Ermənistan 19 yük maşını həcmində “humanitar yardım”ı “Laçın” sərhəd-buraxılış məntəqəsinin qabağına göndərdikdən sonra anlayıb ki, Azərbaycanla razılıq əldə etmək lazım idi.
Qarabağdakı “humanitar böhranın idarə olunması üzrə işçi qrup”un nümayəndəsi Vardan Sərkisyan mediaya açıqlamasında “yüklərin” keçməsi üçün Azərbaycana və Rusiya sülhməramlılarına müraciət edildiyini bildirib.
Ermənistan baş naziri Nikol Paşinyan isə hökumətin iclasında qeyd edib ki, Rusiya sülhməramlılarının və Bakının müsbət reaksiyasını gözləyir. Bununla belə, o, yüklərin göndərilməsində məqsədin əslində Azərbaycanı şantaj etmək olduğunu da bu sözlərlə təsdiqləyib: “Humanitar yüklərin ölkəyə buraxılmaması Bakının Dağlıq Qarabağda soyqırım törətmək niyyəti ilə bağlı qorxuları təsdiq edəcək. Əksinə, Laçın dəhlizinin girişində gözləyən humanitar yüklərin Dağlıq Qarabağa buraxılması regionda sülhün bərqərar olması səylərinə töhfə verəcək, etimad mühitinin yaradılması yolunda müsbət addım olacaq”.
“Paşinyanın şantaj dilində danışması bundan irəli gəlir”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, Ermənistan hakimiyyətinin yük maşınlarından şantaj məqsədilə istifadə edəcəyi gözlənilən idi: “Əvvəla, Ermənistanın bununla bağlı planları bir-bir fiaskoya uğrayır. Azərbaycan aprelin 23-də Laçın yolunun başlanğıcında nəzarət-buraxılış məntəqəsi qurdu. Hay-küy qaldırdılar, heç bir nəticə olmadı. Ən başlıcası, Ermənistanın bununla bağlı Beynəlxalq Ədalət Məhkəməsinə şikayəti əsassız hesab edilərək rədd edildi. Bu, Azərbaycanın çox ciddi uğuru idi. Çünki bu bir daha beynəlxalq hüququn Azərbaycanın tərəfində olduğunu sübut etdi. Bir məqamı qeyd edim ki, Birinci Qarabağ müharibəsi zamanı ərazilərimiz işğal olundu. Dünyanın gözü qarşısında haqsızlığa məruz qaldıq. O zaman heç bir aparıcı dövlət, beynəlxalq təşkilat Azərbaycanın yanında deyildi. Bizim xeyrimizə olan yeganə amil beynəlxalq hüququn ölkəmizin tərəfində olması idi. Çünki dünya tərəfindən tanınan ərazilərimiz işğal olunmuşdu. Azərbaycan məhz beynəlxalq hüquqa dayanaraq mübarizəyə başladı. BMT Təhlükəsizlik Şurasının qəbul etdiyi məlum 4 qətnamədən çıxış edərək Vətən müharibəsində ərazi bütövlüyünü bərpa etdi. Bunlar olmasaydı çətin olardı və haqlı olduğunuz halda haqsız duruma düşə bilərdik. Ona görə də Paşinyan yaxşı bilir ki, beynəlxalq hüquq Azərbaycanın tərəfindədir. Bu səbəbdən güc yoluna əl atmaq nə nəzəri, nə də paraktiki baxımdan Ermənistan üçün yaxşı nəticələnməyəcək. Çünki Azərbaycan 30 il əvvəlki dövlət deyil. Belə olan halda Azərbaycanı etnik təmizləmə adı altında tələyə salmaq istəyirlər. Yük maşınlarının sərhəddə toplanması da bunun tərkib hissəsidir. Bəs, ay aman, guya Azərbaycan Qarabağ ermənilərini blokadada saxlamaqla açından qırır. Paşinyanın şantaj dilində danışması bundan irəli gəlir. Ancaq əminəm ki, bu kimi təhdid və şantaj xarakterli işlər işə yaramayacaq. Ermənilər Ağdam yolundan istifadə etməyə məcbur olacaqlar”.
Vidadi ORDAHALLI
