2015-ci ilin sentyabrında Suriyada Bəşər Əsəd tərəfdən birbaşa müharibəyə girən Rusiya, İsrailin son altı ildə rejim qüvvələrinə qarşı döyüş təyyarələri ilə həyata keçirdiyi hücumlara göz yumub. İsrail, Dəməşq rejiminə, xüsusən də Orta Şərqdəki İran milislərinə qarşı yüzlərlə hücum həyata keçirib, ancaq Aralıq dənizi sahillərindəki rus bazalarından buna hec bir reaksiya verilməyib.
Baki-xeber.com xarici mdiya istinadən xəbər verir ki, İsrailin gizli təşkilatı MOSSAD-a yaxınlığı ilə tanınan DebkaFile saytı Yaxın Şərqdəki tarazlığın geri dönməz bir şəkildə dəyişdiyini yazır.
Rusiya lideri Vladimir Putinin, İsrailin keçmiş baş naziri Benyamin Netanyahu ilə əldə etdiyi razılaşmadan uzaqlaşdığını qeyd edən Debka, Moskvanın Suriyada köklü bir dəyişiklik etdiyini yazır.
Xəbərə görə, ruslar ilk dəfə 20 iyulda Hələb yaxınlığında İsrail hücumunun bütün təfərrüatlarını paylaşıblar. Cənubda ABŞ-ın nəzarətindəki bölgədən Suriya hava sahəsinə daxil olan dörd İsrail F-16-sı Hələbdəki hədəflərə raket zərbələri endirib.
Sözügedən raketlərdən yeddisi Rusiya istehsalı olan Pantsir-S və Buk-M2 hava hücumundan müdafiə sistemi tərəfindən havada vurulub. Maraqlıdı ki, əvvəllər İsrailin hücumları zamanı Rusiyanın raketdən müdafiə sistemləri aktivləşdirilmirdi.
DebkaFile, Moskvanın İsrailin Suriyaya hücumlarına münasibətinin Putin və ABŞ lideri Co Bayden arasındakı zirvədən sonra dəyişdiyini iddia edir. Sayt Rusiya Müdafiə Nazirliyinin əvvəllər İsrail hücumlarına münasibət bildirmədiyini yazır.
Rusiya DebkaFile-in xəbərini Səudiyyə nəşri Sarkul Avsat-a təsdiqləyib.
Rusiyadan olan bir mənbə, Moskvanın Suriyanın hava sahəsini pozan İsrail hücumlarına qarşı olduğunu və hava sahəsini bağladığını söyləyib. Digər tərəfdən Rusiya mediası isə, Suriyadakı Rusiya hərbi rəhbərliyinə İsrail raketlərini və döyüş təyyarələrini vurma əmri verildiyini yazıb.
Tahir TAĞIYEV
