Hazırda ölkəmizin qarşısında duran əsas vəzifələrdən biri ötən il 44 günlük Vətən müharibəsində işğaldan azad olunan ərazilərə Böyük Qayıdışı təmin etməkdən ibarətdir. Respublikamız müharibənin başa çatmasından az vaxt ötməsinə baxmayaraq, bəhs olunan ərazilərdə bərpa və zəruri infrastrukturun yaradılması tədbirlərinə başlayıb.
Azərbaycan Prezidenti İlham Əliyevin rəhbərliyi və bilavasitə nəzarəti ilə işğaldan azad olunmuş ərazilərdə Böyük Qayıdış üçün bütün zəruri tədbirlər görülür. Diqqətəlayiq haldır ki, Prezident İlham Əliyev vaxtaşırı işğaldan azad olunmuş ərazilərə gəlir və burada görülən işlərlə yerindəcə tanış olur.
İşğaldan azad edilmiş şəhər və kəndlərimizə, o cümlədən Laçına qayıdış davam edir. Böyük Qayıdış Proqramı çərçivəsində son mərhələdə Laçın şəhərinə daha 19 ailə (89 nəfər) köçürülüb. Böyük xoşbəxtlikdir ki, işğaldan azad edilmiş yurdlarımız əsl sahiblərinə qovuşur. Postmüharibə dövrünün yeni çağırışlarına uyğun olaraq Azərbaycan dövləti və Prezident İlham Əliyev qarşıda duran növbəti məsələləri həll etməkdədir. İndi əsas prioritetlər işğaldan azad edilmiş ərazilərin bərpası, həmin regionlarda yaşayışın mümkünlüyü üçün zəruri addımların atılmasıdır ki, bu da uğurla həyata keçirilir. Artıq sərbəst nəfəs alan ərazilərimizin yenidən canlandırılması, doğma yurdlarına qayıdacaq sakinlərimizin rifahının yüksəldilməsi ilə bağlı mühüm tədbirlər görülür.
Bu gün Laçının əsl sakinləri üçün yüksək səviyyəli, rahat evlərin tikildiyini, bütün ehtiyaclarının qarşılandığı və normal həyat şəraiti üçün bütün infrastrukturlar yaradılıb. Əminik ki, bu proses uğurla davam edəcək, vətəndaşlarımızın qürur duya biləcəyi tarixi bir hadisəyə çevriləcək.
Biz laçınlıların "Böyük Qayıdış" hərəkatının şahidiyik
Azərbaycanın suveren ərazisi olan Laçın uzun illər düşmən tapdağında qalsa da, 44 günlük Vətən müharibəsindən sonra bir dənə də olsun güllə atılmadan diplomatik yolla geri qaytarıldı. Bu gün isə biz laçınlıların "Böyük Qayıdış" hərəkatının şahidiyik.
Laçına ilk köç karvanı mayın 27-də Bakı şəhərinin Qaradağ rayonunda məcburi köçkünlər üçün salınmış “Qobu park 3” yaşayış kompleksindən yola salınmışdır. Mayın 27-də Laçına başlanan böyük köçün birinci mərhələdə Laçın şəhərinə 20 ailə, yəni 97 nəfər köçürüldü. İyunun 14-də Laçına növbəti, ikinci köç baş tutdu. Ardınca 22 ailə, yəni 72 nəfər doğma ata-baba yurduna qovuşdu. Məcburi köçkün adı ilə vidalaşan laçınlılar illərdir həsrətini çəkdikləri evlərinə, ocaqlarına qovuşublar. Onlar dövlət tərəfindən müvəqqəti olaraq yaşamaq üçün təmin edildikləri evlərlə vidalaşıb yurd yerlərinə üz tutdular.
Laçın şəhərinin mərkəzi və kəndlərinin Ermənistanla sərhəddə yerləşməsi bu ərazilərin strateji əhəmiyyətə malik olmasından xəbər verir. Laçın şəhərinin və kəndlərin Azərbaycana qaytarılması bu ərazilərdən məcburi köçkün düşmüş, 30 il ağır psixoloji şəraitdə yaşamış insanların öz ata-baba yurdlarına qayıtması ilə bağlı ümidlərini daha da artırdı.
Rayonun dağıdılan iqtisadiyyatının bərpası və Azərbaycan iqtisadiyyatına reinteqrasiyası mümkün olacaq
Laçının işğaldan azad olunması Azərbaycanın müasir tarixinin ən strateji hadisələrindən hesab olunur. Laçın şəhəri hər zaman regionun vacib yaşayış məntəqəsi hesab olunub. Bu hadisə regionda yeni mərhələnin başlanması kimi xarakterizə olunur. Laçına qayıdış mühüm iqtisadi nailiyyətlərə yol açacaq.
Laçın rayonu iqtisadi cəhətdən böyük potensiala malik bölgələrimizdən biridir. Rayonun həm böyük turizm potensialı, həm də aqrar, eləcə də sənaye sektorunda müqayisəli üstünlükləri var. Təbii ehtiyatları ilə fərqlənən rayonda emaledici sənayenin üzrə istehsalının təşkili mümkündür. İşğaldan öncə rayonda əsas inkişaf etmiş sahə kənd təsərrüfatı, xüsusilə də heyvandarlıq idi. Bununla yanaşı, meyvəçilik, tütünçülük, üzümçülük, taxılçılıq, arıçılıq inkişaf etmiş sahələrdən hesab olunurdu. İşğaldan öncə Laçın rayonunda fəaliyyət göstərən sənaye müəssisələri daha çox xammal növlərinin emalına əsaslanmışdı. Laçın, həmçinin, zəngin təbii ehtiyatlara malikdir. Belə ki, Laçın rayonunda civə, xromit, mərmər, üzlük tikinti daşları və digər faydalı qazıntı ehtiyatları var. Rayonun dağıdılan iqtisadiyyatının bərpası və Azərbaycan iqtisadiyyatına reinteqrasiyası mümkün olacaq.
Laçın Azərbaycanla Ermənistanı birləşdirən magistral yolun üzərində yerləşməsilə ilə yanaşı strateji əhəmiyyətə malik şəhərdir. Məhz bu faktor Laçının əhəmiyyətini artırıb. 30 il ermənilər bu şəhərdə yaşasalar da bölgənin turizm infrastrukturunun inkişafı baxımından demək olar ki, heç nə etməyiblər.
Qarabağın Ermənistanla sərhədində yerləşən rayonudur və orada Azərbaycanlıların daimi yaşaması, Azərbaycanın suverenliyi və ərazi bütövlüyü və dayanıqlı inkişafı üçün əhəmiyyətlidir.
Rayonunun Qorçu kəndi ərazisində inşa ediləcək hava limanının mülki aviasiya, yükdaşıma və hərbi əhəmiyyəti danılmazdır. Qarabağın hava qapısı Füzuli aeroportundan sonra Laçında aeroportun tikilməsi ümumilikdə bölgənin sosial-iqtisadi inkişafına təkan verərək turizm potensialının artırılmasına da geniş imkanlar açacaq. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasını göstərir. Olduqca mühüm strateji əhəmiyyətə malik olan Laçın aeroportu logistik mərkəzlərin yaradılmasına da töhfə verəcək. Laçın hava limanını xüsusi edən bir digər məqam isə onun Azərbaycanın dəniz səviyyəsindən ən hündürdə yerləşən aeroportunun olmasıdır.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
