Azərbaycan Həkimlər Birliyinin İdarə Heyətinin üzvü, dosent, tanınmış həkim, aktiv sosial şəbəkə istifadəçisi Ədalət Rüstəm “Azərişıq” ASC tərəfindən aldadıldığı barədə rəsmi Feysbuk səhifəsində paylaşım edib. ASC-nin abonentləri aldatdığını vurğulayan tanınmış həkim statusunda Baş Prokurorluğa, mediaya və ictimaiyyətə müraciət edib, eyni zamanda “Azərişıq” tərəfindən ona göndərilən borc bildirişini də yayımlayıb.
Ə.Rüstəm statusunda “Əhalinin diqqətinə!!! "Azərişıq" ASC insanları belə aldadır. Diqqətli olun!!! Orda oturan hansısa... rəhbərə sosial media vasitəsilə xəbərdarlıq göndərirəm. Özünüzü yığışdırın. Bu dövlətin Baş prokuroruna da müraciət edirəm. Sizə çatsa reaksiyanızı ictimaiyyətə çatdırın. Xəbər saytlarına, kağız və e-mətbuata müraciət edirəm, bu fırıldağı ictimailəşdirin ki, insanlar məlumatlı olsunlar. Elektrik sayğacının dəyişdirilməsindən sonra guya yeni sayğacın sistemə (portala) oturulması 2-3 ay tələb edir. Bu səbəbdən son 3 ayın sərfiyyatını "оптовой" hesablayıb bu bildirişi təqdim edirlər. Və hesablamalara diqqət edin, bildirişdə ap-aydın görünür. 133 manat 03 qəpik. Əslində necə hesablanmalıdır: 200 kVt yox, 3 hissəyə bölündükdə alınmış 600X0.08 + 100 kVT yox, eyni qaydada 300X0.09 + 831 kVt yox, 231X0.130=105.03. 133.03 - 105.03 = 28 manat. Demək, tək məndən 3 natamam ayda 28 manat oğurlayıblar. Getdim "Abseronisıq"a. Bəxtimdən bu məsələyə baxan cavan oğlanın riyazi bilikləri məqbul oldu. Məsələnin məğzini dedim. Mənə bildirdi ki, baş idarədən bizə xüsusi riyazi düstur veriblər. Zəhmət olmasa, 10-15 dəqiqə gözləyin, hesablayıb deyək. Mən dərhal artıq hesablanmıs 400 kVt-i 5-ə, 200 kVt isə 4 qəpiyə vurdum. 20+8=28 manat. Dedim fərq 28 manatdır. İnanmadı. Özü kompüterin arxasında 7-8 dəqiqə qurdalandıqdan və mənə məlum olmayan düsturla hesabladıqdan sonra 28 manat rəqəmini təsdiqlədi. Düsturun adını soruşdum, yəqin ki, dövlət sirri hesab etdiyindən demədi. Soruşdum bəlkə Bayes teoremi, yoxsa Kolmoqorov düsturudur. Cavab vermədi. Soruşdum, mən gəlməsə idim, yüz minlərlə gəlməyən abonentlərə toplanan bu pullar, vətəndaşlara qaytarılacaqmı? Dedi bilmirəm. Dedim bəs hansı fonda gedir, "Azərişıq"in ayrıca oğurluq fondu var? Qorxa-qorxa, çəkinərək çiyinlərini cəkdi” - deyə qeyd edib.
Rəsmi məlumata görə, ölkədə 2 milyon elektrik abonenti olduğunu yazan tanınmış həkim abonentlərə verilən bildirişlərə diqqət yetirməyi tövsiyə edib: “Hər abonentdən ildə 2-cə dəfə 3 aylıq sərfiyyat "оптовой" hesablansa, çox demirəm, 28 manat demirəm, 10-ca manat ogurlansa bu ildə 40 milyon manat aşkar oğurluq deməkdir! Hörmətli vətəndaşlar! Kommunal xərclərə görə sizlərə verilmiş bildirişlərə diqqət edin!”
İradə SARIYEVA
