Türkiyə Prezidenti Rəcəb Tayyib Ərdoğan ölkənin yeni Nazirlər Kabinetini açıqlayıb. Bu barədə dövlət başçısı mətbuat konfransında bildirib.
Belə ki, yeni kabinetə ədliyyə naziri Yılmaz Tunc, ailə və sosial təminat naziri Mahinur Özdemir Göktaş, gənclər və idman naziri Osman Aşkın Bak, energetika naziri Alparslan Bayraktar, müdafiə naziri Yaşar Gülür, daxili işlər naziri Ali Yerlikaya, xarici işlər naziri Hakan Fidan, maliyyə və xəzinə naziri Mehmet Şimşek, səhiyyə naziri Fahrettin Koca, sənaye naziri Mehmet Fatih Kaçır, kənd təsərrüfatı və meşə naziri İbrahim Kumaklu, mədəniyyət və turizim naziri Mehmet Ersoy, ticarət naziri Ömer Bolat, təhsil naziri Yusuf Tekin, Prezidentin köməkçisi isə Cevdet Yılmaz təyin olunub.
Göründüyü kimi, Türkiyənin yeni hökuməti, demək olar ki, tam tərkibdə yenilənib. Bu, gələcək üçün hansı yeniliklər vəd edir?
Politoloq Qabil Hüseynli “Bakı-Xəbər”ə açıqlamasında bildirdi ki, Ərdoğan yeni kabinetin böyük əksəriyyətini təzələməklə çox düzgün hərəkət etdi: “Çünki demokratik ölkədir, əhalinin siyasi fəallığı çox yüksəkdir. Onlar hökuməti, siyasi vitrinini dəyişməsəydi, əhali arasında narazılıq yenə də qalacaqdı. Bu addımla xalqa ümidlər verdilər ki, ciddi işləmək niyyətindədirlər. Dəyişikliklər etməklə, böyük hədəflərə kökləniblər. Bu hədəfləri də yerinə yetirmək üçün lazımi, peşəkar keyfiyyətlərə malik olan nazirlər kabinetini qururlar. Xarici işlər naziri postuna MİT rəhbərinin təyin olunması prinsipial əhəmiyyətə malikdir. Bu onu göstərir ki, Ərdoğan xarici siyasətdə də ciddi hədəflərə köklənib. Ölkəni regional gücdən qlobal gücə çevirmək istəyir. Yeni hərbi nazirin gətirilməsi də ciddi niyyətdən xəbər verir. Ordu generalı Yaşar Gülər çox ciddi general kimi xarakterizə olunur. Hökumət təzələndi və Türkiyə Cumhuriyyətinin yaranmasının 100 illiyi ilə bağlı yeni hədəflər müəyyənləşəcək. Bu, Türkiyənin yeni dövlət strategiyasında da öz əksini tapacaq. Türk dünyası xüsusilə də Azərbaycanla əlaqələrin genişlənməsi də baş verəcək. Eyni zamanda iqtisadiyyat sahəsində də kardinal dəyişikliklər gözlənilir. Əhalinin maddi rifah halının qaldırılması üçün də geniş hədəflər nəzərdə tutulur”.
Rusiyalı tanınmış politoloq Sergey Markov hesab edir ki, Ərdoğanın xarici siyasəti, əsasən, dəyişməyəcək:
“Çünki seçicilər bu siyasəti dəstəkləyiblər. Lakin inflyasiya və lirənin zəifləməsi çox yüksək olduğu üçün iqtisadi siyasət dəyişdiriləcək.
Türkiyə İsveçi NATO-ya buraxacaq. Ancaq qarşılığında ABŞ və AB-dən böyük güzəştlər alacaq. Yəni ABŞ və AB İsveçin NATO üzvlüyünü Ankaradan almalı olacaq. Suriyalı qaçqınların Suriyaya kütləvi şəkildə köçürülməsi başlayacaq. Bunun üçün isə orada kütləvi mənzil tikintisi aparılacaq. Çünki türklər suriyalı qaçqınlardan daha çox qıcıqlanmağa başlayıblar. Eyni zamanda, Türkiyənin Suriya ilə əlaqələri yaxşılaşacaq.
Rusiya taxıl sazişindən imtina edəcək. Türkiyə bunu qəbul edəcək: həvəssiz, amma münaqişə olmadan”.
Markov onu da qeyd edib ki, hakim partiya daxilində Ərdoğanın varisi üçün aktiv axtarışlar başlayacaq:
“Çünki 2028-ci ildə o, daha seçkiyə getməyəcək”.
Məhəmmədəli QƏRİBLİ
