Hay mediası mütəmadi olaraq Azərbaycana qara yaxmaqla məşğul olur, antiazərbaycan ab-havası yaratmaq üçün var gücü ilə gecə-gündüz çalışır. Hay təbliğat maşınının mövzusu 30 ildən çoxdur ki, dəyişməyib, hər gün bir yeni uydurma “ixtira” edib Azərbaycana qarşı yönəldirlər.
Qondarma blokada, “aclıq” şousu ilə uzun müddət ajiotaj yaratmağa çalışan hay təbliğat maşını indi də lokal antiterror tədbirlərinin məqsədini başqa yönə çevirməyə, Azərbaycan xalqına qara yaxmağa cəhd edir. Erməni mediası iddia edir ki, guya Azərbaycanda “erməni uşağını öldürməyə görə 500 dollar pul verilir”. Bu o qədər iyrənc bir iftiradır ki, onu ifadə etməyə söz tapa bilmirsən. Bu iftiranı oxuyanda gözünün qarşısına azərbaycanlı uşaqların başına erməni faşistlərinin gətirdiyi faciələr gəlir. Erməni təbliğatçıları unudurlar ki, azərbaycanlılar, ermənilərdən fərqli olaraq, düşmən uşağına da rəhmlidirlər, uşaq qatili deyillər. Erməni uşağının qatili separatçılar və revanşistlərdir. Azərbaycan Prezidenti dəfələrlə bəyan edib ki, bizim mübarizəmiz erməni xalqı ilə deyil, erməni separatimzi, erməni revanşizmi ilədir. Məgər bu azərbaycanlıların xislətini ifadə etməyə kifayət etmir ki, erməni təbliğatçıları aşırı dərəcədə uydurmalar “ixtira” edirlər?
Bu günlərdə erməni mediasının yaydığı ikinci yalana da diqqətinizi çəkmək istəyirik. Ermənistanın keçmiş ombudsmanı, Tatoyan Fondunun rəhbəri Facebook səhifəsində azərbaycanlılara iftira atıb. Guya o, öz səhifəsində "Azərbaycanda ermənilərə qarşı nifrət və düşmənçilik siyasətinin daha bir sübutunu təqdim edib" .
Tatoyan yaydığı fotoya üzdəniraq bir şərh yazaraq iddia edib ki, guya Azərbaycandakı “ermənifobiyaya obyektiv sübutlardan biri də “Artsaxdan” olan gənc erməni qadının “ləyaqətini təhqir edən şərhlər və zorakılığa çağırışlardır”. Guya azərbaycanlılar hansısa bir erməni qadınını sosial şəbəkələrdə təhqir ediblər və sair.
“Tatoyan kimi simasızların azərbaycanlılara iftira atması qəbuledilən deyil”
Media eksperti Tural Turan “Bakı-Xəbər”ə şərhində bildirdi ki, erməni təbliğat maşını uzun illərdir yalan tirajlamaqla məşğuldur. “Təbii ki, erməni təbliğat maşınının tirajladığı bu iddialar iftiradan başqa bir şey deyil. Hər kəs bilir ki, onların yaydıqları ağ yalandır, heç biri həqiqətə uyğun deyil. Əksinə, ermənilər bu cür təxribatlara, vandalizmə, vəhşət dolu əməllərə imza atıblar. Mən faktlarla deyə bilərəm ki, təkcə yaxın keçmişimizdə onlar bizim nə qədər uşağımızın qatili olublar. 2017-ci ildə iyul ayının 4-də yaş yarımlıq Zəhranın nənəsi ilə birgə ermənilərin atdığı güllədən ölməsi, eləcə də Gəncənin raket atəşinə tutulması nəticəsində uşaqlarımızın həlak olması, Bərdədə, başqa yerlərdə uşaqlarımızın gülləyə tuş gəlməsi faktdır və erməni terrorçuları indiyə qədər onlarla uşağımızı öldürüb. Xocalı soyqırımı zamanı uşaqlarımız şəhid edildi, Qaradağlı faicəsi zamanı uşaqlarımız amansızlıqla qətlə yetirildi. 1991-1992-ci illərdə ermənilərin “Hnçaq” və “Aysor” terror qruplaşmaları pul müqabilində girov götürdükləri uşaqların orqanlarını, əzalarını orqan mafiyalarına satırdılar. Bu, faktlarla təsdiq olunub. Hətta bunlarla bağlı Azərbaycan hüquq müdafiəçiləri dəfələrlə bəyanatlar veriblər. Azərbaycanlılar uşaq qatili deyillər, uşaq qatilləri erməni terrorçularıdır ki, onların cinayətlərini də sübut edən minlərlə fakt var”-deyən T.Turan bildirdi ki, Arman Tatoyan kimi üzdəniraq keçmiş “hüquq müdafiəçi”ləri hər zaman erməni separatçılarının əməllərini dəstəkləyib. Onun bu gün simasızcasına azərbaycanlılara şər atması yolverilməzdir: “Tatoyan kimi simasızların azərbaycanlılara iftira atması qəbuledilən deyil. Belə həssas bir məqamda ara qarışdırmaqla, suyu bulandırmaqla məşğul olan revanşist ünsürlər heç nəyə nail ola bilməyəcəklər. Çünki onların əlində nə dəlil, nə də sübut var, iddiaları əsassızdır, cəfəngiyatdır. Azərbaycanlılar heç zaman uşaqlara, qadınlara qarşı zorakılıq etməyiblər, zorakılıq edənlər erməni cəlladlarıdır ki, bu barədə də kifayət qədər faktlar var. Odur ki, Tatoyan kimilərinin iftiraları yalnız özlərini aldatmaq üçündür”.
Əli TURABOV
