Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən Səfərbərlik və Hərbi Xidmətə Çağırış üzrə Dövlət Xidmətinin Laçın, Cəlilabad və Xaçmaz şöbələrində əməliyyat keçirilib.
Əməliyyat zamanı Xaçmazdakı şöbə rəisi Rahim Ağayev də saxlanılıb.
Bu qurumdakı əməliyyata səbəb vətəndaşların hərbi xidmətdən yayındırılması və ya saxta hərbi biletlərin verilməsi ola bilər. Ölkəmiz üçün hərbi cəhətdən belə həssas məqamda bu cür məsələlərlə alverin edilməsi həm də mənəviyyat məsələsidir. Sözügedən qurumun bir neçə şöbəsində belə halların əvvəl də ifşa edilməsi və bunun kökünün tam kəsilməməsi nədən xəbər verir?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Korrupsiyaya Qarşı Mübarizə Baş İdarəsinin, eyni zamanda xüsusi xidmət orqanlarının nümayəndələrinin əvvəllər hərbi komissarlıq kimi tanıdığımız bir təşkilatda keçirdikləri reydlər mütəmadi şəkildə baş verib: ”Bütün bunların əsasında da cəmiyyətdə formalaşan mənfi rəy, korrupsiya hadisələrinin reallığı məsələsi əsas roldadır. Bir zamanlar Müdafiə Nazirliyinin nəzdində fəaliyyət göstərən hərbi komissarlıqlar Hərbi Xidmətə Çağırış Üzrə Dövlət Xidməti adlı yeni bir qurumda birləşdirildilər. Burada əsgər bölgüsü ilə bağlı yaşanan özbaşınalıqların qarşısı tamamilə alındı. Düşünürəm ki, indi əsgərlərin yerləşdirilməsi məsələsi şəffaf şəkildə aparılır. Bir zamanlar bu sahədə çox ciddi korrupsiya faktları vardı. Həddindən artıq böyük özbaşınalıqlar qeydə alınırdı. Yəni hərbi xidmətə çağırışla bağlı yaşanan neqativlərin hamısının qarşısı alındı. Amma təəssüf hissi ilə qeyd etmək istəyirəm ki, bu təşkilatda korrupsiya faktları hələ də davam etməkdədir. Azərbaycan öz tarixinin 200 ilinin ən önəmli, ən həlledici dövrünü yaşayır. Belə bir dövrdə yaşamaq bizim hər birimizdən həssaslıq, diqqət, doğruluq, düzgünlük tələb edir. Xüsusilə indiki dövrdə mənəvi, psixoloji cəhətdən bu cür hallara yol verilməsi düzgün deyil. Mən belə düşünürəm ki, Korrupsiyaya qarşı Mübarizə Baş İdarəsinin reydlərinin keçirilməsi, bu təşkilatda şəffaf atmosferin yaranması, çağırış proseslərinin düzgün yerinə yetirilməsi üçün çox ciddi təkan rolunu oynayacaq. Bilirsiz ki, orada rəhbərlik də dəyişib. Yəqin ki, rəhbər kadrların kommunikasiyasında müəyyən dəyişikliklər olacaq. Hər halda, vəzifəsindən, səlahiyyətindən asılı olmayaraq, bu qurumun bütün əməkdaşları belə məsələdə prinsipial olmalıdır. Vətənpərvərlik hissini, doğruçuluğu, obyektivliyi önə çəkməlidir. Azərbaycan xalqının istər 44 günlük müharibə zamanı, istərsə də müharibədən sonra əldə etdiyi uğurlarına kölgə salmamalıdır. Çox həlledici bir dövrdə yaşayırıq. Belə bir dövrdə hamının Ali Baş Komandanımızın ətrafında yumruq kimi birləşməsinə ehtiyac var. Biz düşünə bilərik ki, müharibə bitib. Amma əslində bizim müharibəmiz davam edir. İndi də Azərbaycan döyüş vəziyyəti şəraitindədir. Ona görə də Azərbaycanda xalqımıza ehtiyac var. Mən bu cür korrupsiya hallarını kəskin şəkildə pisləyirəm. Bu insanların əməli istər ordumuza, istər dövlətimizə olan inama sarsıdıcı zərbə vurur. Bu cür halların qarşısı tamamilə alınmalıdır. Hər bir Azərbaycan vətəndaşı dövlət başçımızın yanında olmalıdır. Hələ gələcəkdə daha çox qazanacağımız qələbələr olacaq”.
Məhəmmədəli QƏRİBLİ
