13/07/2020 02:52
728 x 90

Deputatlıq iddiaları püskürən bir çoxları - yazdıqları status və plakatlarda rüsvayçı qrammatik səhvlər...

Buludxan Xəlilov: “Öz sahəsində heç bir uğur qazana bilməyən insanlar gedib parlamentdə nə iş görəsidir ki?”

img

Milli Məclisin buraxılması saysız insanın növbəti parlament seçkilərinə qatılmaq istəyinin güclənməsinə səbəb olub. Bu gün bir sıra insanlar sosial şəbəkələr vasitəsilə deputatlığa namizədliyini irəli sürdüklərini bəyan edirlər.

Deputatlıqla bağlı iddialar ortaya qoyan şəxslərin, sosial şəbəkə istifadəçilərinin həm paylaşdıqları statuslarda, həm də təqdim etdikləri bioqrafik məlumatlarda, tərtib etdikləri plakatlarda kifayət qədər ciddi qrammatik səhvə yol verilir. Özlərini gələcək deputat kimi görən şəxslərin yazarkən ciddi qrammatik səhvlərə yol verməsi, cümlə quruluşlarındakı qüsurlar sıx-sıx müşahidə edilir.

Bəzi şair və yazıçıların, jurnalistlərin, QHT nümayəndələrinin, eləcə də sadə insanların yazdıqları statuslarda kifayət qədər diqqətçəkən qrammatik qüsur var.

  • “...cümlələri düzgün şəkildə qura bilməyənlərin mənasız bir iddiada olması onların səviyyəsindən xəbər verir”

Azərbaycan Dövlət Pedaqoji Universitetinin kafedra müdiri, professor Buludxan Xəlilov “Bakı-Xəbər”ə bildirdi ki, bu, namizədlərin çoxunun təsadüfi adamlar olduğundan irəli gəlir. B.Xəlilovun sözlərinə görə, savadsız, dilin qayda-qanunlarını bilməyən insanların deputatlıq iddiasına düşməsinin özü gülüncdür. Müsahibimiz hesab edir ki, deputatlığa namizədliyini verən adamın mükəmməl savadı, biliyi olmalıdır və həmin şəxslər ana dilimizi gözəl, səlist bilməlidirlər. “Olduqca aktual bir məsələni gündəmə gətirmisiniz. Ola bilsin, bu, kimlərinsə diqqətindən yayınır, buna əhəmiyyətsiz bir hal kimi baxırlar, amma belə deyil, bu tamamilə ciddi bir qüsurdur. Mən özüm də bu halı sıx-sıx müşahidə edirəm. Bir sosial şəbəkə istifadəçisi kimi açıq şəkildə görürəm ki, Milli Məclisin buraxılması bir çox Azərbaycan vətəndaşının öz namizədliyini irəli sürməsinə səbəb olub. Burada da xoşagəlməz bir sıra hallar var ki, onun qeyd edilməsi vacibdir. İnsanların bir çoxu öz məsuliyyətini dərk etmədən özlərini deputat kimi Milli Məclisdə görmək iddiasındadır. Bu iddianı da ortaya qoymaq, deputat olmaq görüntüsü yaratmaq üçün sosial şəbəkələrdən geniş şəkildə istifadə edirlər və namizədliklərini irəli sürürlər. Diqqətçəkən məsələlərdən biri odur ki, bu adamların namizədliyini ya özləri irəli sürür, ya da ətrafında olan müəyyən qruplar sosial şəbəkələrdə “siz filankəsi deputat görmək istəyərdinizmi” deyə sorğu verirlər. Və sorğulara müxtəlif münasibətlər var. Doğru qeyd edirsiniz həm o sorğuların özündə ciddi qrammatik səhvlər var, həm bəzi namizədlərin yazdıqları statuslarda, həm də onların təqdim etdikləri bioqrafiyaların yazılışında ciddi qrammatik nöqsanlar diqqətdən yayınmır. Azərbaycan dilinin qayda-qanunlarına riayət edilmir, cümlə quruluşlarında, eləcə də digər məsələlərdə kifayət qədər qrammatik səhvə yol verilir. Azərbaycan dilinin yazı qaydalarına əməl etməyi bacarmayan, dilimizi normal şəkildə bilməyən, ondan istifadə edərkən qüsurlara yol verən bir çox insan deputat olmaq iddiasındadır. Sosial şəbəkələr vasitəsilə namizədliyini irəli sürənlər arasında müxtəlif təbəqələrin nümayəndələri var. Bu da xoşagələn hal deyil. Öz sahəsində heç bir uğur qazana bilməyən insanlar gedib parlamentdə nə iş görəsidir ki? Yazdıqları status və bioqrafiyalarında saysız qrammatik səhvə yol verənlərin, dilin qayda-qanunlarından xəbərsiz olanların, cümlələri düzgün şəkildə qura bilməyənlərin mənasız  bir iddiada olması onların səviyyəsindən xəbər verir”.

B.Xəlilov hesab edir ki, sosial şəbəkə vasitəsilə iddialarını ortaya qoyanlar sırasında şou-biznesçilərin və aktyorların, bəzi şairlərin olması da müsbət hal deyil. Onun sözlərinə görə, sosial şəbəkələrin verdiyi imkanlardan yararlanaraq öz namizədliklərini irəli sürənlər burada ağızlarına gələnləri də yazırlar. “Çox təəssüf edirəm ki, sosial şəbəkələr vasitəsilə öz namizədliyini irəli sürənlər sırasında şairlər, şou-biznesçilər, aktyorlar da var. Onlar hamısı özünü deputat görmək istəyir. Halbuki, onların da yazdıqları statuslarda kifayət qədər qrammatik səhv var. Bu adamların deputat seçilməsi Azərbaycana heç bir fayda verməyəcək. Yəni deputat olmaq istəyən şəxsin vicdanı, savadı, nüfuzu olmalıdır, Azərbaycan dövlətçiliyi ilə nəfəs almalıdır, ana dilimizi mükəmməl bilməlidir. Onların bir çoxu hətta Azərbaycan dilini mükəmməl bilmir. Sosial şəbəkələr vasitəsilə öz namizədliyini irəli sürən insanlar, o cümlədən, aktyorlar, aktrisalar, müğənnilər Azərbaycan dilində düzgün yazılış qaydasını bilmirsə, qrammatik qaydalara əməl etmirlərsə, onlar parlamentdə hansı işlər görəcəklər? Başqa bir tərəfdən də parlament müğənnilərdən, aktyorlardan ibarət olmamalıdır. Yaxşı fikir verin, ölkə televiziyaları və radioları, bəzi qəzetlər, saytlar şou-biznesçilərin əlində qaldığı üçün, Azərbaycan cəmiyyətini pis günə saldı, tamaşaçıların, dinləyicilərin zövqünü çox aşağı saldı, cəmiyyətdə azərbaycançılıq ideologiyasının Azərbaycana xidmət etməsinin qarşısını kəsdi. İndi bununla kifayətlənməyib Milli Məclisdə də özlərinə yer tutmaq istəyirlər. Azərbaycan dilini bilməyənlər, eyni zamanda, o şounu Milli Məclisə də gətirmək istəyirlər”.

B.Xəlilov hesab edir ki, seçicilər, birmənalı olaraq, şou müğənnilərini, bəzi aktyor və aktrisaları deputat seçməkdən imtina etməlidirlər. Onun sözlərinə görə, Milli Məclisdə savadlı, bilikli hüquqşünaslar, siyasətçilər, ictimai-siyasi xadimlər, iqtisadçılar, dilçilər, elm və mədəniyyət xadimləri təmsil olunmalıdırlar ki, parlament faydalı fəaliyyət göstərsin.

İradə SARIYEVA 

Son xəbərlər