Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev AB ölkələrinin, həmçinin Türkiyə, ABŞ və İsveçrə səfirlərinin iştirakı ilə keçirilən görüşdən sonra tvitterdəki paylaşımında bildirib ki,
Ermənistan Azərbaycana qarşı ərazi iddialarına son qoymalı, qüvvələrini Azərbaycanın Qarabağ bölgəsindən çıxarmalı və qanunsuz marionet rejimi maliyyələşdirməyi dayandırmalıdır.
H.Hacıyev qeyd edib ki, Ermənistan tibbi evakuasiya və çatdırılma üçün istifadə edilən Laçın yolu məsələsində siyasi manipulyasiya və spekulyasiya ilə məşğuldur. Xankəndidəki separatçıların marionet “liderləri” yerli əhalini öz siyasi ambisiyalarının girovu kimi saxlayırlar.
Prezidentin köməkçisi xatırladıb ki, Brüsseldə Ağdam-Xankəndi yolunun daha böyük həcmdə çatdırılma üçün istifadə edilməsi barədə razılıq əldə olunub. Bu, BQXK-nın bəyanatında da təsdiqlənib.
"Təkcə Laçın yolundan istifadə etməkdə israrlı olmaq, amma Ağdam yolundan imtina etmək, yolu bağlamaq, siyasiləşdirmək yolverilməzdir. Beynəlxalq ictimaiyyət Ağdam-Xankəndi yolundan istifadə edilməsi və Qarabağın erməni əhalisinin Azərbaycana reinteqrasiyası ilə bağlı aydın ismarış verməlidir. Başqa yol yoxdur! Oyun bitdi!".
Ermənistanın xüsusi tapşırıqlar üzrə səfiri Edmon Marukyan isə Ermənistan İctimai Televiziyasının efirində bildirib ki,
Azərbaycan Prezidentinin köməkçisi Hikmət Hacıyevin yaydığı məlumat həqiqəti əks etdirmir. O bildirib ki, Qarabağdakı ermənilərə ərzaq tədarükü üçün Ağdam-Stepanakert yolunun istifadəsinə dair razılaşma olmayıb.
Marukyanın sözlərinə görə, 9 noyabr 2020-ci il tarixli üçtərəfli bəyanata əsasən, Ermənistanı Dağlıq Qarabağla birləşdirən yeganə yol var - bu, Laçın yoludur.
Maraqlıdır ki, əsl “ağ yalan”ı elə Manukyanın özü danışır. Çünki iyulun ayının 15-də keçirilən görüşdən sonra Şarl Mişelin verdiyi bəyanatlardakı cümlələrdən biri bu idi ki, Ağdam-Xankəndi yolu ilə təminatın daşınması ilə bağlı məsələ də müzakirə olunub. Deməli, razılaşma olub ki, Şarl Mişel belə fikir səsləndirib. Deməli, məntiqlə həmin danışıqlarda iştirak edən Hikmət Hacıyev tam doğru danışır. Əsl yalanı isə danışıqlarda ümumiyyətlə iştirak etməyən Manukyan danışır.
Məhz bu mövzu ilə bağlı Manukyanın Hikmət Hacıyevi təkzib edib dirəniş göstərməsinin əsl səbəbi nədir?
Politoloq Elşən Mustafayev “Bakı-Xəbər”ə açıqlamsında bildirdi ki, Ermənistan tərəfindən bu gün "Laçın" dövlət sərhədinin buraxılış məntəqəsinin əks tərəfinin girişində müxtəlif nəqliyyat vasitələrinin toplanması ilə təşkil ediləcək aksiya Azərbaycana qarşı növbəti təxribat kimi dəyərləndirilir: “Bu təxribatın qarşısının alınması üçün Ermənistanın hüquq-mühafizə orqanlarının heç bir addım atmaması, bu aksiyanı qanunsuz elan etməməsi və aksiyanın keçirildiyi yerə Ermənistan polisinin gətirilməməsi bir daha onu göstərir ki, aksiya Ermənistan hakimiyyəti tərəfindən dəstəklənir. Əvvəl biz Laçın yolu ilə Zəngəzur dəhlizi arasında bərabərlik qoyulan bəyanatların şahidi olurduq, amma zaman göstərdi ki, Azərbaycanın bu addımı situativ gedişdir və perspektivdə ümumilikdə Laçın yolunda dəhliz məntiqinin aradan qaldırılmasına hesablanıb. Artıq “Zəngəzur dəhlizi yoxdursa, Laçın dəhlizi də yoxdur” tezisi işləmir. Azərbaycan bəyan edir ki, Laçın dəhlizi deyilən məfhum yoxdur, ora sadəcə yoldur.
Laçın yolunda sərhəd-buraxılış məntəqəsinin quraşdırılmasından sonra erməni hərbi-siyasi elitasının olan-qalan ümidləri də puça çıxdı. Laçın postu ətrafında ermənilərin TIR şousundan bir gün qabaq Moskvada Azərbaycan, Ermənistan və Rusiya XİN başçıları arasında keçirilən növbəti görüşə nəzər salmağımız faydalı olar. Bu görüşə kimi Bakıya diş qıcayan, Azərbaycanla diplomatik münasibətləri yenidən gərginləşdirməyi gözə alan Moskva valı yenə dəyişdi. Demək olar ki, bu Moskva görüşündə Bakının gündəliyi qəbul olundu. Lavrovun bəyanatında bunu daha aydın sezmək oldu.
Çünkü bu hadisəyə kimi Azərbaycan dəfələrlə bəyan edib ki, Rusiya sülhməramlılarının müvəqqəti yerləşdiyi ərazilərə malların daşınması üçün Ağdam-Xankəndi yolu istifadə oluna bilər. Yolun texniki və təbii göstəriciləri, xüsusilə işğaldan sonra yenidən qurulmaqda olan Bərdə-Ağdam yolu malların daha sürətli və səmərəli şəkildə çatdırılmasına imkan yaratdığı halda, özünü qondarma rejimin təmsilçiləri adlandıran şəxslərin bu yoldan istifadədən imtina etmələri tamamilə absurd qərardır, başadüşülən deyil. Avropa masasında məsələ müzakirə olunmasaydı, mediaya bu mövzu ilə bağlı açıqlama verilməzdi”.
Məhəmmədəli QƏRİBLİ
