Koronavirusa görə Dağlıq Qarabağda ermənilərin atəşkəs pozuntuları üzərində nəzarət də təxirə salındı...
ATƏT regiondakı monitorinqləri dayandırır. Bu barədə ATƏT-in fəaliyyətdə olan sədrinin nümayəndəsi, səfir Anjey Kasprşikin bəyanatında deyilir.
Bəyanatda bildirilir: "Koronavirusun yayılması ilə əlaqədar mövcud vəziyyət bütün bölgədə beynəlxalq sərhədlərin bağlanmasına, beynəlxalq və yerli heyətin səyahətləri üçün məhdudiyyətlərə səbəb oldu. İnfeksiya risqinin azaldılması üçün, həmçinin, şəxsi təmaslara da məhdudiyyətlər mövcuddur. Yuxarıda göstərilənlərə əsasən və tərəflərlə məsləhətləşmələrdən sonra bu məhdudiyyətlər aradan qaldırılana qədər monitorinqlərin dayandırılması qərara alındı. Eyni zamanda, mən müvafiq hərbi hakimiyyətlərlə əlaqə saxlamağa davam edirəm".
Xatırladaq ki, Dağlıq Qarabağ münaqişəsinin nizamlanması üzrə ATƏT-in Minsk Qrupu 1997-ci ildə Rusiya, ABŞ və Fransanın həmsədrliyi üzrə formalaşıb. 23 ildir həmsədrlər münaqişənin tənzimlənməsi üçün regiona müxtəlif səfərlər edir, cəbhə xəttində monitorinqlər keçirir və ölkə liderlərinin görüşlərini təşkil etməyə çalışırlar.
Atəşkəsə nəzarət mexanizmi ilə bağlı monitorinqlərin təxirə salınması hansı nəticələrə səbəb ola bilər?
- Qabil Hüseynli: “Ermənilərin bu fürsətdən istifadə edəcəyi qənaətində deyiləm”
Politoloq Qabil Hüseynli “Bakı-Xəbər”ə açıqlamasında bildirdi ki, monitorinqlərin dayandırılmasını düzgün addım saymır: “Çünki həmin missiyanı həyata keçirən heyətin sayı məhduddur. Cəmi 10-15 nəfərdir. Onlar da avtobusla, ictimai nəqliyyatla ora getmirlər ki, epidemiya onları yaxalaya bilsin. Xüsusi zirehli maşınlarda ora gedirlərsə, epidemiyaya tutulma risqi də azdır. Kasprşik də sanki bəhanə axtarırmış kimi davranır. Onsuz da onun monitorinqləri bir nəticə vermir. Ermənilərin bu fürsətdən istifadə edəcəyi qənaətində deyiləm. Onlar onsuz da Azərbaycan Ordusunun gücünə tam bələddirlər. Müdafiə naziri bu günlərdə ön xətdə olub və tapşırıq verib ki, ermənilərin istənilən atəşkəsi pozma cəhdinə layiqli cavab verilsin. Ermənilər Azərbaycan Ordusunun nəyə qadir olduğunu 2016-cı ilin aprel ayında görüblər. Hesab edirəm ki, danışıqlar prosesində konkret addımların atılmasının vaxtı çatıb. Bu istiqamətdə nəticə olmayacaqsa, onda monitorinqlərə də ehtiyac qalmayacaq. Qarabağ problemi çox həssasdır. Bunu xəstəliklərin ümidinə buraxmaq olmaz. Biz öz tədbirlərimizi görməliyik. Ayıq-sayıqlığımızı itirməməliyik”.
Məhəmmədəli QƏRİBLİ
