Sədrəddin Soltan: “İran rejiminə qarşı çıxanlar işdən çıxarılır, həbs olunur, edam edilir və ya psixoloji təzyiqə məruz qalır”
İranda intihar edənlərin sayı artır. “İran News Wire”nin yaydığı məlumatda qeyd edilir ki, son zamanlar molla rejiminin əziyyətlərinə tab gətirməyib, intihar edən qadınların sayı artır. Nəşr bunları qeyd edir: “Bütün digər məsələlər kimi, həyat həvəsini və ümidini bərpa etməyin yeganə yolu öz suverenliyinin maraqlarından və qorunub saxlanmasından başqa heç nəyi düşünməyən, insanların həyat və sağlamlığını tənzimləyən bu soyğunçu və xalqa zidd rejimdən qurtulmaqdır. Onlar üçün heç bir dəyər yoxdur”.
YUNESKO-nun Sosial Sağlamlıq və İnkişaf kafedrasının üzvü, sosioloq Məhəmməd Əli Məhəmmədi də deyib ki, “İranda intihar getdikcə artan bir fenomen kimi qəbul edilir və ölkəmiz İslam ölkələri arasında üçüncü yerdədir. Hər 100.000 nəfərdən 125-i intihar edir, Həmçinin 2009-cu ildən İranda hər gün 15 nəfər intihar edir”.
Onu da qeyd edək ki, İranda intihar edənlər arasında azərbaycanlılar, farslar və digər xalqların nümayəndələri də var.
- “İran cəmiyyəti yenilik, dəyişiklik istəyir, bu dəyişikliyə qarşı çıxan rejim isə etirazları zorla söndürməyə çalışır, nəticədə ...”
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə açıqlamasında qeyd etdi ki, İranda acınacaqlı ictimai, siyasi vəziyyət yaranıb. Cəmiyyət hər hansı bir məsələ ilə bağlı etirazını, narazılığını bildirəndə təzyiq olunur, təqiblərə məruz qalır: “Rejimə qarşı çıxanlar işdən çıxarılır, həbs olunur, edam edilir və ya psixoloji təzyiqə məruz qalır. Ölkədə iqtisadi vəziyyət günü-gündən çətinləşir, insanlar səbəbsiz yerə işdən çıxarılır. İqtisadi və sosial vəziyyətin ağırlaşması insanların yaşama istəyini də azaldır. Onlar çıxış yolu kimi intihara əl atır. Həmin ölkədə qadınların vəziyyəti daha da ağırdır. Qadınlar yalnız sosial-iqtisadi vəziyyətin qurbanı deyil, eyni zamanda, məişət zorakılığının da qurbanıdır. Qadınların məcburi şəkildə hicab geyindirilməsi də onların azadlıqlarını daha da məhdudlaşdırır. Bu səbəbdən də İran qadınları arasında intihar edənlərin sayı artır”.
Həmsöhbətimiz onu da əlavə etdi ki, son zamanlar İranda məişət zorakılığı daha da artıb. Məişət zorakılığının artması qısqanclıqla bağlı deyil. Cəmiyyətdə qadın azadlığı təmin olunmayanda, xanımlara qarşı təzyiq artanda demokratik dəyərlər haqqında danışmağa dəyməz: “Nəzərə almaq lazımdır ki, cəmiyyətin inkişafı məhz qadınlarla bağlıdır. İran cəmiyyəti yenilik, dəyişiklik istəyir. Bu dəyişikliyə qarşı çıxan rejim isə etirazları zorla söndürməyə çalışır. Bu zorakılıqların nəticəsi isə əlacsız qalan insanları intihara sürükləyir. Bu səbəbdən də İranda intihar edən qadınların sayı günü-gündən artır”.
Günel CƏLİLOVA
