Yelisey sarayında Fransa prezidenti Emmanuel Makron tərəfindən çağırılan Avropa liderlərinin fövqəladə sammiti başa çatıb. Sammitdə Avropada təhlükəsizlik məsələləri, eləcə də Donald Tramp administrasiyasının Rusiya-Ukrayna müharibəsinə son qoyulmasıyla bağlı mövqeyi müzakirə edilib. Sammitdə Almaniya kansleri Olaf Şolz, Böyük Britaniyanın baş naziri Key Starmer, Avropa Komissiyasının sədri Ursula fon der Leyen, Polşanın baş naziri Donald Tusk, İtaliyanın baş naziri Giorgio Meloni və NATO-nun baş katibi Mark Rutte iştirak edib.
Sammitin yekunlarına dair heç bir qərar və ya bəyanat qəbul edilməyib.Donald Tusk sammitdə heç bir “məcburi qərar” qəbul edilmədiyini,lakin sammit iştirakçıları bütün əsas məsələlərlə bağlı yekdil rəydə olduqlarını desə də hansı məsələlərin müzakirə olunduğunu açıqlamayıb. Britaniyanın baş naziri Keir Starmer isə qeyd edib ki, “Bu gün təhlükə təkcə Ukraynanın gələcəyilə deyil, bütövlükdə Avropanın mövcudluğuğuyla bağlıdır.Yalnız Ukraynanın suverenliyini qoruyan davamlı sülh Putini gələcək təcavüzdən çəkindirə bilər”. O, həmçinin sülh sazişinin tərkib hissəsi kimi Ukraynada Britaniya qoşunlarından istifadəsini nəzərdən keçirməyə hazır olduğu barədə bəyanatını bir daha təkrarlayıb. Və əlavə edib ki,artıq təhlükəsizliyimizə görə məsuliyyəti öz üzərimizə götürməyimizin vaxtıdır. Jurnalistlər Starmerdən ABŞ-ın Rusiya ilə birtərəfli danışıqlara başlamaqla Britaniya, Avropa və Ukraynaya nə dərəcədə ciddi zərbə vurduğunu soruşublar. Böyük Britaniyanın baş naziri cavab olaraq bildirib ki, ABŞ da davamlı sülh istəyir, London, Avropa ölkələri və Kiyev kimi. Bununla belə Starmer hesab edir ki,danışıqlar başlasa və ya döyüşlər davam edərsə, Ukrayna mümkün olan ən sərfəli mövqedə olmalıdır. Bunun üçün isə "ABŞ-ın dəstəyi" lazımdır, Starmer onu da qeyd edib ki, Ukraynaya təklif edilən istənilən zəmanət ABŞ-ın dəstəyini əhatə etməlidir.Hesab edirəm ki,bu, Rusiyanı gələcəkdə növbəti hücumlardan effektiv şəkildə çəkindirmək üçün “yeganə yoldur”. Almaniya kansleri Olaf Şolz isə deyib ki, Ukraynada təhlükəsizliyin təmin edilməsi və sülhün əldə edilməsi məsələsində “Avropa və ABŞ arasında məsuliyyət bölgüsü olmamalıdır”. Bununla belə kansler Ukraynaya sülhməramlıların göndərilməsi ilə bağlı müzakirələri "son dərəcə yersiz" adlandırıb və əlavə edib ki,çünki Rusiya Ukraynaya qarşı müharibəni davam etdirir və heç kim mümkün sülhün necə olacağını bilmir. Surxay Əliyev
