Ermənistan hakimiyyətinin Xankəndi separatçılarına 19 avtomobil kolonu ilə 400 tona yaxın "humanitar" deyilən yük göndərmək oyunu tam iflasa uğradı. Oyun iyulun 26-da Ermənistan hakimiyyəti tərəfindən öncədən düşünülmüş qayda və ssenari əsasında başladıldı...
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Bu fakt ona görə oyun hesab edilir ki, onun əsas və birinci hədəfinin heç də Xankəndi ermənilərinin həyati qidalarla təchizatından ibarət olmadığı obyektiv fikir sahiblərinin hamısına gün kimi aydındır. Bu nöqteyi-nəzərdən tutarlı sübut faktı olaraq bircə Paşinyanın bu açıqlamasını yada salmaq kifayətdir - "Humanitar yükü yola salırıq, əgər Azərbaycan bu yükü Xankəndiyə çatdırmağa imkan verməsə, ermənilər üçün genosid şəraiti yaratmaq istədiyini sübut etmiş olacaq"... Bunlar Paşinyanın öz dedikləri idi və çox dayaz düşünülmüş oyunu əla ifşa edir. Ermənistan hakimiyyətinin 19 dolu yük maşınını Xankəndiyə İrəvandan xüsusi təntənə ilə yola salması, tədbirə xarici diplomatların geniş şəbəkəsini cəlb etməsi də özlüyündə göstərdi ki, burada oyun oynanılır və dünyaya manipulyativ şəkildə nümayiş etdirilir ki, Azərbaycan Xankəndi ermənilərinə guya "ölüm blokadası hazırladığı üçün bu xilasedici addımı atırıq"...
İndi gələk "karvanlı blokada oyununun" tam iflasa uğradığını göstərən sübutlara...
Əvvəla, ermənilər hesablamışdılar ki, Laçın yolunun girişində saxlanmış 19 yük maşınını əks etdirən foto- video faktlar bütün dünya KİV-nin bir nömrəli xəbərinə çevriləcək. Çevrilmədi... Əksinə, Azərbaycan Prezidentinin təklif etdiyi alternativ Ağdam-Xankəndi yolundan istifadə məsələsi daha cəlbedici xəbərə çevrildi və 19 avtomobilin xəbər effektini ikinci plana sıxışdırdı...
2. Ermənilər gözləyirdilər ki, sülhməramlıların komandanlığı nümayişkaranə şəkildə Laçın yolunun başına gələcək və yükləri götürüb Xankəndiyə aparacaqlar. Halbuki sülhməramlılar heç reaksiya da vermədilər.
3. Ermənilər öncədən Xankəndidə quru çörəyin də tükənmək üzrə olduğu kimi qorxunc mənzərə yaratmağa çalışsalar da, iyulun 26-dan indiyədək ötən 7 gündə Xankəndidə heç bir fövqəladə hadisə baş vermədi və göründü ki, ermənilər hər şeyi sadəcə siyasi olaraq şişirdirlər.
4. Bu müddət ərzində Prezident İlham Əliyevin beynəlxalq görüş və telefon təmaslarının heç birində humanitar yük karvanı ilə bağlı ayrıca məsələ müzakirə edilmədi və buna ümumiyyətlə toxunulmadı.
5. Məlumatlar belə qənaətə gəlməyə əsas verir ki, hazırda Ermənistanda 19 maşın yükünü Xankəndiyə keçirmək yox, geriyə - İrəvana qaytarmaq perspektivi barədə daha çox düşünülür...
Tahir TAĞIYEV
