Ən yüksək səviyyədə Hindistanın Ermənistanı silahlandırması barədə məlumatlar yayılır. Artıq Azərbaycan rəsmi səviyyədə buna münasibət bildirib.
Prezidentin köməkçisi - Azərbaycan Respublikası Prezidenti Administrasiyasının Xarici siyasət məsələləri şöbəsinin müdiri Hikmət Hacıyev Hindistanın ölkəmizdəki fövqəladə və səlahiyyətli səfiri Sridharan Madhusudhanan ilə görüşündə qeyd edib ki, Azərbaycanın Ermənistanla sülh sazişi üzrə danışıqlar apardığı bir vaxtda Hindistanın bu ölkəyə öldürücü silahlar tədarük etməsi Ermənistanın militarizasiyasına və vəziyyətin gərginləşməsinə yol açır və Cənubi Qafqaz regionunda davamlı sülhün və təhlükəsizliyin bərqərar olmasına maneələr törədir. Bu, həm də Hindistanın özünün bəyan etdiyi beynəlxalq hüququn norma və prinsiplərinə əsaslanan xarici siyasəti, eləcə də bu ölkənin də təmsil olunduğu Qoşulmama Hərəkatının tarixi “Bandunq prinsipləri” ilə uyğun gəlmir.
Maraqlıdır, Hindistanın Ermənistana silah verməsi davam edərsə, rəsmi Dehli bunu dayandırmasa sözügedən məsələni hansısa formada Qoşulmama Hərakatı müstəvisində müzakirəyə çıxarmaq olarmı? Bununla bağlı Hərəkatın növbədənkənar toplantısı çağırıla bilərmi?
“Ölkəmiz Hindistanla bağlı məsələni Qoşulmama Hərəkatı müstəvisinə çıxara bilər”
Sözügedən məsələyə aydınlıq gətirən AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə açıqlamasında bununla bağlı bir sıra məqamlara toxundu: “Hindistanın Ermənistana silah verməsi, prinsipcə, yeni bir şey deyil. Sadəcə olaraq Azərbaycanda hind xalqına, mədəniyyətinə böyük hörmət olduğuna görə, bu uzun müddət diqqətdən kənarda qalıb. Hindistan indiki dövrdə ən təcavüzkar, aqressiv siyasət yeridən ölkələrdən biridir. Nüvə silahlarının məhdudlaşdırılması ilə bağlı böyük dövlətlərin imzaladığı sənədlərə baxmayaraq, Hindistan nüvə silahı da əldə edib. Azərbaycana dost və qardaş ölkə olan Pakistana isə düşmən ölkədir. Hindistanda Kəşmir problemi var və Pakistana qarşı ərazi iddiaları ilə çıxış edir. Tarixən Hindistanın SSRİ və onun varisi olan Rusiya ilə yaxın əlaqələri olub. Pakistandan fərqli olaraq, Qərb ölkələrinə qarşı düşmən siyasət yeridib. Bu da ona gətirib çıxarıb ki, Hindistan Ermənistanın silahlanmasında fəal iştirak edir. Buna qarşı Azərbaycan bütün vasitələrdən istifadə etməlidir. Həm də Qoşulmama Hərəkatı xətti ilə. Çünki Hindistan həm Qoşulmama Hərəkatının üzvüdür, həm də bu Hərəkatın yaradıcılarından biridir. Üstəlik, beynəlxalq sənədlərə görə, qadağan olunmuş silahların təcavüzkar dövlətə verilməsi olmaz. Məlumdur ki, silah satışı ilə məşğul olan böyük şirkətlər var. Onlar bir sıra ölkələrdə olduğu kimi, Hindistanda da fəaliyyət göstərirlər, amma silahları hər ölkəyə satmaq olmaz. Bununla bağlı məhdudiyyətlər var. Təcavüzlə məşğul olan dövlətlərə silah satışı qadağandır. Hindistan isə bu siyasəti pozur və bununla bağlı açıq siyasət yeridir. Ona görə də Azərbaycan Hindistanla bağlı məsələni Qoşulmama Hərəkatı müstəvisinə çıxara bilər. Çünki Hindistanın bu addımı Qoşulmama Hərəkatının tarixi “Bandunq prinsipləri”nə uyğun deyil. Məlum olur ki, Hindistan Ermənistana silah verməklə bu prinsipləri pozur. Biz onu da nəzərə almalıyıq ki, bu ilin sonuna qədər Qoşulmama Hərəkatına Azərbaycan rəhbərlik edəcək. O üzdən, sözügedən məsələnin müzakirəsi ilə bağlı imkanlar var”.
Vidadi ORDAHALLI
