Evdə müalicə alan koronavirus xəstələrimizin məsuliyyətsizliyi daha böyük təhlükə mənbəyinə çevrilir
Bildiyimiz kimi, ölkəmizdə koronavirusa yoluxan şəxslərin müəyyən bir qismi ambulator müalicə alır. Yəni onların müalicəsi xüsusi həkim nəzarətilə evdə həyata keçirilir. Çox təəssüf ki, bəzən ya həkim, ya da ailə nəzarətsizliyi və xəstə şəxsin məsuliyyətsizliyi üzündən xoşagəlməz hallar baş verir.
Müəyyən hallarda evdə müalicə alan koronavirus xəstələri özbaşnalıq edir və onlar yaşayış yerini qanunsuz olaraq tərk edirlər. Özlərində heç bir məsuliyyət hiss etməyən belə şəxslər cəmiyyət üçün virus yayıcısı kimi təhlükəyə çevrilir. Məlum olduğu kimi, belə hallara təsadüf edilir. İyulun 1-də analoji hadisə baş verib. Evi qanunsuz olaraq tərk edən xəstə müəyyən edilib və onunla bağlı cinayət işi açılıb. Əslində, bütün təlimatlara görə, bu cür xəstələrin davranışlarına ətrafı, ailəsi və cəmiyyət böyük məsuliyət daşıyır.
Amma təəssüf ki, bəzən cəmiyyət də bu məsələyə barmaqarası baxır.
Ümumiyyətlə, həmin şəxslərə nəzarət baxımından cəmiyyətin çiyninə hansı məsuliyyət düşür? Ailə, cəmiyyətin öz məsuliyyətini dərk etməsi üçün nə etmək lazımdır?
- “Bu məsələdə hər birimiz, cəmiyyətin hər bir üzvü əlindən gələn dəstəyi, köməyi əsirgəməməlidir”
Milli Vəhdət Partiyasının sədr müavini Süleyman İsmayılbəyli “Bakı-Xəbər”ə bildirdi ki, koronavirus xəstəliyinə yoluxduğunu bilib həkimə müraciət etməyən şəxslər məsuliyyət daşıyırlar.
“Düzdür, koronavirus daşıyıcısı olduğu və bunu bildiyi halda həkimə müraciət etməyən, qapalı rejimdə, evdə qalmayıb yaşadığı yeri tərk edən bəzi məsuliyyətsiz vətəndaşlarımız da var. Ancaq məsələ ondadır ki, bir sıra hallarda həmin mənfi hadisənin hansı zərurətdən yarandığına da diqqət yetirmək lazımdır. Hər şeyi cəmiyyətin, vətəndaşın üzərinə atmaq, onu günahkar bilmək də doğru deyil. Əvvəla ona aydınlıq gətirmək lazımdır ki, koronaviruslu şəxs hansı zərurətdən yaşayış yerini tərk edib və ya onu belə bir addım atmağa nə vadar edib? Ola bilər ki, kömək etməyə bir kimsəsi yoxdur, dərman almaq üçün yaşayış yerini tərk edib. Yaxud yaxınları, qonşuları onun virus daşıyıcısı olduğundan xəbərsizdirlər. Ona görə də hesab edirəm ki, belə şəxslər ciddi nəzarətə götürülməli, zəruri dərman və ərzaq məhsulları ilə təmin olunmalıdırlar. Ərazi üzrə məsul olan tibb işçiləri, yaxınlıqda yerləşən səhiyyə ocağı, eyni zamanda, hüquq-mühafizə orqanları, bələdiyyə, icra nümayəndələri müntəzəm şəkildə, gün ərzində bir neçə dəfə həmin şəxslə əlaqə yaratmalı, vəziyyəti öyrənməli, nəyə ehtiyac duyduğunu soruşmalı, buna uyğun addım atmalıdırlar. Çünki nisbətən yüngül virus daşıyıcısı olan şəxslərin ev şəraitində müalicə olunmaq praktikası var”.
S.İsmayılbəyli onu da vurğuladı ki, bundan başqa, evdə həkim nəzarətində olan xəstələr də var və onlar arasında da məsuliyyətsiz olanlar az deyil. O qeyd etdi ki, bu halda cəmiyyət, ailə bu məsələdə aktivlik sərgiləməli, viruslu xəstəyə nəzarət etməlidir. Evdə müalicə praktikasının Azərbaycanla yanaşı, dünyanın digər ölkələrində də olduğunu deyən S.İsmayılbəyli hesab edir ki, bu hazırda ən optimal variantdır: “Virusun geniş yayıldığı və çoxsaylı ölüm halının qeydə alındığı Avropa ölkələrində belə bu praktikadan istifadə edildi. Çünki həmin insanların evdən bayıra çıxması ətrafları üçün real təhlükə mənbəyi hesab olunur. Bu baxımdan, virusa yoluxan şəxslərin ailəsi də, ətrafı da, cəmiyyət də onlara nəzarəti gücləndirməli və bu xəstələrin məsuliyyətsizliyə yol verməsinin qarşısını almalıdır. Biz elə şəxslərə həm nəzarət etməli, həm də dəstək göstərməliyik. Qeyd etdiyim kimi, bu prosesdə cəmiyyət olaraq bizlər də aktiv olmalı, bu cür insanlara öz dəstəyimizi əsirgəməməliyik. Məsələn, dostlarımızdan biri nəql edir ki, qonşusu virus daşıyıcısı olub və onun evdən bayıra çıxmaması, ətrafdakılara təhlükə yaratmaması üçün elə öz qonşuları hər gün zəruri dərman və ərzaq alaraq həmin şəxsin qapısının önünə qoyublar. Beləliklə, virus daşıyıcısı olan o insan cəmiyyətə, ətrafdakılara təhlükə yaratmadan ev şəraitində müalicə olunub, artıq səhhətində ciddi irəliləyiş hiss olunur. Ona görə də bu məsələdə hər birimiz, cəmiyyətin hər bir üzvü əlindən gələn dəstəyi, köməyi əsirgəməməlidir. Cənab Prezidentin də qeyd etdiyi kimi, “Biz birlikdə güclüyük”, yalnız birlikdə mübarizə aparmaqla bu bəlanı özümüzdən uzaqlaşdıra bilərik” - deyə S.İsmayılbəyli vurğuladı.
İradə SARIYEVA
