Məlumat verildiyi kimi, Meşəli soyqırımı hadisələri ilə bağlı beynəlxalq axtarışda olan şəxslərdən biri saxlanılıb. Bu barədə Baş Prokurorluğun Mətbuat Xidmətindən məlumat verilib. Məlumatda deyilir:
“Qanunsuz erməni silahlı birləşmələrinin üzvləri tərəfindən 22 dekabr 1991-ci il tarixdə Xocalı rayonunun Meşəli kəndində Azərbaycan milliyətindən olan şəxslərin soyqırımı, deportasiyası, kənd sakinləri və dövlətə məxsus çoxsaylı əmlakı məhv etmə və zədələməklə külli miqdarda maddi ziyanın vurulması faktları üzrə Azərbaycan Respublikası Cinayət Məcəlləsinin müvafiq maddələri ilə Azərbaycan Respublikasının Prokurorluq orqanları tərəfindən başlanmış cinayət işinin istintaqı davam etdirilir.
İstintaqla müəyyən edilmişdir ki, qeyd olunan tarixdə 1955-ci il təvəllüdlü, Azərbaycan Respublikasının vətəndaşı, Əsgəran rayonunun Badara kəndində doğulmaqla həmin kənddə yaşamış, Xankəndi şəhər avtomobil nəqliyyat müəssisəsində sürücü işləmiş Xaçaturyan Vaqif Çerkezoviç erməni milliyyətindən olan digər şəxslərlə birgə Meşəli kəndində yaşamış azərbaycanlıları bir milli qrup kimi bütövlükdə məhv etmək məqsədilə müxtəlif silahlardan, o cümlədən odlu silah və piyadaların döyüş maşınından istifadə etməklə həmin kəndə silahlı basqın edib 25 nəfər azərbaycanlı milliyyətindən olan şəxsi öldürmüş, 14 nəfər şəxsə müxtəlif dərəcəli bədən xəsarətləri yetirmiş, 358 nəfər azərbaycanlını isə beynəlxalq hüquq normaları və Azərbaycan Respublikasının qanunları ilə müəyyən edilmiş əsaslar olmadan qanuni yaşadıqları yerlərdən didərgin salmışdır.
Bundan başqa, Xaçaturyan Vaqif Çerkəzoviç qabaqcadan əlbir olduğu şəxslərlə birgə cinayətkar hərəkətlərini davam etdirərək dövlətə və kənd sakinlərinə məxsus əmlakları məhv etmək və zədələməklə ümumilikdə 5 milyon 496 min 900 manat məbləğində maddi ziyan vurmuşdur.
Aparılan cinayət işi üzrə kifayət qədər əsaslı şübhələr yarandığından Xaçaturyan Vaqif Çerkezoviçin Azərbaycan Respublikası Cinayət Məcəlləsinin 103 (soyqırımı) və 107-ci (əhalini deportasiya etmə və ya məcburi köçürmə) maddələrilə təqsirləndirilən şəxs qismində cəlb olunması barədə qərar qəbul edilmiş, lakin olduğu yer istintaqa məlum olmadığına görə barəsində 12 noyabr 2013-cü il tarixdə beynəlxalq axtarış elan edilməklə məhkəmənin qərarı ilə həbs qətimkan tədbiri seçilmişdir.
Keçirilmiş axtarış tədbirləri nəticəsində 29 iyul 2023-cü il tarixdə Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistan Respublikasına getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanılmışdır”.
Qeyd edək ki, Prezident İlham Əliyev çıxışlarında dəfələrlə deyib ki, əli Azərbaycan xalqının qanına batmış bütün terrorçular bir-bir cəzasını alacaq.
Azərbaycan Prezidenti “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında deyib:
“Biz İkinci Qarabağ müharibəsində - təkcə Ermənistanı məğlub etmədik, biz erməni faşizminin belini qırdıq. Biz erməni xalqını bəd əməllərdən demək olar ki, xilas etdik. Bəlkə bu acı məğlubiyyət, İkinci Qarabağ müharibəsindəki acı məğlubiyyət onlara dərs olacaq və onlar oturub fikirləşəcəklər ki, bundan sonra bu bölgədə necə yaşasınlar, öz günahlarını etiraf edəcəklər, öz cinayətlərini etiraf edəcəklər, cinayətkarları məsuliyyətə cəlb edəcəklər. Artıq bu proses başlayıb…”
Biz bu prosesin başlandığını həm də konkret faktlar əsasında görürük. Vaqif Xaçaturyanın həbsi bir daha sübut etdi ki, Azərbaycan xalqına qarşı cinayətlər törətmiş heç bir separatçı məsuliyyətdən kənarda qalmayacaq. Əslində, bu proses öz startını elə İkinci Qarabağ müharibəsindən götürüb.
Azərbaycan Ordusunun uğurlu əks-hücum əməliyyatları nəticəsində
məhv edilən hərbçilərdən biri də tanınmış erməni terrorçu, “Malış” ləqəbli Mqer Arutyunyan olub.
1973-cü il təvəllüdlü M.Arutyunyanın hələ 1991-1994-cü illərdə, eləcə də 2016-cı il Aprel döyüşləri zamanı işğalçı Ermənistan ordusunun tərkibində vuruşduğu qeyd olunub.
Döyüşlərdə “Qara pantera” könüllü hərbi birləşməsinin komandiri, Ermənistan parlamentinin eks-deputatı Rüstəm Qasparyan da öldürülən məşhurlar sırasına daxildir. O, 26 yaşlı oğlu Rafael Qasparyan ilə birlikdə dron zərbəsi zamanı məhv edilib. Rüstəm Qasparyan Birinci Qarabağ müharibəsində də aktiv iştirak etmişdi.
Qeyd olunmalıdır ki, döyüş meydanlında fiziki cəhətdən məhv edilən düşmən məşhurları ilə yanaşı, müəyyən səbəblərdən hərbi əməliyyatlarda iştirak etməyən bir çox məşhurlar da məğlubiyyətin verdiyi mənəvi stres fonunda ölüblər. Onlar arasında Birinci Qarabağ müharibəsinin iştirakçısı, hərbi cinayətkar Manvel Qriqoryanı qeyd etmək olar. O, Ermənistanın Qarabağ məğlubiyyətinin şokundan ölmüşdü. General Qriqoryan 2020-ci il noyabrın 19-da 64 yaşında evində ölü tapılmışdı. Azərbaycanlılara qarşı xüsusi amansızlığı ilə seçilən eks-deputat barəsində bir neçə maddə ilə cinayət işi açılmışdı.
Birinci Qarabağ müharibəsində Şuşanın işğalına rəhbərlik etmiş general-mayor Arkadi Ter-Tadevosyan da 44 günlük savaşın ardından ölmüşdü. Tadevosyan 2021-ci il martın 31-də İrəvanda keçinib.
Təhlükəsizlik məsələləri üzrə ekspert Elşən Həsənov da bizimlə söhbətində bildirdi ki, artıq ermənilər mövcud reallıqları dərk etməyə başlayıblar: “Bilirlər ki, Azərbaycanın tətbiq etdiyi nəzarət buraxılış məntəqəsi yalnız görüntü xarakterini daşımır. Orada sərhədimizi keçənlərin hər biri barəsində ətraflı məlumat bazası var. O cümlədən, əli bizim xalqın qanına batmış cəlladların hər biri haqda məlumat bazası mövcuddur. Artıq onlar dərk edir ki, hətta Arayik Arutunyan kimi baş separatçı da oradan keçsə, mütləq məsuliyyətə cəlb olunacaq. Çünki Azərbaycanın cinayət işi qaldırıb beynəlxalq axtarışa verdiyi istənilən şəxsin məsuliyyətə cəlb olunması həm də beynəlxalq hüququn tələbidir. Qarabağdakı ermənilər bilməlidirlər ki, onların Azərbaycana reinteqrasiyadan başqa çarələri yoxdur. “Blokada” şuarı da keçərli olmadı. Çünki Azərbaycan onlara istənilən alternativi təklif edir, ancaq qəbul etmirlər. Gördülər ki, bu yöndə olan saxta dezinformasiya pressinqləri də fayda vermədi. Onlar üçün yeganə yol Azərbaycanın suverenliyini tam qəbul edib, bütün cinayətkarları ölkəmizin ədalət mühakiməsinə verməkdən keçir”.
Məhəmmədəli QƏRİBLİ
