Məlum olduğu kimi, sentyabrın 24-də Xankəndinin Ermənistanın enerji sistemindən ayrılaraq Azərbaycan enerji sisteminə qoşulması təmin edilib. Xankəndiyə elektrik enerjisinin verilməsi erməniəsilli sakinlərin sevincinə səbəb olub. Həmin anın görüntüləri sosial şəbəkələrdə yayılıb.
Qeyd edək ki, bir neçə gün əvvəl Azərbaycanın mərkəzi hakimiyyəti Qarabağ bölgəsinin erməni sakinləri üçün yanacaq göndərib. Yanacaqla dolu 2 avtomobil Xankəndiyə yola düşüb. Bununla da həmin bölgədə yaşayan erməniəsilli sakinlərin problemləri həllini tapir.
“Xankəndiyə elektrik enerjisinin verilməsi orada yaşayan erməni əsilli vətəndaşların sevincinə səbəb olub, çünki…”
Jurnalist Ekspert Mərkəzinin sədri Ceyhun Musaoğlu “Bakı-Xəbər”ə açıqlamasında qeyd etdi ki, Vətən müharibəsindən sonra Azərbaycanın atdığı addımlar, verdiyi qərarlar Cənubi Qafqaza sülh gətirməklə yanaşı, rəzil, çətin vəziyyətdə yaşayan ermənilərin qurtuluşuna da səbəb olacaq. Azərbaycanın qalibiyyəti ermənilərin də qurtuluşu oldu: “Belə ki, onlar olduqca pis vəziyyətdə yaşayırdılar. Istilik, yanacaq, dərman, qida problemləri yaşayırdılar. Ermənistan heç birregional layihəyə qoşula bilmirdi, iqtisadiyyatı yox dərəcəsindədir, dünya dövlətləri Ermənistanı qəbul etmirdi. Həmin ölkənin parlamentində yaşanan hadisələr hər kəsin xatirindədir. Ermənistan hakimiyyəti necə gəldi formalaşıb. Bu səbəbdən də əhali normal yaşamaq üçün azərbaycanlılarla birgə yaşamaq istəyir. Ermənilər xilas olmaq üçün azərbaycanlılardan yardım istəyir. Ümumiyyətlə, xalqlar heç vaxt günahkar olmur. Onları idarə edən hakimiyyət, sistem günahkardır. Nəzərə almaq lazımdır ki, xalq kütlədir. Kütləni hansı tərəfə yönəltsələr ona da qoşulacaq”.
C.Musaoğlu onu da əlavə etdi ki, Xankəndiyə elektrik enerjisinin verilməsi orada yaşayan erməni əsilli vətəndaşların sevincinə səbəb olub. Ermənilər Azərbaycan qanunları altında yaşayacağı üçün sevinir. Çünki bilirlər ki, artıq normal həyat yaşayacaqlar: “Məlumdur ki, bugünə qədər onlar işıqsız, susuz, yanacaqsız qalmışdılar. Azərbaycan tərəfindən yardım edilməsi ermənilərin bugünə qədər hansı şəraitdə yaşadığını göstərir”.
Günel CƏLİLOVA
