ABŞ, Almaniya, Böyük Britaniya və Fransanın Azərbaycandakı səfirlikləri Qubad İbadoğlunun həbsi ilə bağlı birgə bəyanat yayıb. Bu barədə ABŞ-ın Azərbaycandakı səfirliyinin iyulun 27-də yaydığı məlumatda deyilir:
"Biz hörmətli beynəlxalq səviyyəli alim Dr. Qubad İbadoğlunun iyulun 23-dəki həbsini yaxından izləyirik. Azərbaycanın öz vətəndaşlarının, o cümlədən Dr. İbadoğlunun əsas azadlıqlarını və insan hüquqlarını Azərbaycan konstitusiyasına və beynəlxalq öhdəliklərinə uyğun olaraq müdafiə etməsi çox vacibdir.
Biz Azərbaycan hökumətini Dr. İbadoğlunun dərman vasitələrin təminatı və ədalətli məhkəmə prosesi daxil olmaqla, insan hüquqlarına hörmətlə yanaşmasına təmin etməyə çağırırıq".
Hüquqi aspektdən bu bəyanatı nə dərəcədə əsaslı saymaq olar?
Hüquqşunas Şəmsəddin Əliyev “Bakı-Xəbər”ə açıqlamasında inkişaf etmiş dövlətlərin Azərbaycanda olan fövqəladə və səlahiyyətli səfirlərinin bu açıqlamasından Azərbaycan vətəndaşı kimi narahat olduğunu bildirdi: “Onların müraciətində bir məsələ xoşuma gəldi ki, Azərbaycan vətəndaşı olan Qubad İbadoğlunu hörmətlə yad edirlər. Amma bir hüquqşunas kimi iradlarım odur ki, onlar müraciətlərində insan hüquqlarının Azərbaycan Konstitusiyası və beynəlxalq öhdəliklərə uyğun olaraq müdaxilə etməsini xatırladırlar. Amma demək istəyirəm ki, Azərbaycan Respublikasının Konstitusiyasının 12 - ci maddəsində Azərbaycan dövlətinin ali məqsədi insan hüquq və azadlıqlarının təmin edilməsidir. Ancaq burada başqa nüanslar var. Dövlətə mənsub olan vətəndaş cinayət qanunvericiliyi ilə qadağan olunmuş müəyyən cinayət əməllərinə, ölkənin təhlükəsizlik konsepsiyasına zidd davranırsa, burada Azərbaycan dövləti Cinayət Məcəlləsinə uyğun addımlar atmalıdır. Burada istintaq gedir, hər halda istintaq sirri var. Onlar sıradan adam deyillər, fövqəladə səfirlərdir. Onlar bilməlidirlər ki, istintaq zamanı istintaqa müdaxilə etmək, psixoloji təzyiqlər göstərmək qadağandır. Onların istintaq gedə - gedə tutulan şəxlərlə bağlı 4 aylıq həbs qərarına şübhəylə yanaşmasının özü Azərbaycan vətəndaşında bir hiddət yaradır. Digər narahatlıq doğuran məsələ ondan ibarətdir ki, Azərbaycanda tanınmış jurnalistlər də Qubad İbadoğlunun müdafiəsinə qoşulurlar. Qubad İbadoğlu sıradan, adi cinayətlə ittiham olunmur. FETÖ təşkilatı ilə, mütəşəkkil bir dəstə ilə əlaqəli olduğu vurğulanır. FETÖ Türkiyədə 2016 - ci ildə dövlət çevrilişinə cəhd etmiş terror təşkulatı kimi tanınan mütəşəkkil bir dəstədir. 2023 - cü ilin iyul ayının son günlərində Qubad İbadoğlu və bir sıra Azərbaycan vətəndaşlarının da saxlanması, onlar haqqında həbs - qətimkan qərarının verilməsi də təsadufi deyil. Amma mənim bir Azərbaycan vətəndaşı, müharibə veteranı kimi ABŞ - ın, Böyük Britaniyanın, Fransanın Azərbaycanda olan yüksək personalarına suallarım var. 30 il ərzində Azərbaycan ərazisi işğal olunanda, soyqırıma məruz qalanda niyə bu dövlətlər heç bir bəyanat səsləndirmədilər? Burda da beynəlxalq normalar kobud şəkildə pozulub. BMT - nin nizamnaməsi, Təhlükəsizlik Şurasının qəbul etdiyi 4 qətnamə dəfələrlə pozulanda heç kim səsini çıxarmadı. Təbii ki, Zəfər günündən bugünə kimi Ermənistanın minaladığı Azərbaycan ərazilərində yüzlərlə insan tələf olub. Bütün bunlar hamısı Azərbaycan vətəndaşlarında ikrah yaradıb. Əgər xatırlayırsızsa, Azərbaycanın işğaldan azad olunan ərazilərinə, xüsusilə Şuşa şəhərinə diplomatik missiyaların səfəri təşkil edilirdi. Həmin səfərdən imtina edən məhz bu bəyanatı verən ölkələr idi”.
Qubad İbadoğlu iyulun 23-də Baş Mütəşəkkil Cinayətkarlıqla Mübarizə İdarəsi tərəfindən saxlanılıb. Daxili İşlər Nazirliyi siyasətçinin ABŞ-da yaşayan türk din xadimi Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.
İyulun 24-də Nərimanov Rayon Məhkəməsi Qubad İbadoğluna qarşı Cinayət Məcəlləsinin 204.3.1 (Saxta pul və ya qiymətli kağızlar hazırlama, əldə etmə və ya satma; mütəşəkkil dəstə tərəfindən törədildikdə) maddəsilə ittiham irəli sürüb. Siyasətçi barəsində 3 ay 26 gün müddətinə həbs qətiimkan tədbiri seçilib.
Məhəmmədəli QƏRİBLİ
