Azərbaycan Futbol Federasiyasının ağır sanksiya qoyduğu üç futbolçunun günahlarını araşdırdıq...

Azərbaycan Futbol Federasiyaları Assosiasiyasının (AFFA) “danışılmış oyunlar”a qarşı apardığı mübarizə çərçivəsində müxtəlif oyunlar mütəmadi qaydada izlənir.

Assosiasiyadan verilən məlumata görə, qeydə alınmış şübhəli məqamlarla əlaqədar AFFA-nın nəzdində fəaliyyət göstərən danışılmış oyunlarla bağlı xüsusi komissiyanın və ekspertlərin apardığı araşdırmaya, həmçinin UEFA-dan AFFA-ya daxil olan məlumatlara əsasən, komissiyanın və ekspertlərin rəyi, UEFA-nın məlumat və hesabatları nəzərə alınaraq adları göstərilən şəxslərin futbolla bağlı bütün növ fəaliyyətlərinə və futbol tədbirləri (oyunlar, məşqlər və s.) zamanı stadionlara girişinə qadağa qoyulur:

Namiq Yusifov – “Qarabağ” FK-nın sabiq oyunçusu

Ceyhun Quliyev – “Səbail-2” komandasının sabiq oyunçusu

Kamran Əkbərov – “Səbail-2” komandasının inzibatçısı, U-19 milli komandasının sabiq inzibatçısı

Məsələ ilə əlaqədar hüquq-mühafizə orqanları tərəfindən müvafiq qaydada araşdırma davam etdiyi üçün İntizam Komitəsi tərəfindən növbəti qərarlar qəbul oluna bilər.

Barəsində sanksiya qərarı qəbul olunmuş şəxslərin Apellyasiya Arbitraj Tribunalına müraciət etmək hüququ var.

Biz adları qeyd edilən üç şəxsə hansı əməllərinə görə sanksiyalar tətbiq edildiyini araşdırdıq.

Siyahıda adı çəkilən "Qarabağ"ın sabiq futbolçusu Namiq Yusifov yerli idman saytlarına müsahibəsində bildirib ki, hazırda ölkədə deyil: “Qərara münasibətim necə olacaq? Şərh vermək istəmirəm. İnşallah, Bakıya gələcəm, ətraflı danışaram. 6-7 aydır ölkədə deyiləm. Bunlar da bir ucdan uzaqlaşdırırlar. Mən 6 aydan çoxdur işlərimlə bağlı ölkədən çıxmışam. Bu söhbətlər nə vaxtdan başlayıb? 6-7 ay bundan əvvəl bu məsələ var idi? Yox, 2018-ci il nədi?! O, başqa şeydir, bu, başqa. Ölkədən çıxmağımın buna aidiyyatı yoxdur. Ümumiyyətlə, mənim bu işlərlə heç bir əlaqəm yoxdur. Sadəcə, ola bilər, kimsə ad çəkib, ona görə belə olub. Kimin adı çəkilirsə, futboldan silirlər. Zaman hər şeyi göstərəcək. Heç kimə yaxşılıqdan başqa, bir pisliyim dəyməyib. Vaxtı çatanda, hər şey bilinəcək. Bəlkə 1 aya kimi gəldim. Baxarıq, görək necə olur. Ondan sonra danışarıq”.

Tanınmış futbol mütəxəssisi Kənan Məstəliyev “Bakı-Xəbər”ə açıqlamasında bildirdi ki, danışılmış oyunlar təkcə Azərbaycanın deyil, bütün dünya futbolunun bəlasıdır: “Uzun illərdir ki, bütün dünya səviyyəsində bununla mübarizə  aparılır. Düzdür, ortada nəticələr də var, amma bəlanın kökünü kəsmək mümkün olmayıb. AFFA-da bu istiqamətdə addımlarını atır. 2014-cü ildə Avropa Şurası idmanda danışılan oyunlarla bağlı Konvensiya qəbul edib. Bu Konvensiyanı Azərbaycan da imzalayıb. Artıq bizim qanunvericiliyə də belə maddə salınıb. Cinayət Məcəlləsinin 192-ci maddəsinin ikinci bəndində idman oyunlarının manipulyasiyası ilə bağlı bənd salınıb. Yəni bu əmələ görə cinayət məsuliyyəti nəzərdə tutulur. Söhbət yalnız idmandan uzaqlaşdırmaqdan getmir. Həm də böyük məbləğdə pul cərimələri, 3 ildən - 6 ilə qədər həbs cəzasını da nəzərdə tutur. İş qrup halında görülərsə cəzanın həddi 8 il müddətinə kimi müəyyənləşir. 2016-cı ildə bu məsuliyyətə birinci dəstənin bəzi oyunçularının adı keçib və onlar futboldan uzaqlaşdırılıblar. Sonra “Rəvan” və “Şərurspor” klubları futboldan uzaqlaşdırıldı. Belə işlərə görə azadlıqdan mərhum edilən adamlar da olub. Son bir ildə isə bu işlər daha da aktivləşib. Bu yaxınlarda 28 nəfər haqda qərar çıxarıldı. Həmin şəxslər futbolla birdəfəlik vidalaşmalı oldular. Hazırda o işlə bağlı istintaq gedir. Son üç nəfərin adı da həmin proseslərin davamı olaraq çəkilir. Yəni ortaya sürpriz kimi çıxmayıb. İstisna etmirəm ki, yaxın bir ay ərzində 3 yox, 30 nəfərin adı bu işdə keçəcək və onlar məsuliyyətə cəlb olunacaqlar”.

Ekspertin sözlərinə görə, bu işin başında pula hərislik dayanır: “Adətən bu işə kiçik məbləğdə maaş alan oyunçuları cəlb edə bilirlər. Təəssüflər olsun ki, bəzən bu tələyə asanlıqla düşən futbolçularımız olur. Nə səbəb olsa belə, buna haqq qazandıra bilmirəm. Bu əməllərə görə, zərərçəkən qazanandan çox olur. Hesab edirəm ki, bu istiqamətdə səylər artırılmalıdır. Belə adamlar layiqli cəzalarını almalıdır. Qarşısı alınmasa, bu virus daha da yaılıb,  idmanımıza ağır zərbələr vura bilər”.

Məhəmmədəli QƏRİBLİ