Prezident İlham Əliyevin 2023-cü ilin 6 ayının sosial-iqtisadi yekunlarına həsr olunmuş müşavirədə Gədəbəydə baş verən hadisələr barədə fikirləri bir çox məsələlərin üzərinə işıq saldı. Prezidentin xüsusilə ekoloji məsələlərdə nə qədər həssas olduğu və güzəştsiz mövqe tutduğu bir daha ortaya çıxdı.
Eyni zamanda bəlli oldu ki, bəzi məsələlərin Prezidentdən gizlədilməsinə cəhdlər edilir.
Prezidentin çıxışında xüsusi fikirləri bir daha nəzərdən keçirək:
- Gədəbəy rayonunda baş vermiş hadisə tamamilə qəbuledilməzdir.
-Ekologiya və Təbii Sərvətlər Nazirliyi ən azı səhlənkarlığa yol verib, nəzarətsizlik nümayiş etdirib, passiv müşahidəçi kimi çıxış edib və bunun nəticəsində xarici investor bizim təbiətimizi zəhərləyib.
- İnsanlar haqlı olaraq öz etiraz səsini ucaldıblar, amma onların səsinə baxan olub? Yox! Bir gün, iki gün, üç gün, beş gün, hara baxırdı Ekologiya və Təbii Sərvətlər Nazirliyi? Bilmirdimi ki, belə problem var? Ya bilirdi gözünü yumurdu, ya da bilmirdi. Hər ikisi qəbuledilən deyil.
- Xarici şirkət buraya pul qazanmağa gəlib. Biz etiraz eləmirik, investisiya qoyubdur, iş yerləri yaradıbdır. Əlbəttə, onlar gəlib burada xeyriyyəçiliklə məşğul olmurlar ki, pul qazanmağa gəliblər. Amma bu o demək deyil ki, bizim təbiətimiz məhv olsun. O demək deyil ki, insanların örüş, otlaq sahələri zəbt edilsin. O demək deyil ki, heç kimdən icazə almadan ikinci tullantı gölü qursun. Kim onlara icazə verib? Görünür, ya Ekologiya və Təbii Sərvətlər Nazirliyi ilə sövdələşiblər, ya da ki, onu özbaşına ediblər, ona görə ciddi araşdırılmalıdır.
Çox ciddi iradlarını bildirdi, tənqidi qeydlərini göstərdi
Görünən budur ki, Prezident həm insanlara böyük qayğı və diqqət göstərir, həm onlara etimad göstərir, həm də yeri gələndə, nöqsanı olanlara nöqsanını deyir. Bu bir rəhbərə xas olan yüksək keyfiyyətlərdir. Cənab Prezident bizim hörmətli nazirlərimizi mükafatlandırır, onları tərifləyir, yeri gələndə onlara məsləhətlərini verir, qayğı göstərdiyi kimi də, tələbkarlığını edir. Əgər etimad göstəribsə, müəyyən vəzifə tapşırıbsa, o vəzifəni istənilən səviyyədə yerinə yetirə bilmirlərsə həmin nöqsanlardan biz nəticə çıxarılmalıdır. Ona görə də orada deyilənlər ölkənin xeyri, ekologiyanın qorunması, insanların sağlamlığı, həyat şəraitinin yaxşılaşması üçündür. Prezident bu halların hamısını görür və dəqiq qiymətləndirir. Məhz bu baxımdan da Ekologiya və Təbii Sərvətlər Nazirliyinin ünvanına haqlı iradlarını bildirdi və dedi ki, mütləq nəticə çıxarılmalıdır. Çox ciddi iradlarını bildirdi, tənqidi qeydlərini göstərdi. Sözsüz, bu nəticə çıxarmaq və problemi aradan qaldırmaq üçündür.
Şirkət sosial-humanitar layihə həyata keçirə bilərdi
Gədəbəy rayonunun Söyüdlü kəndində monitorinqlərin aparılması və mövcud vəziyyətin qiymətləndirilməsi məqsədilə yaradılan Komissiyanın rəhbəri, ekologiya və təbii sərvətlər naziri Muxtar Babayev bir gün sonra keçirdiyi brifinqdə bildirib ki, Prezident tərəfindən çox haqlı iradlar səsləndirilib: “Xüsusən ETSN-in bəzi sahələrdə nəzarətinin lazımi formada aparılmaması ilə bağlı iradlar var idi. Cənab Prezidentin bütün tapşırıqları icra olunacaq, lazımi qüvvələr mobilizasiya olunacaq. Biz çalışacağıq ki, belə hallar olmasın”.
Ekologiya və təbii sərvətlər naziri başda olmaqla bizim aidiyyəti qurumlarımız və barəsində danışlan xarici şirkət əgər öz üzərinə düşən işin məsuliyyətini dərk edib görməli olduqları işləri görsəydilər bu qədər böyük problemlər yaranmazdı. Bu, məsələnin bir tərəfi. Digər tərəfdən açıq görsənir ki, bu xarici şirkət öz üzərinə düşən vəzifələri, öhdəlikləri layiqli şəkildə həyata keçirməyib. Büövlükdə, bu şirkətin fəaliyyətinə Ekologiya və Təbii Sərvətlər Nazirliyi nəzarət etməli idi, amma etməyib. Bu şirkət Söyüdlüdə sosial layihələr həyata keçirməkdə maraqlı olmalı idi. Bütün dünyada ənənə belədir ki, xarici şirkət fəaliyyət göstərdiyi əraziyə yaxın yaşayış məntəqlərində sosial layihə həyata keçirsin. Hər bir şirkətin sosial məsuliyyəti var. Bu şirkət sorğu keçirib söyüdlülülərin ən çox nəyə ehtiyacları olduğunu öyrənə və onun əsasında sosial-humanitar layihə həyata keçirə bilərdi. Bu, hər şeydən əvvəl bu o şirkətin özünün imici üçün lazım idi, həm də işlədiyi ölkəyə, fəaliyyət göstəriyi bölgəyə, o ərazinin insanlarına hörmətinin ifadəsi sayılardı.
Dünyada belə nümunələr çoxdur. Bu şirkət Azərbaycanın təbii sərvətlərini istismar edərək pul qazanır, bu puldan isə sosial aksiyalara ayırmır, yalnız vəsaiti mənimsəməklə məşğul olur.
Bakının da ekoloji vəziyyəti ürəkaçan deyil
Xatırladaq ki, Bakıda da ekoloji baxımdan ciddi narahatlıqlar var: xüsusilə yay mövsümünün gəlməsi ilə yenə dənizkənarı ərazilərin hasarlandığı, insanların istirahətinin məhdudlaşdığı, ağacların kəsilməsinin davam etməsi, yaşıllıqların məhv edilib, bina və obyektlər ucaldılması və s.
Ümid edək ki, bu, Ekologiya və Təbii Sərvətlər Nazirliyinin daha cəsarətli addımlar atması üçün stumul olacaq və təkcə Gədəbyin Söyüdlüsü ilə bağlı problemin həlli ilə məhdudlaşmayacaq, bütün ölkədə nazirliyin fəaliyyətində əhəmiyyətli dönüşü müşahidə edəcəyik…
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
