Məlum olduğu kimi, BMT-nin üzvü olan 130-dan çox dövlət Prezident İlham Əliyevin BMT Baş Assambleyasının Xüsusi sessiyasının təşkil olunması təşəbbüsünü dəstəkləyib. Maraqlıdır ki, bu təşəbbüsə qarşı çıxış edən yeganə dövlət Ermənistan olub. Azərbaycan Przidentinin təşəbbüsünün əleyhinə olması ilə bütün dünya bir daha Ermənistanın irticaçı mahiyyətinin şahidi oldu. Bu da demokrat libaslı, işğalçı zehniyyətli Paşinyan hökumətinin siyasi hazırlıqsızlığının, imkanlarının tükəndiyinin əlaməti sayıla bilər. Ermənistanın bu mövqeyi onun dünyadakı imicinə necə zərbə oldu?
Qeyd edək ki, Azərbaycanın bu uğuruna müxalif partiyalardan da dəstək gəlib. Müxalifyönümlü Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, COVİD-19 pandemiyası dünyanı cənginə alandan sonra iri dövlətlərin, super güclərin belə bu yeni təhlükəyə hazır olmadığı üzə çıxdı:“Bir sıra olkələrdə baş verən hadisələr, qocalar evində, xəstəxanalarda insanların taleyin ümidinə buraxılması, nəticədə xeyli sayda insanın baxımsızlıq üzündən ölməsi dediklərimizə sübutdur.
Maraqlıdır ki, aradan aylar keçməsinə baxmayaraq, beynəlxalq münasibətlər sisteminin əsas orqanı olan BMT-nin, onun əsas qurumları olan Təhlükəsizlik Şurasının və Baş Assambleyanın səsi eşidilmir. Əslində insanların koronavirusdan ölüm sürətini götürsək, sanki dünya üçüncü dünya müharibəsi şəraitindədir. Bu problemin həlli bütün ölkələrin birgə səyi və əməkdaşlığı şəraitində həll oluna bilər. Əks halda, bircə ölkədə belə bu virusun daşıyıcılarının olması bütün dünyanın yoluxmasına səbəb olacaq amil kimi qiymətləndirilməlidir. Çünki dünya əvvəlki qapalı dünya deyil, sərhədlər də, münasibətlər də bir-birinin üzünə açıqdır.
Belə bir şəraitdə Azərbaycan Prezidenti, həm də Qoşulmama Hərəkatının sədri İlham Əliyevin BMT Baş Assambleyasının COVİD-19 pandemiyasına qarşı mübarizəyə həsr olunmuş xüsusi sessiyanın keçirilməsi barədə təşəbbüsü və dünyanın 130-dan çox dövlətinin bu təşəbbüsü dəstəkləməsi, yalnız Ermənistanın bu təşəbbüsdən imtina etməsi ölkəmiz üçün çox müsbət haldır”.
Partiya sədri bunun səbəbini belə izah edir: “Birincisi, Azərbaycan bütün dünya üçün çox əhəmiyyətli bir məsələni dünyanın bir nömrəli beynəlxalq təşkilatı olan BMT-nin müzakirəsinə çıxarmaqla həm problemin həllinə öz töhvəsini verir, həm də beynəlxalq aləmdə dividend qazanır.
İkincisi, Ermənistan bu məsələdə cığallıq etməklə, özünün nə qədər qeyr-ciddi, qərəzli və məkrli olduğunu dünyaya nümayiş etdirməklə təklənmiş vəziyyətə düşür. Biz məhz bu məsələni, yəni pandemiya ilə mübarizə üçün bütün dünyanın qoşulmasına təşəbbüsə belə əngəl törətməyə çalışan Ermənistanın qeyr-ciddi, cığal münasibətini dünyaya göstərməyə çalışmalıyıq. Erməni mətbuatı İrəvanın məsələyə münasibətini dəstəkləməklə nə qədər həyasız təbliğat yürütdüklərini ortaya qoyur və bizlər üçün də düşünməyə əsas verir. Yəni daxildə nə qədər bir-birini “yesələr” də, hakimiyyətlə müxalifət arasında düşmən münasibət olsa da, Ermənistan-Azərbaycan münasibətlərində vahid mövqedən çıxış edir, özlərininkinin təəssübünü ayağa vermirlər.
Nəhayət, biz də iqtidarla müxalifət arasındakı narazılıqları, fikir ayrılıqlarını, hətta qarşıdurmaları bir kənara qoyub, yeri gələndə vahid mövqedən çıxış etməyi öyrənməliyik”.
Ortaya yekdil olaraq belə fikir çıxır ki, bütün dünya COVID-19-a qarşı mübarizədə qlobal həmrəyliyin vacibliyini vurğuladığı halda, Ermənistan qlobal xarakter daşıyan bu təşəbbüsə qarşı çıxış etməklə BMT sistemində və dünya dövlətləri arasında özünün təcavüzkar mahiyyətini bir daha göstərdi.
Məhəmmədəli QƏRİBLİ
