Prezident Administrasiyasına daxil olan şikayətlər arasında MTK-ların insanlara zülmü əsas yer tutur
“Bəzi çoxmərtəbəli binaların istismarına icazə verilməsinin sadələşdirilməsi haqqında” Azərbaycan Respublikası Prezidentinin 2019-cu il 19 fevral tarixli Fərmanının icrası ilə əlaqədar yaşayış komplekslərinin idarə edilməsində illərdən bəri mövcud olan problemlər və mülkiyyət hüququnu təsdiq edən sənədlərin verilməməsi ilə bağlı şikayətlər azalsa da, vətəndaşlar ötən il də Prezident Administrasiyasına tikinti şirkətlərinin fəaliyyəti ilə bağlı çoxsaylı müraciət göndəriblər.
Bu fikirləri Prezident Administrasiyasının Vətəndaşların müraciətləri ilə iş şöbəsinin müdiri Süleyman İsmayılov “Azərbaycan Prezidentinin dərin islahatları vətəndaş müraciətlərində qaldırılan məsələlərin həllinə böyük inam yaradır” başlıqlı məqaləsində qeyd edib.
Məqalədə qeyd edilib ki, il ərzində 100-dən çox tikinti şirkəti tərəfindən çoxmərtəbəli yaşayış binalarının inşasında müvafiq norma və qaydalara, həmçinin, müqavilə şərtlərinə riayət edilməməsindən, tikinti işlərinin vaxtında yekunlaşdırılmamasından, bəzi şirkətlərin mənzilləri iki və daha artıq şəxsə satmasından, kompensasiya verilmədən söküntü işlərinə başlanılmasından və ya kompensasiyaların az olmasından, təsdiq edilmiş layihədən kənara çıxılmasından, binaların təhlükə törədəcək dərəcədə yaxın məsafədə tikilməsindən, yaşayış komplekslərinin idarə edilməsindəki bəzi çatışmazlıqlardan, aldıqları mənzillərin başqalarına satılmasından şikayət ediblər. O da məlum olub ki, 51 tikinti şirkətindən şikayət daha çoxdur.
Görünən odur ki, hələ də tikinti şirkətləri vətəndaşları incidirlər. Üzərlərinə düşən öhdəlikləri yerinə yetirməkdən müxtəlif vasitələrlə yayınırlar. Ən dəhşətlisi odur ki, hələ də bəzi tikinti şirkətləri bir mənzili bir neçə nəfərə satmaq kimi dələduzluq hallarına yol verirlər.
- “Müvafiq qurumlar tikintiyə icazə verməzdən əvvəl tikinti şirkətini araşdırmalıdırlar”
Məsələyə münasibət bildirən əmlak məsələləri üzrə ekspert Nüsrət İbrahimovun sözlərinə görə, tikinti şirkətlərinin çoxu əvvəl verdikləri vədləri sonra yerinə yetirmir: “Ən çox şikayət müqavilə öhdəliklərinin yerinə yetirilməməsi ilə bağlıdır. Məsələn, müqavilədə tikintinin başaçatma müddəti 2 il göstərilir. Ancaq tikinti illərlə çəkir və vətəndaş 6-8 il gözləməli olur. İkincisi, müqavilədə göstərilən şərtlərə əməl olunmur. Tikintiyə başlayanda müxtəlif vədlər verirlər ki, filan-filan şeylər olacaq. Ancaq bina hazır olandan sonra məlum olur ki, deyilənlərin çoxuna əməl olunmayıb. Üçüncüsü, tikinti şirkətləri mənzil sahələrini və qeyri-yaşayış sahələrini düzgün hesablamırlar. Bununla bağlı şikayətlər və məhkəmə çəkişmələri daha çox olur. Dördüncüsü, vətəndaşlar mənzilə köçəndən sonra sənədləşmə problemləri ilə üzləşirlər. MTK-lar mənzillərin sənədləşmə məsələləri ilə maşğul olmurlar. Bunu mənzil sahiblərinin öhdəsinə atırlar. Beşincsi, tikinti şirkətləri kommunal xidmətlərlə bağlı vətəndaşları incidirlər. Qeyri-rəsmi yığımlar edirlər. Bütün bunlar mənzil sahiblərini ciddi narahat edir. Çox az tikinti şirkəti var ki, öhdəliklərinə əməl edir. Əksər tikinti şirkəti götürdüyü öhdəliklərə əməl etmir və nəticədə vətəndaşlar bundan əziyyət çəkirlər”.
N.İbrahimovun fikrincə, tikinti şirkətlərinin yol verdikləri neqativ halların qarşısını almaqdan ötrü bir sıra tədbirlər görülməlidir: “Müvafiq qurumlar tikintiyə icazə verməzdən əvvəl tikinti şirkətini araşdırmalıdırlar. Bəlli olmalıdır ki, MTK-nın maliyyə dayağı var, yoxsa yoxdur. Tikinti şirkətinin maddi-texniki bazasının nə yerdə olması müəyyən edilməlidir. Bütün bunlardan sonra onlara tikintiyə başlamaq icazəsi verilməlidir. Müvafiq qurumlar nəzarət etməlidirlər ki, tikinti şirkəti götürdüyü öhdəliklərə nə dərəcədə əməl edir. Yalnız bütün bunlardan sonra problem öz həllini tapa bilər”.
Vidadi ORDAHALLI
