşmasının təzahürüdür.
Erməni əsilli vətəndaşlarımızın reinteqrasiyasını, onların reinteqrasiyası ilə bağlı Azərbaycan dövlətinin yeritdiyi siyasəti qısqanclıqla qarşılayanlar da çoxdur. Amma bu proses uğurla həyata keçiriləcək”-deyə Ş.Əliyev vurğuladı.
İradə SARIYEVA
