Fiziki şəxslərə verilmiş istehlak kreditləri niyə azalıb?
Rəşad Həsənov: "Kredit qoyuluşunun azalmasının səbəbi əhaliyə istehlak kreditinin çətin şərtlər əsasında verilməsidir"
"Mərkəzi Bankın həyata keçirdiyi siyasət ondan ibarət idi ki, istehlak kreditlərinin həcmi azalsın"
2015-ci ilin yanvar ayının yekunlarına görə, Azərbaycan iqtisadiyyatına kredit qoyuluşu 18,58 milyard manat təşkil edib. Azərbaycan Mərkəzi Bankının yaydığı statistikaya görə, bu, ötən ilin eyni dövrü ilə müqayisədə 20 faiz çoxdur.
Son 1 ayda isə kreditlərdə artım 0,2 faiz olub. Bu artım isə energetika, kimya və təbii ehtiyatlar sektoruna verilmiş kreditlərin hesabına təmin olunub. Yanvar ayının yekunlarına görə, bu sahəyə 235,7 milyon manat kredit ayrılıb. Bu da ümumi kredit portfelinin 1,3 faizini təşkil etməklə 2014-cü ilin yekunları ilə müqayisədə 20,4 faiz çoxdur.
Kreditlərin 44 faizi və yaxud 7 milyard 724,1 milyon manatı fiziki şəxslərə verilmiş istehlak kreditləri olub. Amma ötən ilin yekunları ilə müqayisədə bu kreditlər 7,7 milyon manat azalıb.
Ay ərzində ticarət və xidmət sektoruna ayrılmış kreditlər 32,3 milyon manat azalaraq 2 milyard 648,3 milyon manat (kredit portfelinin 14,3%-i), kənd təsərrüfatı və emal sektoruna verilmiş kreditlər 4,8 milyon manat azalaraq 842,5 milyon manat (kredit portfelinin 4,5%-i), inşaat və əmlak sektoruna yönəldilmiş kreditlər 7 milyon manat azalaraq 2 milyard 548,1 milyon manat (kredit portfelinin 13,7%-i), sənaye və istehsal sektorunun kreditləşməsi 20,7 milyon manat azalaraq 2 milyard 7,1 milyon manat (kredit portfelinin 10,8%-i), nəqliyyat və rabitə sektorunun kreditləşməsi 9,5 milyon manat azalaraq 726,5 milyon manat (kredit portfelinin 3,9%-i) təşkil edib.
Kredit qoyuluşunun azalması barədə fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, 2014-cü il ölkə bankları üçün heç də uğurlu olmadı.
Onun sözlərinə görə, ötən ilin əvvəlindən etibarən Mərkəzi Bankın həyata keçirdiyi siyasət ondan ibarət idi ki, istehlak kreditlərinin həcmi azalsın: "Hətta bununla bağlı müxtəlif qərarlar da verildi. Arayışların elektron formada verilməsi istehlak kreditlərinin sayının azalmasına səbəb olub.
Ölkə başçısının son müşavirədə istehlak krediti ilə bağlı mövqeyini ortaya qoyması və Mərkəzi Banka tapşırıq verməsi bu sahədə vəziyyəti bir qədər dəyişdi. Əhaliyə istehlak kreditləri artıq çətin şərtlər əsasında verilir.
Məhz bu səbəblərdən dolayı biz istehlak kreditlərinin azalmasının şahidi oluruq".
