Vüqar Qədirov: “Qurumun yeni rəhbərliyində təmsil olunan gənc diplomatımızdan bu yöndə daha əhatəli və aktiv diplomatik təcrübəyə əsaslanan fəaliyyət gözləyirik”
Məlumat verildiyi kimi, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin II qurultayı keçirilib. Qurultayda birliyin 23 nəfərdən ibarət yeni idarə heyəti təsdiqlənib. Qurultayın qərarına əsasən, Azərbaycan Xarici İşlər Nazirliyinin əməkdaşı Tural Gəncəliyev icmanın sədri vəzifəsinə, Asif Cahangirov idarə heyəti sədrinin müavini vəzifəsinə seçilib. Digər müavin isə Qarabağ Araşdırmalar Mərkəzinin sədri Elçin Əhmədov olub.
Qeyd edək ki, indiyədək birliyin sədri Şuşa Rayon İcra Hakimiyyətinin başçısı Bayram Səfərov olub.
Formalaşan yeni rəhbərlikdən bundan sonra hansı yenilikləri gözləmək olar və indiyə qədərki “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin fəaliyyətini necə qiymətləndirmək mümkündür?
Qaçqın və Məcburi Köçkün Gənclər Təşkilatının sədri Vüqar Qədirov “Bakı-Xəbər”ə bildirdi ki, hansısa ictimai birlikdə həyata keçirilən struktur dəyişiklik həmin təsisatın nizamnaməsinə uyğun şəkildə baş tutur: “Bilirsiniz ki, Azərbaycanda çoxlu sayda QHT və ictimai birlik fəaliyyət göstərir və onların daxilində mütəmadi olaraq belə struktur islahatlar aparılır. Dağlıq Qarabağ Bölgəsinin Azərbaycanlı İcmasında baş verənləri də bu qəbildən saymaq olar. Ancaq bu da faktdır ki, sözügedən qurumun cazibəsi, adı və fəaliyyət sahəsi daha çox diqqət mərkəzindədir. Çünki həmin ictimai birlik ətrafında çoxlu sayda vətəndaşı birləşdirir, eyni zamanda, mühüm missiyanı həyata keçirir. İcmanın indiyə qədər olan fəaliyyətini müsbət qiymətləndirmək olar. Biz həmin qurumla sıx əməkdaşlıqda olmuşuq və onların necə əzmkarlıqla fəaliyyət göstərdiyinin şahidiyik. Bilirsiniz ki, azğınlaşan Ermənistan öz havadarlarına arxalanaraq, qəbul edilən mötəbər beynəlxalq qətnamələrə və hüququn aliliyinə məhəl qoymadan torpaqlarımızı işğal altında saxlayır. Buna görə də Dağlıq Qarabağ Bölgəsinin Azərbaycanlı İcmasının həmin tarixi ərazimizdə fövqəladə işlərə imza atması mümkünsüz idi. Göründüyü kimi, hazırda estafet daha gənc nəslin nümayəndələrinə verilib. Formalaşan yeni rəhbərliyin sırf diplomatik fəaliyyət sahəsinin kadrlarından ibarət olması qurumun işinə daha yaxşı impuls verə bilər. Hesab edirəm ki, Dağlıq Qarabağın Azərbaycanlı İcmasının problemləri bir qədər yeni innovativ metodlarla dünya ictimaiyyətinə çatdırılacaq. Bilirsiniz ki, Paşinyan hakimiyyətə gələn kimi bildirdi ki, Azərbaycanla danışıqlarda Ermənistan yox, Dağlıq Qarabağın erməni icmasını təmsil edən qondarma qurumun nümayəndələri iştirak etməlidirlər. Təbii ki, həmin təklif Azərbaycan və dünya birliyi tərəfindən rədd edildi”.
V.Qədirovun sözlərinə görə, Dağlıq Qarabağın azərbaycanlı və erməni icmalarının danışıqlarda əsas tərəf olmasa da, iştirakı vacib amillərdəndir: “Bu baxımdan da yeni yanaşma onu deməyə əsas verir ki, bizi həmin danışıqlarda diplomatiyanı dərindən bilən kadrlar təmsil edəcəklər. Bizim gözləntimiz ondan ibarətdir ki, rəhbərlikdə təmsil olunan gənc kadrlar öz potensial və enerjilərini daha çox bu problemə həsr etsinlər. Yeni rəhbərin tərcümeyi-halı ilə tanış olduqda məlum olur ki, onun özü də əslən Şuşa şəhərindəndir. Yəni işğal faktoru, torpaq itkisi ona daha yaxından tanışdır. Hesab edirəm ki, növbəti il Dağlıq Qarabağ probleminin həlli baxımından həlledici əhəmiyyətə malik olacaq. Bunu ölkə başçısı da çıxışlarında qeyd edib. Belə olan təqdirdə, danışıqlar prosesinin mühüm elementlərindən biri də Dağlıq Qarabağın Azərbaycanlı İcması olacaq. Qurumun yeni rəhbərliyində təmsil olunan gənc diplomatımızdan bu yöndə daha əhatəli və aktiv diplomatik təcrübəyə əsaslanan fəaliyyət gözləyirik”.
Dağlıq Qarabağ Bölgəsinin Azərbaycanlı İcmasının yeni sədri Tural Gəncəliyevin kimliyi ilə bağlı araşdırmalarımız zəngin nəticələr verdi. Belə ki, Tural Babaşah oğlu Gəncəliyev 6 mart 1980-ci ildə Şuşa şəhərində anadan olub. Uşaqlıq illərini Şuşanın ən qədim və məşhur məhəllələrindən biri sayılan “Çölqala Məhəlləsi”ndə yerləşən Xan qızı Xurşudbanu Natəvan, Azərbaycanın dahi bəstəkarı Uzeyir Hacıbəyov və tanınmış muğam ustası Xan Şuşinskinin ev muzeyləri ilə qonşuluqda keçirib. Bu isə onun sonradan musiqi təhsili almasına həvəs yaradıb. Daha sonra Şuşa şəhəri Vaqif Cəfərov küçəsi 28 ünvanında yaşayıb.
Şuşa şəhər 4 saylı orta məktəbdə ibtidai təhsil alıb. 1987-ci ildə Şuşa şəhəri Niyazi adına musiqi məktəbində tar sinfinə daxil olub.
Eyni zamanda, atası Gəncəliyev Babaşah Şuşa şəhər Uşaq Şahmat Məktəbinin direktoru işlədiyi müddətdə şahmat dərsləri sinfinə gedərək, şahmat təlimi alıb. Dağlıq Qarabağda keçirilən musiqi müsabiqələri və şahmat yarışlarında uşaq vaxtlarından iştirak edib.
Şuşanın işğalı səbəbindən 1992-ci ilin may ayından etibarən Bakı şəhərinə köşmüş və məcburi köçkün olaraq orta məktəb və musiqi təhsilini Bakıda davam etdirib. 1995-ci ildə Bakıda musiqi məktəbləri arasında keçirilmiş Hacı Xanməmmədovun xatirəsinə həsr olunmuş musiqi müsabiqəsinin qalibi olub və Dövlət Filarmoniyası və Rəşid Behbudov adına Mahnı Teatrında musiqi proqramları ilə çıxış edib.
2000-ci ildə Bakı Dövlət Universitetinin hüquq fakültəsinin hüquqşünaslıq ixtisası üzrə bakalavr pilləsini, 2002-ci ildə isə eyni fakültənin magistraturasını fərqlənmə diplomu ilə bitirib.
2004-cü ildə Azərbaycan Xarici İşlər Nazirliyinin Təhlükəsizlik Problemləri İdarəsinin referenti vəzifəsinə, 2006-cı ilin 16 yanvar tarixində həmin idarənin attaşesi, 2008-ci ilin 1 may tarixində üçüncü katibi vəzifəsinə təyin edilib.
2008-ci ilin dekabr ayında Azərbaycan Respublikasının Kanadadakı Səfirliyinə ezam edilib.
Səfirlikdə uzunmüddətli ezamiyyət müddəti bitdikdən sonra, 25 yanvar 2013-cü il tarixində Xarici İşlər Nazirliyinin Amerika İdarəsinin Şimali və Mərkəzi Amerika şöbəsinə təyin edilib. 8 aprel 2014-cü il tarixində birinci katib vəzifəsinə təyin olunub.
2014-cü ilin 1 oktyabr tarixindən etibarən Azərbaycan Respublikasının Çexiya Respublikasındakı Səfirliyinə birinci katib vəzifəsinə təyin edilib. 2017-ci ilin 16 noyabr tarixində ATƏT-in İnsan ölçüsü çərçivəsində “İnsan hüquqları və məcburi köçkünlər haqqında” Vyana şəhərində keçirilən konfransda Dağlıq Qarabağın Azərbaycanlı İcmasının təmsilçisi qismində çıxış etmək üçün Avstriyaya ezam edilib.
2018-ci ilin 1 oktyabr tarixindən etibarən Çexiyada uzunmüddətli ezamiyyətini başa vuraraq, Xarici İşlər Nazirliyinə geri çağırılıb.
Xarici İşlər Nazirliyində işlədiyi müddət ərzində bir sıra diplomatik kurslar və seminarlarda iştirak etmək məqsədilə xarici ölkələrə ezam edilib (Almaniya, Bolqarıstan, Misir və s.).
İngilis, fransız və rus dillərini bilir. Ailəlidir.
Onu da qeyd edək ki, Tural Gəncəliyev həm də istedadlı tar ifaçısıdır.
Məhəmmədəli QƏRİBLİ
