Məlum olduğu kimi, qanunsuz erməni silahlı birləşmələrinin üzvləri tərəfindən 22 dekabr 1991-ci il tarixdə Xocalı rayonunun Meşəli kəndində Azərbaycan millətindən olan şəxslərin soyqırımı, deportasiyası, kənd sakinləri və dövlətə məxsus çoxsaylı əmlakı məhv etmə və zədələməklə külli miqdarda maddi ziyanın vurulması faktları üzrə Azərbaycan Respublikası Cinayət Məcəlləsinin müvafiq maddələri ilə Azərbaycan Respublikasının Prokurorluq orqanları tərəfindən başlanmış cinayət işinin istintaqı davam etdirilir.
Keçirilmiş axtarış tədbirləri nəticəsində 29 iyul 2023-cü il tarixdə Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistan Respublikasına getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanılıb.
Ermənilər Vaqif Xaçaturyanla bağlı böyük şou düzəldiblər. Bu çərçivədə Avropa İnsan Haqları Məhkəməsinə müraciət ediblər. Arqumentləri odur ki, Azərbaycanın atdığı addım qanunsuzdur və bu gedişlə istənilən Qarabağ ermənisini həbs edə bilər. Bu necə qanunsuzluqdur ki, Xaçaturyan barəsində 12 noyabr 2013-cü il tarixdə beynəlxalq axtarış elan edilməklə məhkəmənin qərarı ilə həbs qətimkan tədbiri seçilib? Digər tərəfdən, erməni tərəfinin Xaçaturyanla bağlı bu kimi şikayətlərinin hüquqi perspektivi varmı?
“İkili standartlar olsa da, daha çox çalışmalıyıq və dünyanın qəbul edə biləcəyi formada təqdimat hazırlamalıyıq”
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafa “Bakı-Xəbər”ə açıqlamasında qeyd etdi ki, ermənilərin bununla bağlı şikayətlərinin hüquqi perspektivi yoxdur: “Əvvəla, Vaqif Xaçaturyan cinayətkardır. Ona görə ki, 1991-ci ildə Meşəli kəndində törədilən soyqırımda bilavasitə iştirak edib. Xocalı soyqırımında iştirak edib. Sadəcə, bəzi hallarda bizim hüquq institutumuz işləmir, siyasi təsisatlarımız fəal deyil. Ona görə də bəzən cinayətkarı da cinayətkar kimi təqdim edə bilmirik. Haqlı olduğumuz halda, haqsız duruma düşürük və təbliğatımızı yaxşı təşkil edə bilmirik. Çox təəssüf ki, bax bu səbəblərdən belə cinayətkarlar meydan sulayır. Ancaq istənilən halda Azərbaycan haqlıdır. Yəni axtarışa verilən cinayətkarı həbs edərək məsuliyyətə cəlb edir. Beləsi mütləq cəzalandırılmalıdır. Bu baxımdan Xaçaturyanla bağlı ermənilərin qaldırdığı səs-küyün hüquqi perspektivi yoxdur. Xocalı, Meşəli, Qaradağlı, Ağdaban və digər soyqırımlar erməni xalqının vicdanında bir ləkədir. Problem ondadır ki, biz sadəcə işimizi görə bilmirik. Ermənilər olmayan bir soyqırımdan bütün dünyada bir şüvən qoparıblar, amma biz real olanları dünyaya tanıda bilmirik. Xocalı qətliamı real bir vəhşətdir. İnsanlar vəhşicəsinə qətlə yetirilib. Bu soyqırımda iştirak edənlərdən biri də Vaqif Xaçaturyandır. Əslində Xocalı qırğınında iştirak edən cinayətkarların hamısını Azərbaycan dövlətinin müvafiq qurumları yerin dibində də olsa tapmalıdır. Tapıb gətirməli və cəzalandırmalıdır. Onlar elə bir böyük cinayət törədiblər ki, onları heç kim bağışlamayacaq. Onları nə tarix, nə də bizim millət bağışlayacaq. Beynəlxalq təşkilatlara, Avropa İnsan Haqları Məhkəməsinə bu barədə müfəssəl məlumatlar verilməlidir. İkili standartlar olsa da daha çox çalışmalıyıq və dünyanın qəbul edə biləcəyi formada təqdimat hazırlamalıyıq. Müvafiq qurumlar bununla işləməli və bütün məqamları nəzərə almalıdılar. O zaman ermənilərin apardığı kampaniyanın bir nəticəsi olmayacaq. Hər halda, bununla erməni xalqına da bir dərs verilməlidir ki, törətdikləriniz öz cəzasını alacaq. Bütün vəhşiliklər və cinayətlər gec-tez öz layiqli cəzasını alacaq”.
Vidadi ORDAHALLIA
